E Ala i le Suesue ma le Faatuatua

Saunia e Elder M. Russell Ballard

O Le Korama a Aposetolo e Toasefululua

Ata

Elder M. Russell Ballard

Tau ina ia outou maua le olioli ma le filemu lea e oo mai i le iloaina e ala atu i au aoaoga, ua e pai atu ai i se olaga ma siitiaina se tasi o fanau a le Tama Faalelagi i le malaga e toe foi atu ai i Lona afioaga.

Ata

teacher standing at a whiteboard

I se fonotaga faaleaoaoga mo Pulega Aoao, sa saunoa ai Peresitene Gordon B. Hinckley (1910-2008) e faatatau i le aoao atu o le aoaoga faavae a le Ekalesia: “E le tatau ona tatou matua faaeteete. E tatau ona tatou mataala ia aua nei o tatou se ese mai le [ala]. I a tatou taumafaiga ina ia tulaga ese, atonu tatou te aoao atu ai ni mea e matua le ogatusa lava ma aoaoga faavae autu o lenei Ekalesia toefuataiina a Iesu Keriso. … E tatau ona tatou matua mataalia. … E tatau ona avea i tatou ma tagata vaai i luga o le olo.”¹

Ao agai atu i luma ia aoaoga a le Ekalesia i le seneturi lona 21, ua tatau ia tatou faiaoga ona mafaufau i soo se suiga e manaomia ona faia i le ala latou te saunia ai e aoao atu, le ala o latou aoao atu ai, ma mea o latou aoao atu pe afai o le a latou fausia se faatuatua le maluelue i olaga o a tatou talavou faapelepele.

Ua mou atu na aso lea pe a fai mai ai e se tamaitiiti aoga se fesili faamaoni ae tali atu se faiaoga, “Aua le popole!” Ua mou atu na aso lea pe a tuu mai ai e se tamaitiiti aoga se popolega faamaoni ae tuu atu e se faiaoga lana molimau o se tali ua fuafuaina e taofia ai le faafitauli. Ua mou atu na aso lea e puipuia ai tamaiti aoga mai tagata o e osofaia le Ekalesia.

O le mea e lelei ai, ua tuuina mai e le Alii lenei fautuaga taua ma le faatapulaaina i faiaoga “Ma talu ai ona ua le maua e tagata uma le faatuatua, ia outou saili ma le filiga ma aoao i le tasi upu o le poto; ioe, ia outou saili mai totonu o tusi sili ona lelei upu o le poto; saili i le aoaoina, e ala lava lea i le suesue ma le faatuatua foi.” (MF&F 88:118)

E matuai faatatau lava lenei mea i lenei vaitaimi aua e le o a tatou tamaiti aoga uma ua maua le faatuatua lea e manaomia e fetaiai ai ma luitau o i luma atu atu ma ona o le toatele o i latou ua leva ona aafia e ala i le initoneti i malosiaga leaga o se lalolagi ua faateleina tulaga faalelalolagi lea e tetee atu ai i le faatuatua, aiga, ma tulaga faatonuina o le talalelei. Ua faateleina le oo atu o le initoneti i le salafa o le lalolagi i le toeitiiti lava i totonu o aiga uma ma i lima ma mafaufau o a tatou tamaiti aoga.

E mafai ona e fesoasoani i tamaiti aoga e ala i le aoaoina o i latou i le uiga o le tuufaatasia o le suesue ma le faatuatua ao latou aoao. Aoao atu i latou e ala i le faataitaia o lenei tomai ma faiga i totonu o le vasega.

Na matauina e Peresitene Harold B. Lee (1899–1973) faapea:

“Matou te faamanatu atu ia te outou o le mauaina o le poto e ala i le faatuatua e le o se tulaga faigofie e oo atu ai i le aoaoina. E manaomia ai taumafaiga malolosi ma le tauivi faifaipea e ala i le faatuatua. …

“O le aoaoina e ala i le faatuatua e le o se galuega mo se alii [po o se fafine] paie. Sa fai mai se tagata, o le mea moni, o lea ituaiga faiga e manaomia ai le gagauina o le agaga atoa, le valaau atu mai le loloto o le mafaufau o le tagata ma fesootai ma le Atua—e tatau ona fatuina ai le fesootaiga sao. Ona oo mai ai lea o le ‘malamalama e ala i le faatuatua.’”²

O le malamalama e ala i le faatuatua o le a fatuina ai se molimau mama, ma ua i ai i se molimau mama le mana e suia ai olaga, e pei ona faailoa mai i tala pupuu nei.

