Fesili & Tali

O loo ou tauivi e suesue tusitusiga paia. Aisea e matuai taua ai le suesueina o i latou?

Mai le autu o le Mutuale o lenei tausaga, ua e aoao pe faapefea ona “fetaomi atu i luma ma le tumau ia Keriso” (2 Nifae 31:20). Ua aoao mai e lenei mau o le fetaomi atu i luma e aofia ai le “taumamafa fiafia i le afioga a Keriso.” Aisea e taua tele ai lenei mea? O ni nai auala nei e fesoasoani ai le suesueina o tusitusiga paia ia i tatou ia fetaomi atu i luma:

• Sa aoao mai Peresitene Thomas S. Monson e faapea “afai e te suesueina ma le filiga ia tusitusiga paia, o le a faateleina lou mana e aloese ai mai faaosoosoga ma maua ai le taitaiga a le Agaga Paia i mea uma e te faia” (“Ia Avea ma Tagata Sili e Mafai ona Avea ai Oe,” Liahona, Me 2009, 68).

• E mafai ona e mauaina se molimau ma faamalosia lou faatuatua a o e suesue ma le agaga tatalo i tusitusiga paia. Ae maise lava i le suesueina o le Tusi a Mamona ma le mauaina o se molimau i lona moni aiai o le a fesoasoani e te iloa ai o Iesu o le Keriso, o Iosefa Samita o se perofeta, ma o Le Ekelasia a Iesu Keriso o le Au Paia o Aso e Gata Ai e moni. (E mafai ona e aoao atili i nei folafolaga i le faatomuaga i le Tusi a Mamona.)

• E mafai ona e mauaina musumusuga patino ma tali i au fesili e ala i tusitusiga paia. E pei ona fesootai atu le Atua ia te oe e ala i tusitusiga paia ma e ala i Lona Agaga, e mafai ona e mauaina le lototoa ma le malosi e fetaomi ai i luma i soo se faalavefau e feagai ma oe.

• Atonu o le mafuaaga aupito sili ona taua e suesue ai tusitusiga paia aua latou te aoao e uiga ia Iesu Keriso ma le auala e mafai ai ona e mulimuli i Ana faataitaiga ma aoaoga. O le ola i mataupu faavae e te faitau i ai o le a fesoasoani ia te oe ia avea atili e pei o le Faaola.

Tali i A’u Fesili

Afai e i ai sau fesili, ou te iloa e mafai ona ou liliu atu i tusitusiga paia e maua ai ni tali. O afioga na a le Alii, ma o Ana aoaoga faavae e le masuia lava. Ou te iloa e ui i faafeagai o loo fetaiai ma au, o loo i ai lava iina tusitusiga paia mo au faatasi ai ma tali. Latou te taliina foi fesili e uiga i aiaiga faavae o le Ekalesia e uiga i le tele o mataupu. Ou te iloa afai ou te faitau ma le faaeteete i tusitusiga paia, o le a fesoasoani ia te au ia maua le Agaga Paia e faatasi ma au, lea e fesoasoani ia te au e iloa le mea sao mai le mea sese.

Emily A., 17 tausaga, Uosigitone, ISA

E Avegofie Lau Amo

Sa amata ona ou lagona le mamafa o le avega i se tasi o tausaga aoga mai i faigata o le olaga. I le taimi o se tasi o nei aso faigata, sa ou tatalo ai ma faitau le Tusi a Mamona mo le 10 minute. A o ou faitau, sa ou lagona se mafanafana matagofie ua faatumulia lou loto. Sa ou lagona le alofaina, siitiaina, ma le fiafia e ui i au tofotofoga. Sa ou lagona se filemu matagofie ou te lei lagonaina muamua. Mai i lenei aafiaga, sa iu ina ou malamalama ai i le uiga o le fetalaiga a le Faaola ina ua Ia fetalai, “Ou te tuuina atu ia te outou le manuia, o lou manuia ou te avatu ai ia te outou” (Ioane 14:27). I nai vaiaso na sosoo ai, sa tele ni taimi sa ou oo ai i lenei aafiaga, ma sa musuia au ina ia faaauau pea lou olaga e ui i ou faigata.

Chloe K., 18 tausaga, Wisconsin, ISA

Mana e Sui Ai

I le taimi muamua, ou te lei maua moni lava se molimau i le Tusi a Mamona, ae ina ua ou tatalo ma le faamaoni mo le taitaiga mai le Agaga Paia, sa ou maua ni lagona sili atu e uiga i le Tusi a Mamona. Ua leva ona ou maua se manao ia iloa e moni le tusi, o lea sa ou amata ai ona ou faitau ma suesue i ai ma le agaga tatalo. O lea fuaitau i luga o lea fuaitau, ma lea mataupu i luga o lea mataupu, ou te maua ai faaaliga patino e moni le tusi (tagai 2 Nifae 28:30). Ou te fiafia i le Tusi a Mamona. Ou te teu nei aoaoga ou te mauaina a o ou suesue i ai. E i ai i le Tusi a Mamona se mana lea e mafai ona taitai i tatou ia sui mo le lelei sili atu.

