7 Bagay na Kinatatakutan Natin Tungkol sa Pagsisisi

at Bakit Hindi Natin Dapat Katakutan ang mga Ito

Ni David A. Edwards

Mga Magasin ng Simbahan

Madalas tayong matakot na magsisi. Ngunit maaari tayong makahugot ng lakas-ng-loob sa katotohanan.

Young man looking sad

Alam nating lahat na bawat tao ay kailangan ng pagsisisi (tingnan sa Mga Taga Roma 3:23). Alam natin na kailangan nating magsisi para mahanap ang tunay na kagalakan sa pamamagitan ng kapangyarihan ng nagbabayad-salang sakripisyo ni Jesucristo (tingnan sa Alma 36:24). Alam din natin na ang pagpapaliban sa pagsisisi ay masamang ideya (tingnan sa Alma 34:32–34). Subalit ito mismo ang ginagawa ng marami sa atin. Bakit? Mas alam natin, ’di ba?

Ang isang posibleng sagot ay takot. Kung nakagawa man tayo ng mabigat na kasalanan na kailangan nating ipagtapat sa ating bishop o may mga gawi, pag-uugali, o asal tayo na humahadlang sa atin na maging lubos na tapat sa ebanghelyo ng Panginoon at sa mga pamantayan nito, takot ang maaaring humadlang sa atin upang gawin ang kailangan nating gawin para baguhin ang ating buhay.

Narito ang pitong takot na maaaring maging dahilan upang ipagpaliban natin ang pagsisisi, gayundin ang ilang ideya at turo na makakatulong sa atin na magkaroon ng lakas-ng-loob na gawin ang alam nating magdudulot ng kapayapaan at kaligayahan sa atin.

1. Takot na Mapahiya

Kung sasabihin ko sa bishop ko ang nagawa ko, masyado siyang madidismaya—at mapapahiya ako nang husto. Paano kung kailangan kong sabihin sa mga magulang ko? Paano kung malaman ng iba?

May mas matitindi pang bagay kaysa mapahiya, tulad ng espirituwal na pasanin dahil sa kasalanang hindi napagsisihan at pagkawala ng patnubay sa Espiritu Santo. Anuman ang madama mong kahihiyan sa pagtatapat sa bishop mo ay panandalian lamang at tuluyan na itong mapapawi ng kapanatagan at kagalakan. Mapapatunayan ito ng sinumang nakapagtapat na ng kasalanan sa bishop nila.

“Ipinapangako ko sa iyo na hindi ka huhusgahan [ng bishop]. Bilang lingkod ng Panginoon, magiging mabait siya at maunawain habang nakikinig sa iyo. Pagkatapos ay tutulungan ka niya sa proseso ng pagsisisi. Siya ang sugo ng awa ng Panginoon para tulungan kang maging malinis sa pamamagitan ng Pagbabayad-sala ni Jesucristo.”

Elder C. Scott Grow ng Pitumpu, “Bakit Ko Kailangang Magtapat at Ano ang Kailangan Kong Ipagtapat sa Bishop Ko?” Liahona, Okt. 2013, 59.

2. Takot sa mga Ibubunga

Kung sasabihin ko sa bishop ko ang mga kasalanan ko, maaaring masama ang ibunga nito—hindi puwedeng makibahagi ng sakramento, hindi puwedeng magbasbas o magpasa ng sakramento, hindi puwedeng magmisyon kapag gusto ko. Masyado nitong guguluhin ang buhay ko.

Tandaan na ang mga positibong bunga ng pagsisisi ay mas marami kaysa tila mga negatibong bunga nito. Magtuon sa mabubuting bagay na ipinangako ng Panginoon sa mga nagtatapat at nagsisisi.

“Ang katunayang makapagsisisi tayo ay ang mabuting balita ng ebanghelyo! Ang pagkakasala ay [maaalis]. Mapupuspos tayo ng kagalakan, makakatanggap ng kapatawaran sa ating mga kasalanan, at magkakaroon ng katahimikan ng budhi. Mapapalaya tayo mula sa kawalan ng pag-asa at pagkaalipin sa kasalanan.”

Elder Dale G. Renlund ng Korum ng Labindalawang Apostol, “Pagsisisi: Isang Pagpiling Puno ng Kagalakan,” Liahona, Nob. 2016, 124.