Tala e Tolu

Sa tuua e Fipe Kata lona aiga i Maine, ISA, ina ia faatasi ma le Au Paia i Ohaio i le vaitausaga o le 1830. Sa ia toe manatua: “Sa ofo au uo i le mea na ou faia, e pei foi o au, ae na i ai se mea na uunaia ai au. Sa tau le mafai ona ou onosaia le faanoanoa o lou tina i lou tuua o le aiga; ma pe ana leai le agaga i totonu semanu ou te faavaivai.”³

Na mulimuli Fipe i le Perofeta o Iosefa Samita ma faapotopoto faatasi ma le Au Paia i Ohaio ma mulimuli ane ai i Iuta, lea sa ia maliu ai o se Au Paia faamaoni o Aso e Gata Ai ma na tauamo tutusa le avega o se faletua o le Peresitene o le Ekalesia o Uilifoti Uitilafi (1807-98).

Ao avea ai ma se tamaitiiti aoga o le kolisi, sa filifili ai Marion G. Romney (1897-1988) e le mafai ona ia faia se misiona ona o tulaga tautupe a lona aiga. Ae, i se tasi mea na tupu, sa ia faalogo ai o saunoa Elder Melvin J. Ballard (1873-1939). O se faamatalaga mai le talaaga, “E lei iloaina e [Marion] o le a matua suia lava lona olaga, i se taimi puupuu lava.”

Na faaauau pea le tala: “Mo le taimi muamua lava … sa matua malamalama Marion i le i ai i lalo o se faatosinaga a se uunaiga. Na tumu lona loto i lagona maatiati maaleale. Na te lei lagonaina lava muamua … le ootia tele e pei ona ia lagona i le taimi nei, i le faalogo atu i upu a lenei Aposetolo sili ona fou. …

“… O le susulu o foliga a le Aposetolo ma le moni o [lana] molimau na faatumulia ai o ia ma se manao le mateteeina e alu i se misiona. … Sa iloa ua tatau ona tolopo ana fuafuaga mo le faalauteleina o lana aoga.”⁴

E lei umi, ae ua agai atu Marion i Ausetalia, lea na ia auauna atu ai ma le faamaoni. Mulimuli ane sa avea o ia ma se Aposetolo malosi ma se tasi o le Au Peresitene Sili.

O le tala mulimuli e mai ia Peresitene Boyd K. Packer (1924-2015), o le Peresitene o le Korama a le Toasefululua, e uiga i le aafiaga o se faiaoga matua ia Viliamu E. Berret. O le faiaoga, o se tagata liliu mai mai Nouei, e le lelei sona malamalamaaga i le gagana Peretania. E ui i tulaga tapulaa o le faiaoga, sa taua e Peresitene Packer, sa molimau Brother Berret e uiga i lana faiaoga, “Na mafai ona faamafanafanaina o matou lima i le afi o lona faatuatua.”⁵

Mulimuli ane, sa avea Viliamu ma taitai o seminare, inisitituti, ma aoga a le Ekalesia.

Mo Fipe, Marion, ma Viliamu, o le faalogo atu i se molimau mama atoatoa na avea ma mafuaaga na suia ai o latou olaga e faavavau. E moni foi lena mea mo i latou o e aoaoina. Ae, o le iloaina o tulaga moni o i ai le lalolagi i le taimi nei, atonu o le a le lava se molimau mama atoatoa. Sa mama atoatoa ma saoloto mai Fipe, Marion, ma Viliamu mai ponokalafi ma amioga faalelalolagi ao latou saofafai ai i vae o faifeautalai, faiaoga, ma taitai musuia. Sa faigofie lava ona uunaia e le Agaga o latou loto vaivai ma mama.

Ua matua tele lava se eseesega o le tala i lenei vaitaimi. O le toatele o a outou tamaiti aoga ua leva ona aafia i ponokalafi ma amioga faalelalolagi ao lei taitai oo atu i a outou vasega.

