“Mag-Self-Reliant Kita ug Mobarug sa Kaugalingon”
Kon ang mga Santos sa Ulahing mga Adlaw sa tibuok kalibutan modawat ug mohangop sa mga baruganan ug mga doktrina sa self-reliance nga inisyatibo sa Simbahan, mag-ani sila sa mga panalangin sa “mas labaw nga paglaum, kalinaw, ug kauswagan.”
Sa wala pa siya mahimong miyembro sa Simbahan, Si Peter migahin og dakong panahon sa iyang hamtong nga kinabuhi sa pagpaningkamot nga makakab-ot og pinansyal nga kalampusan. Sa iyang panggawas nga panagway, daw sa aduna siya niini. Total, nanag-iya ug nagpadagan naman siya og pipila ka negosyo.
Dihang ang usa ka lokal nga lider sa Simbahan sa West Midlands, England, mihangyo ni Peter sa pag-apil sa usa ka grupo sa personal nga pinansyal nga gitanyag pinaagi sa self-reliance nga inisyatibo sa Simbahan, siya nagduda nga ang kurso dili makatudlo niya og bisag unsa. Sa higayon nga gisugdan ni Peter sa pagtambong sa grupo, dali ra hinoon siyang nakaamgo kon unsa pa ka dako ang iyang angayng makat-unan.
“Ang kurso dili lang kay mahitungod sa pinansyal; kana katunga ra sa tibuok istorya,” misulti siya. “Ang pinakaimportante alang kanako mao ang pagkat-on sa pagbaton og hugot nga pagtuo sa Langitnong Amahan—sa unsang paagi Siya naghatag nato sa tanang temporal nga mga panalangin ug mohimo nato nga makakab-ot sa tinuoray nga self-reliance kon atong sundon ang Iyang espiritwal nga paggiya.”
Isip sakop sa grupo sa personal nga pinansyal, nakat-unan ni Peter ang mga praktikal nga mga kahanas sama pananglit sa pagsubay sa gasto sa pamilya, pagbuhat ug pagpuyo nga nagsunod sa usa ka budget, pagpamenos sa utang, ug pagtigum alang sa umaabot. Sa paggamit niining mga kahanas, inubanan sa hugot nga pagtuo kang Jesukristo ug kakugi sa pagtrabaho, si Peter ug ang iyang asawa nakabayad sa dako nga utang.
“Mibati ko nga wala na kaayo mabug-ati ug gawasnon nga walay kahadlok nga naay utang ug pinansyal nga kagubot,” siya misulti. “Akong gibati ang abunda nga mga panalangin sa Langitnong Amahan sa paagi nga wala pa sukad mabati nako kaniadto. Nakat-on ko unsaon sa pagpangamuyo Kaniya ug sa pagpaminaw sa Iyang mga tubag sa higayon nga manginahanglan ko og tabang sa mga temporal nako nga mga kalihokan.”
Inisyatibo sa Self-Reliance
Ang self-reliance labaw pa kay sa pagbaton og maayong trabaho, pagtipig og pagkaon, o kwarta sa bangko. Hinuon, kini mao “ang abilidad, pasalig, ug paningkamot sa pagsangkap sa espiritwal ug temporal nga mga kinahanglanon sa kinabuhi alang sa kaugalingon ug sa pamilya. Kon ang mga miyembro sa [Simbahan] mahimong self-reliant, sila usab mas makahimo sa pagserbisyo ug pag-atiman sa uban”1 samtang sa ingon ang trabaho gituboy isip nag-una nga baruganan sa ilang mga kinabuhi.
Si Presidente Thomas S. Monson mitudlo: “Ang Self-reliance resulta sa atong pagtrabaho ug mosuporta sa tanang mga buhat sa welfare. Kini usa ka mahinungdanon kaayo nga elemento sa atong espiritwal ug ingon man sa atong temporal nga kaayohan. … ‘Atong trabahoan kon unsay atong panginahanglan. “Mag-self-reliant kita ug mobarug sa kaugalingon”. Ang kaluwasan dili maangkon pinaagi sa lain nga baruganan. Ang kaluwasan usa ka indibidwal nga buluhaton, ug kita kinahanglan nga maningkamot sa atong kaugalingon nga kaluwasan sa temporal ug ingon man sa espiritwal nga mga butang.’”2
Ubos sa direksyon sa lokal nga mga priesthood lider, sobra sa 500,000 ka mga Santos sa Ulahing mga Adlaw diha sa kapin sa 100 ka mga nasud ang miapil sa self-reliance nga inisyatibo sukad niadtong 2014. Ang Simbahan nagpaila karon sa inisyatibo sa tibuok North America.
