Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko hono Tokoniʻi ʻo Meita ke Toe Fokí
Naʻe uiuiʻi au ke u hoko ko ha tokoni palesiteni Fineʻofa ʻi homau uooti foʻoú. Lolotonga ʻemau ngaahi fakataha fakapalesitenisií, naʻa mau aleaʻi ha lisi ʻo e hingoa ʻo e kau Fineʻofa ʻi homau uōtí pea fakakaukauʻi ha founga ke tokoniʻi ai kinautolu mo honau fāmilí.
Naʻe ueʻi au ke u tokoni ki ha fefine ʻi he uōtí ko Meita. Ko ha mēmipa fuoloa pē ia ʻo e Siasí, ka ʻi ha faʻahinga ʻuhinga, kuo fuoloa taʻu ʻa e liʻaki lotu ʻa Meitá.
Naʻá ku fakatokangaʻi ʻoku palesiteni kaumātuʻa hono husepānití ka ko ʻena fānaú, ʻa ia ʻoku nau mēmipa pē, ne kau mo kinautolu ʻi he liʻaki lotú. Ko e Sāpate kotoa ʻoku ou sio maʻu pē ki hono husepānití ʻoku maʻulotu tokotaha pē.
Naʻá ku ongoʻi naʻe fie maʻu ke tokoniʻi ʻa e fāmili ko ʻení ke nau toe foki fakataha mai ki he lotú pea fiefia ʻi he ngaahi tāpuaki naʻe finangalo ʻe he ʻEikí maʻanautolú. Lolotonga e fakataha fakapalesitenisī hono hokó, ne u vahevahe ai ʻeku fakaʻamu ke tokoniʻi ʻa Meita ke foki mai ki he lotú. Naʻa mau palani ha ngaahi ʻekitivitī ʻe lava ke fakakau makehe mai ai iá, pea naʻa mau vaheʻi ha ngaahi ngāue ke ne fakahoko.
ʻI he taimi naʻa mau ʻaʻahi atu ai kiate iá, naʻá ne tali ʻa e ngaahi ngāue kotoa pe naʻe vaheʻi kiate iá pea naʻá ne fakahoko lelei ia. Naʻa mau fakatokangaʻi naʻá ne vēkeveke ke tatali ki ha taha ʻiate kimautolu ke ʻave ia ki he ngaahi ʻekitivitī ʻo e Fineʻofá.
ʻI heʻemau fokotuʻutuʻu ko ha kau palesitenisī ʻa e ngaahi hoa faiako ʻaʻahí, naʻá ku kole ki he niʻihi he fakatahá pe ʻe malava ke u hoa faiako ʻaʻahi au mo Meita. Naʻe ʻikai hala ha māhina ʻeku ʻalu mo Meita ʻo faiako ʻaʻahí. Ko e taimi kotoa pē ne ma ʻalu ai ke ʻaʻahi ki he kau fafiné ko ha faingamālie ia ke ma fepōtalanoaʻaki ai.
Ko e taimi kotoa pē naʻá ku fakaafeʻi ai ke haʻu ki he lotú, naʻá ne pehē mai, “Ko ʻeku toki ongoʻi pē ʻoku ou mateuteú, te u ʻalu leva.” Ne ʻikai mahino kiate au, ka naʻá ku fakaʻapaʻapaʻi ʻene filí. Naʻe faifai pē pea liliu ʻene talí ki he, “Mahalo pē te u ʻalu atu ʻi he Sāpaté.”
Ne u faʻa tatali fiefia kiate ia ʻi he Sāpate kotoa pē. Naʻe ʻikai ke ne teitei haʻu, ka ne u kei lotua pē ia. Ne fakafokifā ʻa e fie maʻu ke mau toe foki pē ki he feituʻu ne mau tomuʻa ʻi aí, pea naʻe ʻikai haʻaku faingamālie ke u lea fakamāvae ai kia Meita. ʻI he taimi ne mau hiki ai mei he uōtí, naʻe teʻeki pē ke ne foki mai ki he lotú.
ʻI ha ngaahi māhina mei ai naʻá ku fanongo kuo foki mai ʻa Meita ki he lotú pea naʻe hoko ia ko ha tokoni palesiteni ʻi he Fineʻofá.
Naʻe akonaki ʻe Palesiteni Kōtoni B. Hingikelī (1910–2008), “Mahalo he ʻikai te ke teitei ʻiloʻi ʻa e lelei te ke ala aʻusiá. ʻE tāpuekina ha moʻui ʻo ha taha kehe ʻi hoʻo ngāué” (“To the Women of the Church,” Liahona, Nov. 2003, 115).
Ko e taimi lahi ʻoku ʻikai ke maʻu e ola naʻe ʻamanaki ki aí pea ʻikai hoko mai ia ʻi he taimi naʻe fakatuʻamelie ki aí. ʻOua naʻa tuku ʻetau ngāué; ko e ngāue ʻeni ʻa e ʻEikí, pea ko ʻEne meʻangāue kitautolu kuo fili ke liliu ʻa e moʻui ʻo e kakai tokolahi.