Sa na o se tupulaga ua mavae atu lea sa faatapulaa ai le faaaogaina e a tatou tagata talavou o faamatalaga e uiga i la tatou talafaasolopito, aoaoga faavae, ma faatinoga i anomea ia na lolomiina e le Ekalesia Sa fesootai ni nai tamaiti aoga ma ni faaliliuga e ese mai ai. O le toatele o a tatou tagata talavou na ola i ni olaga malupuipuia.

O a tatou mataupu aoaoina i lena taimi, e ui sa lelei, ae sa lei saunia tamaiti aoga mo lenei vaitaimi—o se vaitaimi e toetoe lava a maua faafuasei mea uma e uiga i le Ekalesia mai soo se tulaga e mafai ai. Ua tatou vaaia i le asō ia latou masini feaveai ia mea e foliga mai e le gata ina luitauina ai le faatuatua ae e uunaia ai foi le faatuatua. O le toatele o a tatou tagata talavou ua matua masani lava i le Google nai lo le talalelei, ua sili ona gauai atu i le Initoneti nai lo musumusuga, ma sili atu ona aafia i le Tusifoliga [Facebook] nai lo le faatuatua.

Ata

man typing on a computer

Atamai i Aoaoga Faavae

E tusa ai ma nei luitau, ua faamaonia ai talu ai nei e le au Faatonu o Aoga a le Ekalesia se fuafuaga taulamua i le seminare ua taua o le Atamai i Aoaoga Faavae. E faaauau mai ai i le mea ua uma ona faia i Mau Tauloto, o lenei fuafuaga taulamua e taulai atu i le atinaeina ma le faamalosia o le faatuatua o a tatou tamaiti aoga ia Iesu Keriso ma faamalosia i latou ma faateleina le tomai ia ola ma faaaoga le talalelei i o latou olaga. O le mafaufau ai i mau ma upu a perofeta, o le a latou aoao ai i le ala e faatino ai le faatuatua ia Keriso ina ia maua le malamalama faaleagaga ma le malamalamaaga e uiga i Lana talalelei. Ma o le a latou maua ni avanoa e aoao ai i le auala e faaaoga ai le aoaoga faavae a Keriso ma mataupu faavae o le talalelei i fesili ma luitau latou te faalogo ma vaai i ai i aso uma i a latou uo faapea i luga o ala faasalalau faaagafesootai.

O lenei fuafuaga taulamua e musuia ma ua talafeagai. O le a matagofie se faatosinaga i luga o a tatou tagata talavou. Peitai, o le manuia o le Atamai i Aoaoga Faave, ma isi polokalama uma o suesuega i le Ofisa o Aoga a le Ekalesia, o le a faalagolago le tulaga taua i luga o a tatou faiaoga.

I le feagai ai ma nei luitau, o a avanoa ma tiutetauave o i ai i faiaoga o le talalelei i le seneturi lona 21? E mautinoa lava e tatau ia te outou faiaoga ona alolofa i le Alii, Lana Ekalesia, ma au tamaiti aoga. E tatau foi ona e tuuina soo atu ma le faamaoni sau molimau mama atoatoa. E le gata foi i lea, e sili atu nai lo soo se taimi i la tatou talafaasolopito, e manaomia foi e au tamaiti aoga le faamanuiaina e ala i le aoaoina o anotusi ma talaaga o aoaoga faavae ma tala faaanamua i le suesue ma le faatuatua lea e o faatasi ma se molimau mama atoatoa ina ia mafai ona latou maua se liua faatagata matua ma tumau i le talalelei ma se talitonuga o le olaga atoa ia Iesu Keriso. O le liua faatagata matua ma tumau o lona uiga o le a latou “nonofo i totonu o le vaa ma pipiimau” i o latou olaga atoa.⁶

Ata

woman in Sunday School class

Ina ia mafai ona e malamalama i anotusi ma talaaga o aoaoga faavae ma tala faaanamua, e tatau ona e suesue mai i “tusi sili,” e pei aoao mai le Alii (MF&F 88:118). O “tusi sili” e aofia ai tusitusiga paia, o aoaoga a perofeta ma aposetolo o aso nei, ma tusi sili a le AAG o loo maua. E ala atu i au taumafaiga maelega ina ia aoao e ala i le suesue ma le faatuatua, o le a mafai ai ona e feosasoani i au tamaiti aoga e aoao ia tomai ma uiga e manaomia e iloa ai le va o faamatalaga faatuatuaina lea o le a siitiiina i latou i luga ma mea e le atoatoa le moni ma faaliliuga le sao o aoaoga faavae, talafaasolopito, ma faiga lea o le a aumaia i latou i lalo.