“Kung nagkasala kayo, pagkatapos ay mas maagang nagsisi, mas maaga kayong makapagsisimulang makabalik muli at mas maaga ninyong matatagpuan ang kapayapaan at kagalakang dulot ng kapatawaran.”

Para sa Lakas ng mga Kabataan (polyeto, 2011), 28.

Young man smiling

3. Takot na Magsikap

Parang napakahirap gawin ng mga pagbabagong kailangan kong gawin. Baka matagalan din ito.

Anumang bagay na makabuluhan ay kailangang pagsikapan. Ang kapatawaran, kapayapaan, at espirituwal na pag-unlad ay kabilang sa mga bagay na makabuluhan.

“Ang ibig sabihin ng pagsisisi ay pagsisikap na magbago. Isang pagkutya sa pagdurusa ng Tagapagligtas sa Halamanan ng Getsemani at sa krus ang asamin nating gawin Niya tayong mabubuting nilalang nang wala tayong kapagud-pagod. Bagkus, hinahangad natin ang Kanyang biyaya upang matugunan at magantimpalaan ang ating pagsusumigasig (tingnan sa 2 Nephi 25:23). Marahil tulad ng pagdarasal natin na kahabagan tayo, dapat tayong manalangin na magkaroon tayo ng oras at pagkakataong magpakabuti at magsikap at madaig ang kasalanan.”

Elder D. Todd Christofferson, “Ang Banal na Kaloob na Pagsisisi,” Liahona, Nob. 2011, 40.

Young woman praying

4. Takot na Masira ang Reputasyon

Isa ako sa “mabubuting bata.” Kung aaminin ko na nakagawa ako ng mga pagkakamali, tapos na ako—hindi na ako “mabuting bata.” Ano na ako? Sino na ako? Mas gugustuhin ko pang kalimutan na lang ito at magpatuloy na para bang walang nagbago.

Kailangan nating buong pagpapakumbabang aminin ang ating kasalanan sa harapan ng Diyos para magawa Niya “ang mahihinang bagay na maging malakas” para sa atin (Eter 12:27). At ang imaheng dapat ninyong sikaping taglayin sa inyong sarili ay yaong tingin sa inyo ng Ama sa Langit at ni Jesucristo: isang anak ng Diyos na may walang hanggan at banal na potensyal, bagama’t hindi perpekto, sa pamamagitan ng Kanilang tulong.

“Nakikita ng Diyos kung sino talaga tayo—at nakikita Niya na tayo ay karapat-dapat sagipin. …

“… Sa bawat hakbang ng pananampalataya sa landas ng pagkadisipulo, nagiging mga nilalang tayo na may walang-hanggang kaluwalhatian at galak na siyang nilayong kahinatnan natin.”

Pangulong Dieter F. Uchtdorf, Pangalawang Tagapayo sa Unang Panguluhan, “Papasanin Ka Niya sa Kanyang Balikat at Iuuwi,” Liahona, Mayo 2016, 104.

5. Takot na Mawala ang Iyong Personalidad

Kung susunod ako sa mga pamantayan ng Simbahan, tatalikuran ko ang ilan sa mga bagay na bumubuo sa aking pagkatao, gaya ng mga paborito kong pelikula, palabas sa TV, musika, at mga paraan ng pagpapahayag ng aking sarili. Magiging katulad na lang ako ng iba pang mga Mormon. Mas gugustuhin kong manatiling ganito.

Sa pamamagitan ng pagsisisi, mapapasaiyo ang Banal na Espiritu. At sa pamamagitan ng Espiritu, matutuklasan mo ang mas malalim, mas tapat, at mas mabuting pagkatao. Ibabatay ito sa maaari mong kahinatnan sa paningin ng Diyos sa halip na sa anumang naitayo sa mabubuway na saligan ng mga panlasa, preperensya, gawi, at pagiging kaiba.

“Mas gusto ni Satanas na manatili kayo sa inyong mga kasalanan sa halip na magtuon sa inyong banal na potensyal. … Huwag siyang pakinggan.”

Pangulong Dieter F. Uchtdorf, “Apat na Titulo,” Liahona, Mayo 2013, 58.

“Mas naiiba ang pagkatao ng mga taong mas banal.