Kini nga inisyatibo naglakip sa mga kurso ug kapanguhaan “aron pagtabang sa mga miyembro sa Simbahan nga makakat-on ug makagamit sa mga baruganan sa hugot nga pagtuo, edukasyon, kakugi, ug pagsalig diha sa Ginoo. Ang pagdawat ug pagsunod niining mga baruganan,” misulti ang Unang Kapangulohan, “mas makapahimo [natong] makadawat sa temporal nga mga panalangin nga gisaad sa Ginoo.”3
Malipayon ug Malaumon
Si Maria Edilene Romão nawad-an na og paglaum. Wala siya makakita og trabaho, usa siya ka single nga inahan, ug siya adunay daghang anak nga pakaunon.
Nga sa dihang ang duha ka miyembro sa ilang ward sa Santa Catarina, Brazil, midapit niya sa debosyonal sa self-reliance. Sa katapusan sa debosyonal, si Maria, miapil sa usa ka grupo aron motabang kaniya sa pagpangita og trabaho.
“Sa unang higayon sa akong kinabuhi, nagsugod ako sa pagtuo diha sa usa ka kaugmaon diin akong maatiman ang akong pamilya,” nahinumdum siya. “Mituo ako nga ang grupo sa self-reliance makatabang nako sa pag-usab sa akong kinabuhi.”
Nahimo gyud.
Sa sunod nga 12 ka semana, mipahinungod si Maria sa iyang kaugalingon ngadto sa iyang grupo, sa iyang pagtuon, ug sa iyang mga pasalig. Mitrabaho siya uban sa bag-ong nakaplagan nga kusog padulong ngadto sa iyang mga tumong. Nagpraktis siya sa mga teknik unsaon pagtubag sa job-interview. Sulod sa duha ka semana, nakakuha siya og kahigayunan nga ma-interview sa usa ka posibling trabaho. Kadto nga interview nakapasulod kaniya sa trabaho.
“Ang akong kinabuhi nausab hangtud sa hangtud,” miingon si Maria, kinsa wala na maglisud sa pagpakaon sa iyang pamilya. “Malipayon na ako karon, mahinamon, mapailubon, ug malaumon. Nasayud ko nga buhi ang Langitnong Amahan ug nahigugma nako. Nasayud ko nga kon mogamit ko sa akong hugot nga pagtuo diha kang Jesukristo, ako panalanginan.”
“Ang Labing Nindot nga Himan”
Ang self-reliance mao ang paagi sa katapusang tumong, si Elder Robert D. Hales, sa Napulog Duha ka mga Apostoles miingon: “Ang atong katapusang tumong mao ang pagkahimong sama sa Manluluwas, ug kana nga tumong gipadako pinaagi sa atong dili hinakog nga pagserbisyo ngadto sa uban. Ang atong abilidad sa pag-alagad mahimong mapadak-an o mapagamyan pinaagi sa ang-ang sa atong self-reliance.”
Diha lamang sa pagpaningkamot sa atong kaugalingon, midugang si Elder Hales, “nga kita mahimong matinud-anon nga makasunod sa Manluluwas sa pagpangalagad ug pagpanalangin sa uban.”4
Si Sergio Galbuchi nakakat-on niana nga kamatuoran sa iyang kaugalingon mismo sa dihang misugod siya sa iyang kaugalingong negosyo wala madugay human nga gitawag siya sa kapangulohan sa stake isip stake self-reliance specialist. Nangandam uban sa hugot nga pagtuo, mga kahanas, ug kahibalo nga iyang nakuha isip sakop sa komite, si Sergio ug ang iyang asawa, si Silvia, mibukas og usa ka shop didto sa Buenos Aires nga nagpakita og mga “pangdekorasyon ug pagkaon” sa Argentina.