Aoao atu i latou e uiga i luitau e fetaiai ma i latou pe a latou faalagolago atu i le Initoneti mo tali o fesili e taua faavavau. Faamanatu atu ia i latou e lei fai mai Iakopo, “A e afai ua leai se poto i so outou, fai atu ia te ia e Google!” (tagai Iakopo 1:5).

O tagata atamamai e le faalagolago i le Initoneti e sue pe togafitia ai ni luitau po o ni faigata faalesoifua maloloina faalelagona, faalemafaufau, ma le faaletino, aemaise lava pe afai o aafia ai le soifua. Nai lo lena, latou te saili i tagata atamamai o le soifua maloloina, i latou ua aoaoina ma maua faailoga mai le au faatonu aloaia o le soifua maloloina ma le atunuu. E tusa lava pe ua oo i lena tulaga, e sue lava e tagata atamamai se manatu lona lua.

Afai o se ala talafeagai lena i le sailia o ni tali mo faafitauli faalesoifua maloloina faalelagona, faalemafaufau, ma faaletino, o le a sili atu la pe afai o loo aafia ai le ola e faavavau. Afai ua i ai i se mea le gafatia e lamatia ai lo tatou ola faaleagaga, a tatou mafutaga faaleaiga sili ona pele, ma lo tatou auai i le malo, ua tatau loa ona tatou saili ni taitai magafagafa lelei ma faamaoni e fesoasoani ia i tatou. Ma, pe afai e talafeagai ai, ua tatau ona tatou talosagaina i latou o i ai ni aoaoga faaakatemia, aafiaga, ma tomai faapitoa talafeagai mo se fesoasoani.

O le mea tonu lava lea ou te faia pe a ou manaomia se tali i ni au lava fesili lea e le mafai ona ou taliina e au lava ia. Ou te saili se fesoasoani mai i ou Uso i le Korama a le Toasefululua ma mai isi o i ai se tomai i vaega o le talafaasolopito ma aoaoga faavae o le Ekalesia.

O faiaoga o le talalelei e tatau ona avea ma uluai tagata—i fafo atu o aiga a le tamaitiiti aoga lava ia—e faalauiloa atu ni punaoa faatuatuaina i autu ia e ono le tele se iloa i ai pe feteenai foi ina ia mafai ai e tamaiti aoga ona fua i ai soo se mea latou te faalogo pe faitau i ai mulimuli ane i mea ia ua uma ona aoaoina ai i latou.

Puipuiga Faaleagaga

Tatou te tuu atu ni puipuiga faafomai i a tatou faifeautalai pele ao lei auina atu i latou i le misiona ina ia puipuia mai i latou mai faamai lea e mafai ona lamatia ai i latou. I se tulaga lava faapena, ao lei auina atu a tatou tamaiti aoga i le lalolagi, puipui i latou e ala i le tuuina atu o ni faamalamalamaga moni, magafagafa, ma sao e uiga i aoaoga faavae o le talalelei, tusitusiga paia, la tatou talafaasolopito, ma autu ia e tele ina sese le faauigaga.

O le tauina atu o nisi o ia autu lea e le iloa tele pe feteenai, ou te tautala atu ai e uiga i le autaunonofo, maa talifaaliga, faamatalaga eseese o le Uluai Faaaliga, o le faagasologa o le faaliliuga o le Tusi a Mamona po o le Tusi a Aperaamo, tulaga i itupa, ituaiga o tagata ma le perisitua, ma se Tina Faalelagi.

O taumafaiga ina ia puipui o tatou tagata talavou o le a matele ina pau atu i faiaoga o le Ofisa o Aoga a le Ekalesia. O le mafaufau ai faapea, saili se taimi e mafaufau ai e uiga i ou avanoa ma ou tiutetauave.