“Ang kasalanan, sa kabilang dako, ay nagdudulot ng pagkakapare-pareho; inaalipin tayo nito sa nakalululong na mga hilig at rebeldeng mga damdamin.”

Elder Neal A. Maxwell (1926–2004) ng Korum ng Labindalawang Apostol, “Repentance,” Ensign, Nob. 1991, 30.

6. Takot na Mabigo

Maraming beses ko nang sinikap na magbago pero iyon pa rin ang nagagawa kong mga kamalian. Siguro naibigay na sa akin ang lahat ng pagkakataon. Siguro hindi na ako magbabago kailanman. Kung magsisikap pa akong minsan at mabibigo, hindi ba patunay na iyon?

Hindi madaling magsisi. Hindi ito nilayon na maging madali. Ngunit ito ang inyong landas tungo sa kagalakan, kaya patuloy na gawin ito. Walang hangganan ang taos-pusong pagsisisi (tingnan sa Mosias 26:30). Ibinigay ng Anak ng Diyos ang Kanyang Sarili bilang walang-katapusan at walang-hanggang sakripisyo upang magbayad-sala para sa ating mga kasalanan para mapatawad tayo kung tayo ay sasampalataya at magsisisi (tingnan sa Alma 34:9–16). Naintindihan mo ba iyon? Walang katapusan at walang hanggan. Saklaw ka pa rin ng Kanyang Pagbabayad-sala, dahil wala itong hangganan. Patuloy na magsikap.

“Kung minsan sa ating pagsisisi, sa araw-araw nating pagsisikap na maging higit na katulad ni Cristo, paulit-ulit tayong nagpupunyagi sa pare-parehong mga kahirapan. Tulad ng pag-akyat sa bundok na maraming puno, minsan ay hindi natin makita ang ating pagsulong hangga’t hindi tayo nakararating sa tuktok at lilingon mula sa matatarik na bangin. Huwag panghinaan ng loob. Kung kayo ay nagpupursigi at nagsisikap na magsisi, nasa proseso kayo ng pagsisisi.”

Elder Neil L. Andersen ng Korum ng Labindalawang Apostol, “Magsisi … Upang Mapagaling Ko Kayo,” Liahona, Nob. 2009, 41.

“Dahil sa kaloob na Pagbabayad-sala ni Jesucristo at sa lakas ng langit na tutulong sa atin, tayo ay maaaring umunlad, at ang kahanga-hanga sa ebanghelyo ay napagpapala tayo sa ating mga pagsisikap, kahit hindi tayo laging nagtatagumpay.”

Elder Jeffrey R. Holland ng Korum ng Labindalawang Apostol, “Bukas ay Gagawa ng mga Kababalaghan ang Panginoon sa Inyo,” Liahona, Mayo 2016, 125–126.

7. Takot na Magtagumpay

Ano kaya kung talagang kaya kong baguhin ang buhay ko? Baka mas malaki ang asahan sa akin. Siguro mas mabuting may kapintasan at maging karaniwan na lang ako para hindi sila umasa na tatanggap ako ng mas maraming responsibilidad.

Ang pagkatakot sa mas matataas na inaasahan o mas maraming responsibilidad ay maaaring magmula sa katamaran o pagkaligalig. Ngunit ang plano ng Ama sa Langit ay paghusay at pag-unlad. Tinanggap ninyo ang planong iyon bago ang buhay na ito; tanggapin ito ngayon sa pamamagitan ng pagiging masigasig at pagsampalataya. Sikaping makita ang uri ng tao na nais ng Ama sa Langit na kahinatnan ninyo at ang uri ng buhay na nais Niyang matamasa ninyo. Kung talagang makikita ninyo ang potensyal ninyong mararating, mahihirapan kayong paniwalaan man lang ito. Sa tulong ng Ama sa Langit at ng Tagapagligtas, abot-kamay ninyo ito.

“Responsibilidad nating umangat mula sa pagiging karaniwan lamang tungo sa pagiging mahusay, bumangon mula sa kabiguan tungo sa tagumpay. Ang tungkulin natin ay maabot ang pinakamahusay nating [mararating].”

Pangulong Thomas S. Monson, “The Will Within,” Ensign, Mayo 1987, 68.