Leʻo ʻo e Kau Māʻoniʻoni ʻi he Ngaahi ʻAho Kimui Ní
Naʻe ʻIloʻi Au Heʻeku Ongo Faiako ʻAʻahí
Naʻe ʻikai ke tokolahi e kāingalotu ʻo e Siasí ne u ʻiloʻi ʻi heʻeku nofo taimi nounou ʻi Sanitā Katalina ʻi Palāsila, ʻi he taimi naʻá ku hoko ai ko ha faʻē kei talavou ki ha foha taʻu uá. Ne u nofo ʻi ha feituʻu naʻe kamata ke tokolahi ka naʻe vāmamaʻo e nofó, ko ia ne ʻikai ke loko lahi e kaungāʻapi ne ofi mai ki hoku ʻapí.
ʻI ha ʻaho ʻe taha naʻá ku kamata ai ke u ongoʻi puke pea naʻe vave ʻeku ongoʻi ʻa e maha ʻa e vaí mei hoku sinó. Naʻe ʻikai ke u toe lava ʻo tuʻu hake ke tokangaʻi hoku fohá pe ʻalu ki he telefoni ofi taha ʻi he veʻehalá ke tā ki hoku husepānití. Naʻe kamata ke u fai ha lotu, ka ko e taimi kotoa pē naʻá ku feinga ai ke u tuʻu ki ʻolungá, naʻá ku ongoʻi vaivai ange.
Naʻe ʻikai fuoloa mei ai naʻe tukituki mai ʻeku ongo faiako ʻaʻahí ʻi he matapaá. Naʻá na ʻiloʻi ʻi he taimi pē ko iá kuo tataki kinaua ʻe he Tamai Hēvaní ke na kumi au. Naʻá na ʻomi ha faitoʻo, tokoni ki hono tokangaʻi hoku fohá, mo fufulu e peletí. Naʻá na talanoa mai leva ʻa ʻena lue fuoloa ke kumi hoku ʻapí pea naʻá na meimei lotofoʻi, ka naʻe ueʻi kinaua ʻe he Laumālié ke ʻoua te na tafokí.
ʻI he taimi naʻá na ʻalu aí, ne u ʻosi ongoʻi fiemālie. Kimuʻa peá na ʻalú, ne mau fai ha lotu.
Mahalo ʻoku ʻikai ke na ʻiloʻi ʻa e hanga ʻe heʻena sīpinga angaʻofá mo ueʻingofua ke fakafanongo mo tokanga ki he leʻo ʻo e Laumālié ʻo tokoniʻi mo lehilehiʻi fakalaumālie aú.