Savali a Faiaoga Asiasi
O Le Olioli Faaleaiga E Maua i le Amiotonu
Ia suesue ma le agaga tatalo lenei savali ma saili ia iloa mea e faasoa atu. O le a faapefea ona faateleina e le malamalama i le “O Le Aiga: O Se Folafolaga i le Lalolagi” lou faatuatua i le Atua ma manuia ai i latou e te vaavaaia e ala i asiasiga a faiaoga asiasi? Mo nisi faamatalaga, alu i le reliefsociety.lds.org.
O le Atua “na faavaeina ia aiga ia tatou maua ai le fiafia, e fesoasoani ia i tatou e aoaoina mataupu faavae sa’o i se siosiomaga alofa, ma ia sauniuni ai i tatou mo le ola e faavavau.”1 O le talanoa e uiga i le “fuafuaga tele o le fiafia” a le Atua (Alema 42:8), ua saunoa mai ai Peresitene Russell M. Nelson, Peresitene o le Korama a Aposetolo e Toasefululua: “Ua tautino mai i Lana fuafuaga e faapea ua i ai alii ma tamaitai ‘ina ia latou maua le olioli’ [2 Nifae 2:25]. E maua lena olioli pe a tatou filifili e ola e tusa ai ma le fuafuaga e faavavau a le Atua.”2
O se aiga e faatotonugalemu ia Keriso e mauaina avanoa silisili mo le manuia. Ua faamatalaina e Elder Richard G. Scott (1928–2015) o le Korama a Aposetolo e Toasefululua o se nofoaga “lea e aoaoina ai le talalelei, tausia ai feagaiga, ma ola lauusiusi ai le alofa,” lea e mafai ai e aiga ona ola ai “i ni olaga usiusitai” ma “mausali le mauaa i le talalelei a Iesu Keriso.”3
Na saunoa mai Peresitene Henry B. Eyring, Fesoasoani Muamua i le Au Peresitene Sili: “E mafai ona tatou filifili o le a tatou faia mea uma tatou te mafaia ina ia aumaia mana o le lagi i totonu o o [tatou] aiga.” Ma o le a tatou faalauiloa atu le alofa, auaunaga, usiusitai, ma le fiafia i o tatou aiga e ala i le “faalogo a [o tatou fanau] i le afioga a le Atua ona faatino lea i le faatuatua. Afai latou te faia, o le a suia o latou natura i se auala o le a maua ai le fiafia o loo latou sailia.”4
Aiga e Totonugalemu ia Keriso
Ua tatou maua ni faataitaiga o aiga e faatotonugalemu ia Keriso i tusitusiga paia. I le mavae ai o le maliu o lona tama, o Liae, sa ave ese mai e Nifae lona aiga ma isi tagata o e na talitonu i lapataiga ma faaaliga a le Atua ma e na usiusitai i upu a Nifae mai le nuu o sa Lamana. I lenei nofoaga fou, e mafai ai e sa Nifae ona tausi faamasinoga, tulafono, ma poloaiga a le Atua i mea uma, e tusa ma le tulafono a Mose (tagai 2 Nifae 5:6–10). Peitai, e oo lava i totonu o sa Nifae, na iu ina amata ona le usiusitai isi tagata.
Ma ao mafai ai e o tatou aiga ona o ese i nisi taimi mai le amiotonu e pei ona faia e sa Nifae, ua saunoa mai Elder Scott, o se aiga e totonugalemu ia Keriso e “tuuina mai [pea] le faamautinoaga aupito sili mo le filemu ma le sulufaiga i totonu o o tatou aiga.” O le a tele pea luitau po o lototiga e i ai, ae e tusa lava pe o le totonugalemu o faigata, e mafai ona tatou olioli i le filemu i le loto ma le fiafia loloto.”5
Mau Faaopoopo
Faatuatua, Aiga, Toomaga