“Naghunahuna ko nga ang pagkahimong self-reliant usa ka paagi sa paggamit og hugot nga pagtuo,” nagsulti si Sergio. Sa sayo pa, siya og si Silvia wala makatagamtam sa kalampusan nga ilang gilauman, mao nga ang hugot nga pagtuo nagpabiling sentro sa ilang paningkamot. Apan samtang sila nagpaabut sa mga benepisyo nga pinansyal sa negosyo, mikugi sila og maayo ug ang ilang mga kustomer nakabenepisyo sa ilang mga produkto ug sa ilang misyonaryo nga paningkamot.
“Daghang mga tawo ang among naila-ila,” miingon si Sergio. “Ug kami adunay kahigayunan sa pagpanghatag og mga kopya sa Basahon ni Mormon.”
Sa sinugdanan, ang stake self-reliance committee miila og 10 ka mga miyembro sa stake ni Sergio nga nagkinahanglan og tabang sa self-reliance. Apan ang mga bishop miapil.
“Karon among nahibaloan nga 35 na ka mga tawo ang nanginahanglan,” misulti si Sergio samtang ang paningkamot milambo. “Ang ilang mga bishop midapit nila tagsa-tagsa sa pag-apil diha sa mga grupo.”
Ang ilang hugot nga pagtuo milambo, mihimo sila sa gikinahanglan nga mga kausaban, ug migamit sa mga bag-ong kahanas.
“Matag higayon nga makig-istorya ko sa mga priesthood lider, maningkamot ko sa pagsulti nila nga kini maoy pinakanindot nga himan nga atong nadawat gikan sa Unang Kapangulohan,” midugang si Sergio. “Mas maayo kini kay sa kwarta nga ihatag aron itabang sa usa ka tawo, ug ang mga pagtulun-an mas tataw kay sa mga kahibalo nga akong nakat-unan niadtong estudyante pa ko sa unibersidad.”
Ang labing importante, kadtong mokompleto sa ilang 12-semana nga kurso sa self-reliance mahimong mas maayo nga mga disipulo ni Jesukristo ug sa pagkat-on unsaon paggamit sa ilang kahanas sa pagtukod sa gingharian sa Dios.
“Kining [self-reliance] nga grupo wala lang mo-focus sa atong negosyo; nag-focus kini sa atong relasyon sa Dios ug sa uban,” misulti si Sergio. “Mahimo kitang mas maayo nga mga disipulo ni Jesukristo sa atong tulo ka bulan nga gigahin dinhi niini nga grupo. Total, ang usa ka negosyo tingali makatabang nato nga mahimong mas self-reliant, apan ang katapusang katuyoan mao ang pagserbisyo.”
Paglambo ug Aksyon
“Kini kanunay gayud nga usa ka kinahanglanong pagtulun-an sa mga Santos sa Ulahing mga Adlaw,” si Presidente Joseph F. Smith misulti (1838–1918), “nga ang relihiyon nga walay gahum sa pagluwas sa katawhan sa temporal nga paagi ug mohimo kanila nga magmalamboon ug malipayon dinhi, dili mahimong saligan aron sa pagluwas kanila sa espirituhanong paagi, aron sa paghimaya kanila sa umaabut nga kinabuhi.”5
Dili kita angay nga matingala, nga sa pagpalig-on sa temporal, ato usab mapalig-on ang espiritwal. Sila si Elder David and Sister Theresa Nish, kinsa nagserbisyo isip mga misyonaryo sa self-reliance sa Solomon Islands, ilaha mismong nakita ang relasyon tali sa temporal ug espirituhanon nga kahimtang sa mga miyembro sa Simbahan.
“Ang espiritwal nga paglambo ug pag-adto sa templo tataw nga gipahinungod ngadto sa mga baruganan, mga kahanas, ug sa mga gawi nga gitudlo sa Ang Akong Pundasyon ug sa kinatibuk-ang pagpasabut sa Ang Akong Dalan Paingon sa Kaugalingon nga Pagpaningkamot,” ang ilang giingon bahin sa mga booklet sa inisyatibo. [Kini] nakatabang sa katawhan paghimo og espiritwal ingon man temporal nga pag-uswag, paingon sa espiritwal ug temporal nga self-reliance.”