Ua silafia lelei lava e taitai o le Ekalesia le tapulaa o le mauaina o faamatalaga, ma o loo matou faia ni taumafaiga uigaese e saunia ai ia talaaga ma malamalamaaga sao e uiga i aoaoga o le Toefuataiga. O se faataitaiga lelei lava o lenei taumafaiga o faamatalaga tusia o Autu o le Talalelei e 11 i le LDS.org⁷ lea ua saunia ni faamalamalamaga paleni ma faatuatuaina o mea moni mo mataupu o loo feteenai ma lē masani ai e faatatau i le Ekalesia.

E taua tele lou iloaina o anotusi o nei faamatalaga tusia. Afai e i ai soo sau fesili e uiga i ai, faamolemole fesili ane i se tasi o le na suesue ma malamalama i ai. I nisi upu, “saili i le aoaoina, e ala lava lea i le suesue ma le faatuatua foi” (MF&F 88:118) ao e matua malamalama lelei i anotusi o nei faamatalaga tusia.

Ua tatau foi ona e faamasani i le uepisaite o le Joseph Smith Papers,⁸ o le vaega o talafaasolopito o le Ekalesia i le LDS.org, ma nisi punaoa mai tagata atamamai faamaoni a le AAG.

O le taumafaiga mo le faamaninoina o le talalelei ma le puipuiga faaleagaga e ala atu i se suesuega magafagafa lelei o aoaoga faavae ma le talafaasolopito, faatasi ai ma se molimau mumu, o se vaifofo sili lea ua tatou maua e fesoasoani ai i tamaiti aoga ina ia aloese ma taulimaina ni fesili, masalosaloga, po o faafitauli o le faatuatua atonu o fetaiai ma i latou i lenei vaitau o faamatalaga.

Ao totogiina e outou faiaoga se tau ina ia malamalama lelei atili i lo tatou talafaasolopito, aoaoga faavae, ma faatinoga—ia sili atu nai lo le tulaga o e i ai i le taimi nei—o le a tou saunia e tuuina atu ni tali magafagafa lelei, faaeteete, ma musuia i fesili a au tamaiti aoga.

Ata

youth Sunday School class

O se tasi o auala e iloa ai po o a fesili o i ai a au tamaiti aoga o le faalogo atu lea ma le totoa ia i latou. O faiaoga lelei uma e tatau ona avea ma tagata faalogo lelei. E le gata i le faalogologo atu i au tamaiti aoga, uunaia i latou i le vasega pe faaliloilo e fai atu ni fesili ia te oe e uiga i soo se autu. O se tasi o fesili sili ona taua atonu e fesili atu ai au tamaiti aoga o le “Aisea?” A fesili atu ma se manao faamaoni ina ia malamalama, o le a avea le “Aisea?” ma se fesili maoae. O le fesili lea e mananao faifeautalai e fesili mai ai a latou tagata sailiili. Aisea ua tatou i ai iinei? Aisea e tutupu ai mea leaga i tagata lelei? Aisea e tatau ai ona tatou tatalo? Aisea e tatau ai ona tatou mulimuli ia Keriso? E masani lava o fesili “aisea” e taitai atu ai i musumusuga ma faaaliga. O le iloaina o le ata o le faaolataga a lo tatou Tama Faalelagi o le a fesoasoani ia te oe i le taliina o le tele o fesili “aisea”.

O se tasi nei o faamatalaga faaiu e uiga i le taliina o fesili. E taua tele le aoao atu o a tatou tamaiti aoga e ui ua saunia e le talalelei le tele, a le o lena o le tele naua, o tali i fesili sili ona taua o le olaga, o nisi o fesili e le mafai ona taliina i le olaga faaletino ona e le lava faamatalaga e manaomia mo se tali talafeagai. E pei ona tatou aoaoina i le Iakopo: “Faauta, ua silisili ma ofoofogia galuega a le Alii. Ua lē masuesueina lava le loloto o ana mealilo; ma e le mafai e le tagata ona iloa ona ala uma. Ma e leai se tasi na te iloa ona ala vagana ai ua faaalia ia te ia” (Iakopo 4:8; tagai foi MF&F 101:32–34).

