O Se Kerisimasi Ese
E alala le tusitala i Colorado, ISA.
O le a faigata le le vaai ia Tina, ae e mafai pea ona lelei le Kerisimasi.
“Remember him, as you picture Christmas this year” (Children’s Songbook, 50).
Sa toeitiiti oo i le Kerisimasi, peitai sa tau le fiafia Diego. O le Kerisimasi muamua lenei talu ona tatala le faaipoipoga a ona matua. Ma sa lagona le leai o se mea o toe lelei. O ia foi ma lona uso, o Samuelu, o le a le vaai ia Tina i lenei Kerisimasi.
“Ua ese mea uma,” o le tala a Diego ia Tama.
“Ua ou iloa.” Sa foliga faanoanoa mata o Tama. “O nisi taimi e suia ni mea a o lei oo ina lelei tele.” Sa filemu o ia mo sina taimi, ona ataata lea. “O le a ese le Kerisimasi i lenei tausaga, ae e le faapea ai o le a tatou le maua ni taimi e fiafia ai. O le a tatou faamanatu pea le soifua mai o le Faaola.”
Sa luelue le ulu o Diego. O le a faigata le le vaai ia Tina, ae atonu e mafai ona lelei pea le Kerisimasi, e pei o le tala a Tama. Sa manao Diego e fesoasoani e faia lenei Kerisimasi o se Kerisimasi fiafia.
Sa ia alu i lona potu e mafaufau ai. O nisi taimi mo le Kerisimasi sa latou faia se galuega auauna atu o se aiga. O le a le mea e mafai ona latou faia i lenei tausaga?
Sa autilo solo Diego i totonu o lona potu. Sa ia vaaia se taavale meataalo e le o toe taalo ai o ia. Sa ia pikiina i luga ma faataavili ia pau. Sa lelei lava. Atonu e mafai e ia ma Tama ma Samuelu ona ave nisi o meataalo i tamaiti e le o i ai ni meataalo! Sa ia maua ni nai isi meataalo ma tuu i latou i se ato faatasi ai ma le taavale.
Ina ua uma ona faia e Diego, sa ia ave le ato i le potu a Samuelu. “E mafai ona ou fesoasoani e faamama lou potu?” sa ia fesili ai. “O se mea faatei mo Tama.”
Sa autilo i luga Samuelu mai lana ata sa ia tusiaina. “Ioe.”
Sa galulue faatasi tama e faamama le potu a Samuelu. Sa tau atu e Diego ia te ia le fuafuaga. Sa la maua ni nai meataalo sa le toe taalo ai Samuelu ma faaopoopo i latou i le ato.
Ina ua uma ona la faia, sa laua saesae le ato i lalo. “Tama,” o le tala lea a Diego, “sa ma maua ni meataalo ma te le o toe taaalo ai. E mafai ona tatou aveina i tamaiti e leai ni meataalo?”
Sa foliga tei ma fiafia ia Tama. “O se manatu lelei lena! Tatou o e ave i fale mo tagata e leai ni aiga i lenei aoauli.”
Sa manaia le asiasi atu i le nofoaga. Sa taaalo Diego ma Samuelu ma nisi o tamaiti ao talanoa atu Tama i tagata matutua.
I le agai atu i le fale, sa fesili ai Tama pe o le a seisi mea e mafai ona latou faia ia taua ai lenei Kerisimasi.
“Sa tatou faia i le Kerisimasi ua tea ni meaalofa mo a tatou tuaoi,” o le tala lea a Diego.
“E mafai ona tatou faia lena mea,” fai mai ai Tama. “Tatou o e faatau mai ni mea e fai ai ni kuki.”
Sa manatu Samuelu o ni kuki o se manatu lelei.
Sa fesoasoani tama ia Tama e faatau ni mea e manaomia mo le kuki i le faleoloa. Sa latou faia i le fale le paluga ma tipiina ni foliga o fetu ma laau. Sa tuu e Diego ma Samuelu kulimu lanu samasama ma le lanu meamata i kuki. Ona la ave lea o tamai taga o kuki i o latou tuaoi.
I le faaiuga o le aso, sa vaivai Diego ae sa fiafia. Sa faia faatasi e ia ma Samuelu ma Tama ni mea o se aiga ma sa fesoasoani i isi. Na sa’o lava Tama. Sa ese le Kerisimasi, ae sa manaia pea.