Ariel Candawan T., 18 tausaga, Filipaina

O Le Alofa o le Atua

E ala i le mana, faataitaiga, ma aoaoga i tusitusiga paia, ua mafai ona ou mafaufau i le Agaga Paia. O loo i ai i tusitusiga paia se mana paia lea e mafai e le Atua ona taitai ma aoao i tatou. O lea, afai e te lagona le tuuatoatasi po o le tuuaunoaina, faitau ia tusitusiga paia. Ona manatua lea sa faasaoina faapitoa e lou Tama Faalelagi na tusitusiga paia mo oe ina ia mafai ona e iloa e alofa o Ia ia te oe.

Scott H., 19 tausaga, Wisconsin, ISA

Amio Lelei ma le Malamalama

Sa ou amata faitauina le Tusi a Mamona mo le taimi muamua ina ua avea au o se Ofagapi. Sa ou faitauina mai le amataga i le faaiuga ma mafaufau e leai seisi mea e toe tupu o se taunuuga. Ae sa ou sese. Sa foliga sa misi se mea i lou olaga. O lea sa tonu ai ia te au e toe faitau i ai, o le taimi lea ia sili atu ona gauai i ai. A o ou faia, sa faatumulia lou olaga i le malamalama sa taupulapula talu ona maea ona ou faitauina. Sa sili atu lou malamalama ma oo ai ina fiafia moni i ai. Faitau i ai i taimi uma, ma e te faamautinoa ai ia te oe lava se olaga o le amio lelei ma le malamalama.

Kellie M., 15 tausaga 15, Iuta, ISA

Faatoilaloina o Faaosoosoga

O le suesueina o tusitusiga paia e fesoasoani ia te au ia ola ai e tusa ma mataupu faavae o le talalelei i le aoga. Faatoa ou amata i le aoga maualalo, ma o loo i ai le tele o mea leaga ma faaosoosoga. A ou oo i se taimi faigata o le tetee atu i faaosoosoga, ou te taumafai e faitau i tala o tusitusiga paia e maua ai tali i ou faafitauli. E na te fesoasoani e aveese le faaosoosoga ma liliu atu i le talalelei.

Blake C., 12 tausaga 12, Idaho, ISA

Mana o Tusitusiga Paia

O lou taimi muamua lenei e taumafai ai e faitau le Tusi a Mamona. O au mataupu e sili ona fiafia ai o loo i le 2 Nifae 25–33. I le taimi nei, ua sili ona latou faamalosia au. O le pese a le Peraimeri “Mana o Tusitusiga Paia” e lei i ai se taimi ua sili atu ai ona moni mo au. Ou te molimau atu i le moni aiai o le Tusi a Mamona ma fautua malosi atu ia te outou ia suesue i ai i aso uma.

Sariah J., 13 tausaga, Arizona, ISA

O tali ua faamoemoe e mo se fesoasoani ma ni manatu ae e le o se faalauiloaga aloaia o aoaoga faavae o le Ekalesia.

O Se Puna o le Malamalama

Epikopo Gérald Caussé

“E ao lava ona tatou fiaaai ma fiafeinu i aso uma i le malamalama faaleagaga. O lea faiga patino e faavae i luga o le suesue, mafaufau loloto, ma le tatalo. O nisi taimi atonu e tofotofoina i tatou e mafaufau faapea, ‘Ou te le tau suesue i tusitusiga paia i le aso; Ua uma ona ou faitauina uma muamua.’ …

Ae o le talalelei o se punavai o le malamalama e le mafai lava ona mātūtū. E i ai pea lava se mea fou e aoao ma lagonaina i Aso Sa taitasi … i fuaiupu taitasi o tusitusiga paia.”

Bishop Gérald Caussé, Epikopo Pulefaamalumalu, “Pe O Ofoofogia Pea Ea ia te Oe?” Liahona, Me 2015, 99–100.

Fesili o Le a Sosoo Mai

“Sa ou tatalo mo se mea taua, ae ou te le iloa pe ua ou mauaina se tali. E faapefea ona ou iloaina?”

Auina mai lau tali ma, afai e manaomia, se ata manino lelei ae lei oo i le aso 15 o Setema, 2016, i le liahona.lds.org po o le i-meli i [e-mail].

Faamolemole ia aofia ai faamatalaga nei: (1) igoa atoa, (2) aso fanau, (3) uarota po o le paranesi, (4) siteki po o le itu, (5) lau faatagaga tusitusia, ma, afai e i lalo ifo o le 18 ou tausaga, o le faatagaga tusitusia a ou matua (e talia foi le i-meli) e lolomiina ai lau tali ma lou ata.

E ono faapupuuina tali mo le uumi po o le manino.