O Se Upu Lapatai

Se‘i ou tuuina atu se upu lapatai. Faamolemole ia iloa atonu o le a e talitonu, e pei o le toatele o tamaiti aoga, o oe o se tagata atamai tele i tusitusiga paia, aoaoga faavae, ma le talafaasolopito. Sa faaalia mai e se sailiiliga lata mai faapea “o le tele o le mafaufau o tagata faapea ua latou malamalama i se autu, o le tele foi lea o lo latou faamaonia o se malamalamaaga i tala atu o mea ua latou iloa, e oo lava i le tulaga o le faafoliga e malamalama … ma le faaseseina o faamatalaga.”⁹

O le faapea ua tatau ona iloaina mea uma, o se faaosoosoga ua tatau ona aloese mai ai a tatou faiaoga. E leai se mea e leaga ai le faapea atu, “ou te le iloaina.” Ae, o le taimi lava e te fai atu ai lena tala, ua ia te oe se tiutetauave e saili ai ni tali sili ona lelei i ni fesili lelei o tuuina mai e au tamaiti aoga (tagai MF&F 101:32–34).

Ao e aoao atu au tamaiti aoga ma tali atu ia latou fesili, ou te fia lapatai atu ia te oe ia aua nei tuuina atu ni tala pepelo o le faatupuina o le faatuatua pe le faavaeina po o ni malamalamaaga tuai ma ni faamatalaga e uiga ia tatou aoaoga faavae ma faatinoga mai le taimi ua tuanai. O se tulaga atamai tele le avea ma se faataitaiga masani o le suesue i upu a perofeta ma aposetolo soifua; ia ogatasi pea ma mataupu, aiaiga faavae, ma faamatalaga o i ai nei a le Ekalesia e ala atu i le mormonnewsroom.org ma le LDS.org; ma saili atu i galuega a tagata popoto aloaia, magafagafa lelei, ma faamaoni a le AAG ina ia mautinoa ai e te le o aoaoina atu ni mea e le sao, tuai, pe le talafeagai.

O suesuega a tagata tusitala e uiga i le iloaina o mea uma ia na matauina faapea “o se tulaga o le faapea ua iloa mea uma, aemaise lava i vaaiga a tagata atamamai lava ia, … e ono faalotovaivai ai tagata taitoatasi mai le aotauina o i latou lava i na lava eria lea latou te mafaufau ua latou atamamai ai.”¹⁰

E faaopoopo atu ai i le avea ma ni tagata aoao o le olaga atoa, e tatau foi ona e faia na mea i lou lava olaga lea e faataga ai le Agaga Paia ia galue i totonu o oe. O ia mea e aofia ai le tatalo faamaoni i aso taitasi, anapogi faamaoni, suesuega faisoo ma le mafaufau loloto i tusitusiga paia ma upu a perofeta soifua, avea o le aso Sapati ma se aso fiafia, ai ma inu i le faamanatuga ma le agaga lotomaualalo ma manatua pea le Faaola, tapuai i le malumalu pe a mafai ai, ma le, mea mulimuli, aapa atu i e le tagolima, matitiva, ma ua tuua na o i latou—i latou uma o latalata ane ma i le salafa o le lalolagi!

Ina ia faataunuuina ma le talafeagai ou avanoa ma tiutetauave, e tatau ona e faataitaia mea o e aoao atua!

Ia e lototoa e ala i le sailia o fautuaga ma faasaoga mai ia i latou e te faatuatuaina: o se toalua, taitai perisitua, po o ni supavaisa. Fesili atu ia i latou po o fea se vaega e mafai ona e faaleleia ai i lou tulaga faalesoo. Aloese mai soo se mea e tuliesea ai le Agaga

E le gata i lea, sei ou fautua atu ina ia faia sou faatalanoaga ma oe lava ia i se taimi ma iloilo le 2 Nifae 26:29–32, Alema 5:14–30, ma le Mataupu Faavae ma Feagaiga 121:33–46? O le faia o lenei mea o le a fesoasoani e faailoa atu ai ia te oe ia ituaiga o faaosoosoga e ono fetaiai ma i tatou uma. Afai e i ai se mea e tatau ona suia i lou olaga, ona mafaufau lea ia faaleleia.

Aloese mai le faaosoosoga o le fesiligia o faamoemoega o au uo faigaluega. Nai lo lena, tagai loloto lava i lou lava loto ma saili i ou lava manaoga ma faamoemoega. Na o le pau lena o le tulaga e mafai ai e le Faaola ona suia lou loto ma faaogatusa ou manaoga ma faamoemoega faatasi ma Ia.