Si Cheryl Redd, usa ka self-reliance facilitator sa Utah, USA, nagpasabut kon sa unsang paagi ang mga baruganan sa espiritwal nga inisyatibo nakatabang kaniya nga mouswag sa temporal nga paagi: “Nakamgo ko nga kining mga baruganan ug mga sukaranan magamit sa tanang aspeto sa atong kinabuhi. Kini nga mga workshops nakatabang nako nga mahimong mas maka-focus sa akong mga responsibilidad isip usa ka asawa ug inahan. Karon aduna na koy mga himan aron mas masabtan ang panalapi sa pamilya. Akong nakita nga kon magtrabaho ta uban ang atong kapikas sa pagdumala sa panalapi, sa usa ka paagi, susama kini sa usa ka negosyo. Nagkinahanglan kita niining mga himan alang sa atong mga pamilya nga molampus.”
Diha sa tibuok Simbahan, kining dugang nga pagsabut misangput ngadto sa pagdugang sa pagkamatinud-anon ug espiritwal nga kalig-on. Isip resulta, ang mga miyembro nakapalambo sa ilang mga pasalig nga mosimba, mobayad sa mga ikapulo, ug magpabilin nga takus nga mosulod sa templo.
“Nakuha niini ang akong atensyon,” miingon ang bag-ong miyembro nga si George Echevarría bahin sa inisyatibo sa self-reliance. Si George, kinsa nag-drive og taxi sa Peru, miingon nga ang inisyatibo mitabang niya nga makaangkon og pagpamatuod sa ebanghelyo samtang nagpuno niya sa tinguha nga pag-uswag sa iyang kaugalingon. Karon milaum siya nga mahimong electrician, mag-ayo sa mga gagmay nga traysikol nga iyang gi-drayban sa mga katuigan.
“Dili kita angayng maglingkod ug maghulat nga mahitabo ang mga butang ngari nato,” miingon siya. “Kinahanglan nga molihok kita nga dili na sultihan.”
“Ang Inyong Kinabuhi Mapanalanginan”
Ang mga Santos sa Ulahing mga Adlaw sa tibuok kalibutan nag-ani sa gisaad nga mga panalangin sa Ginoo samtang sila nagkugi sa pagkat-on, pagsunod ug paggamit sa espiritwal ug temporal nga baruganan sa self-reliance. Samtang ang tanan makabenepisyo, ang inisyatibo espesyal nga mipanalangin niadtong kinsa nagkulang o nanginahanglan og pagpalig-on sa temporal ug espiritwal nga self-reliance. Ang Perpetual Education Fund nagsuporta sa inisyatibo sa self-reliance pinaagi sa pagtabang niadtong adunay plano alang sa educational training aron maka-access sa gikinahanglang kapanguhaan.
Ang mga kasulatan nagsaad nga ang Ginoo motabang samtang molihok kita ngadto sa pagka-self-reliant. Ang Ginoo namahayag, “Mao kini ang akong katuyoan sa paghatag sa akong mga santos” (D&P 104:15).
Sa pagkomentaryo niana ng katuyoan, ang Unang Kapangulohan namahayag: “Kini nga pinadayag usa ka saad gikan sa Ginoo nga Siya mosangkap sa temporal nga mga panalangin ug moabli sa mga oportunidad sa pagka-self-reliant, nga mao ang abilidad nga kita makasangkap sa mga kinahanglanon sa atong kinabuhi ug sa mga sakop sa atong pamilya.”
Samtang kita magtuon, mogamit, ug motudlo niining mga baruganan sa sakop sa atong pamilya, ang Unang Kapangulohan nagsaad, “ang imong kinabuhi mapanalanginan. Imong makat-unan unsaon sa paglihok sa imong dalan sa pag-uswag ngadto sa dugang nga self-reliant. Kamo mapanalanginan og mas dakong paglaum, kalinaw, ug kauswagan.”6