Ang Pagtawag sa mga Orihinal nga mga Apostoles sa Pagpahiuli
Niadtong Pebrero 8, 1835, mihangyo si Joseph Smith sa mga igsoon nga sila si Brigham ug Joseph Young sa pag-awit kaniya. Ang Propeta nakadawat dayon og pagpadayag nga panahon na kadto sa pagtawag sa Napulog Duha ka mga Apostoles.1
Mihangyo si Joseph Smith kang Brigham Young sa pagpadala og pahibalo nga sa sunod Sabado ipahigayon ang usa ka komperensya. Misulti siya kang Brigham nga siya mahimong usa sa Napulog Duha.2
Paglabay sa unom ka adlaw, ang mga Santos nanagtigum. Misulti si Joseph Smith nga ang usa sa mga nag-unang katuyoan sa panagtigum mao ang Tulo ka mga Saksi sa Basahon ni Mormon—Oliver Cowdery, David Whitmer, and Martin Harris—“sa pagpili og napulo ug duha ka mga lalaki gikan sa simbahan nga mahimong Apostoles.”3 Sila si Oliver ug David nakadawat na nianang assignment niadtong Hunyo 1829, apan bisan sila “mipakisayud sa Ginoo pinaagi sa pagpuasa ug pag-ampo” sa pag-ila sa Napulog Duha, ang panahon wala pa nahusto.4 Karon, miingon si Joseph, ang panahon miabot na.
Ang Napulog Duha (sa han-ay nga girepresentar sa miting) mao sila si Lyman Johnson, edad 23; Brigham Young, 33; Heber C. Kimball, 33; Orson Hyde, 30; David W. Patten, 35; Luke Johnson, 27; William E. McLellin, 29; John F. Boynton, 23; Orson Pratt, 23; William Smith, 23; Thomas B. Marsh, 34; ug Parley P. Pratt, 27. Ang tanan nakaalagad kaniadto og mga misyon. Walo kanila nakauban ni Joseph Smith sa ekspedisyon sa Kampo sa Zion sa miaging ting-init.5
Pagkahuman sa ilang pagkapili, ang matag usa sa mga Apostoles gi-orden.6 Ang ilang mga panalangin sa ordinasyon napuno sa mga saad sa kalampusan sa misyonaryo. Si Heber C. Kimball sa kaulahian nahinumdum sa mga panalangin “mitagna sa daghang mga butang nga mahinabo, nga kita makaangkon og gahum sa pag-ayo sa masakiton, pagpapahawa sa mga yawa, pagbuhi sa patay, paghatag og panan-aw ngadto sa mga buta, … pagtangtang sa mga bukid, ug ang tanang mga butang kinahanglang maubos kanato pinaagi sa ngalan ni Jesukristo.”7
Si Oliver Cowdery usab mihatag og gibug-aton sa mga kalisdanan nga ilang atubangon: “Kinahanglan mangandam sa tanang panahon sa paghimo og sakripisyo [sic] sa inyong kinabuhi, kon gikinahanglan man kini sa Dios alang sa pagpadayon ug pagpalig-on sa Iyang kawsa.” Si Oliver miawhag sa mga Apostoles sa pagtinguha og personal nga kahibalo ni Jesukristo aron sila makapamatuod sa Iyang pagkabuhi uban sa kasigurohan: “Ayaw gayud paghunong sa pagpaningkamot hangtud nga ikaw makakita sa Dios, nawong sa nawong.”8
Pagsugod niadtong Mayo 1835, ang mga Apostoles mihimo og pipila ka misyon sa pagpangita og katudloan alang sa Simbahan, ug ang ilang kinatibuk-ang pagpangulo nakapanalangin usab sa daghang indibidwal.