Ua tatau ona iloa, malamalama, opogi, ma auai le augatupulaga faiae i le ata o le faaolataga a le Atua. O le malamalama i le fuafuaga o le a avatua ia i latou se malamalamaaga paia lea latou te vaai ai ia i latou lava o ni atalii ma afafine o le Atua, lea e saunia se tioata ia malamalama ai i le toetoe lava o aoaoga faavae uma, faiga, ma aiaiga faavae o le Ekalesia.

E tatau i faiaoga o le talalelei i lenei vaitaimi ona talia le avanoa ma le tiutetauave e aoao atu ia tagata talavou o le seneturi lona 21 i mataupu faavae sao e uiga i le fuafuaga, e aofia ai le aoaoga faavae paia o le faaipoipoga ma le matafaioi o le aiga e pei ona faamanino mai i le folafolaga i le aiga.¹¹

O Le Aoaoga Faavae o le Faaipoipoga e Faavavau

O le aoaoga faavae o le faaipoipoga ma le aiga e faavavau o se vaega taua o le fuafuaga o le fiafia a le Atua. E aofia o tatou aiga ua faamauina i le malumalu o se vaega o le aiga e faavavau a le Tama Faalelagi lava ia i le malo selesitila. Talu ai e faatatau tonu lava lenei aoaoga faavae i Lona lava aiga ma i Ana lava fanau agaga, ua aoaoina i tatou i le Kenese “na ia faia o i laua o le tane ma le fafine” ma na Ia poloaiina Tama Atamu ma Tina Eva ina ia “fanafanau ia, ma ia uluola, ma ia tumu ai le lalolagi” (tagai Kenese 1:27–28).

E i ai se tala faapea o le fuafuaga o le fiafia e amata ma faaiuina i le aiga. Ioe, na amata le aiga i le muai olaga, lea sa tatou nonofo faatasi ai o ni tagata o le aiga a o tatou matua faalelagi. Ma i le iuga, o tautinoga ma mafutaga alofa faaleaiga e le gata o le a faaauau pea ona i ai ae o le a faateleina e ala i le faagasologa o le foafoaina (tagai MF&F 131:1–4; 132:19).

O le tulaga lea e fesootai uma ai—lea e faamoemoe i ai le fuafuaga a le Atua ma lo tatou taunuuga e faavavau ma e faataamilo ai mea uma lava—o lo tatou Faaola lea, o Iesu Keriso. O Lana taulaga togiola ua mafai ai mea uma lava, e aofia ai ae le o faatapulaa ai i se aiga ma se faaipoipoga alofa, popole ma faavavau.

Ata

Portrait of Jesus Christ

Ua aoao mai i tatou e le Alii e le mafai e se tagata e toatasi, e tusa lava po o le a le tulaga o lona amiotonu, ona mauaina mea uma ua i ai i le Tama Faalelagi mo Ana fanau. O se tagata e toatasi ua na o le afa lea o le fua, e le mafai ona aumau i le tikeri sili ona maualuga o le malo selesitila (tagai 1 Korinito 11:11; MF&F 131:1–4).

E tatau ona malamalamama au tamaiti aoga o le faamoemoega o le olaga faaletino ina ia avea atili ai faapei o le Atua e ala i le mauaina o ni tino faaletino, faaaoga le faitalia, ma le amataina o ni matafaioi lea sa i ai muamua i na o matua faalelagi—matafaioi o le tane, ava, ma matua.

Ua faamautinoa mai e perofeta faapea o i latou uma o e ua agavaa ma ua faalagolago atu ia Iesu Keriso ae e lei mafai ona faamauina i se soa pe mauaina ni fanau i lenei olaga o le a maua na avanoa i le lalolagi a sau.

Aoao atu ia tagata talavou faapea i le Ekalesia a le Alii e tele naua avanoa mo tagata uma e tapuai ai, auauna atu, ma tuputupu ae ai faatasi o ni uso ma tuafafine i le talalelei. Faamanatu atu ia i latou mea sa aoao mai e Liae—e mafai ona aoteleina ia sini ma faamoemoega a le Atua mo Ana fanau uma faapea: “Na pau Atamu ina ia i ai tagata; ma ua i ai tagata, ina ia latou maua le olioli” (2 Nifae 2:25).

E finagalo le Tama Faalelagi ina ia tatou talia Lana faauigaga o le faaipoipoga ma usiusitai i Ana poloaiga ina “ia fanafanau ia, ma ia uluola” (Kenese 1:28)—e le gata ina ia faataunuu ai Lana fuafuaga ae ia maua ai le olioli lea na mamanuina ai Lana fuafuaga e tuuina atu i Ona atalii ma afafine.

I le avea ai ma faiaoga o le Ekalesia, fesoasoani atu ia tatou talavou ina ia maua se malamalamaaga manino e uiga i le fuafuaga o le fiafia a le Atua lea e oo moni mai ai lava le olioli i Ana fanau. Fesoasoani atu ia i latou ia iloa, talia, ma auai, ma puipuia. Mai ou aafiaga e 40 tausaga o se Pulega Aoao, ou te popole e uiga i le aofaiga toatele o a tatou tagata o le Ekalesia, talavou ma matutua, o e e le malamalama i le fuafuaga mo o latou lava taunuuga e faavavau ma paia.

O lea, au uo faiaoga e, e tatau ona tatou vaavaai atu mo ma talisapaia nei avanoa ina ia faamatala atu, aoaoga faavae ma faaleagaga, ma aisea tatou te talitonu ai o le malamalama i le fuafuaga sili o le fiafia a le Atua o le a taliina ai le tele o fesili “aisea” lea atonu e fesiligia ai i tatou. O le faaalia o tatou talitonuga i se olaga o le muai olaga lea na tatou nonofo ai o ni fanau agaga o se Tama Falelagi ma se Tina Faalelagi ua mafai ai ona tatou faamatalaina le mafuaaga ua foafoaina ai lenei lalolagi. O se faamoemoega taua se tasi o le olaga faaletino o le mafai lea ona tatou toe fausia lena aafiaga faaleaiga e i tatou lava, i le taimi la lenei o ni matua nai lo le na o ni fanau. Ia faapelepele i lou malamalamaaga autu e uiga i le aoaoga faavae ma le faamoemoega o le fuafuaga a lo tatou Tama Faalelagi mo lo tatou fiafia e faavavau. Ma ia faaauau pea ona tatou aoaoina atu.

Faaiuga

Ina ia faaiuina ai la ma ia otooto atu ai matautu sa ou faasoa atu ia te outou o le:

Aoao atu tamaiti e tuufaatasia le aoaoina e ala i le suesue ma le faatuatua ma se molimau mama atoatoa.
Aoao atu tamaiti aoga ia nonofo i totonu o le vaa ma pipiimau!”
Aoao atu tamaiti aoga ia pulea lelei a latou masini feaveai ma taulai atu i le fesootai atili ma le Agaga Paia nai lo Initoneti.
Puipui tamaiti aoga i upu moni o le ata o le faaolataga o loo maua i le talalelei a Iesu Keriso.
Manatua o le “Aisea?” e mafai ona avea ma se fesili maoae lea e taitai atu ai i le malamalama i le talalelei.
Ia atamai i anotusi o faamatalaga tusia o Autu o le Talalelei.
Aua le soona folafola atu ma aua le fefe e fai atu, “Ou te le iloa.”
Ia avea ma tagata aoao mo le olaga atoa.
Saili se fautuaga ma se faasaoga mai ia i latou e te faatuatuaina.
Mafaufau e fai se faatalanoaga patino i lea taimi ma lea taimi e iloilo ai au sauniuniga faaleagaga, lou maelega, ma lou tulaga lelei.
Aoao atu o le fuafuaga o le fiafia e amata ma faaiu i le aiga. Ia i ai pea i le mafaufau le ata o le faaolataga i taimi uma.
Aoao atu o le faaipoipoga ma le aiga e aumaia le olioli tumau.

Manatua, o le tuufaatasia o le aoaoina e ala i le suesue, faatuatua, ma le molimau mama atoatoa e aumaia le liua moni ma umi ma tumau. Mai mea uma lava, o le malosi o le faatuatua i le Togiola a le Alii o Iesu Keriso e taua lea mo lo tatou malosiaga ma le tuputupu ae faaleagaga.

Tau ina ia tou maua le olioli ma le filemu lea e oo mai i le iloaina e ala atu i au aoaoga, ua e pai atu i se olaga ma siitiaina se tasi o fanau a le Tama Faalelagi i le malaga e toe foi atu i Lona afioaga.