O Le A Le Mea ua Tatou Iloa e uiga i le Olaga pe a mavae le Oti?
“Afai e oti le tagata, e toe ola mai ea o ia?” Ioe! Ona a lea?
I le talafaasolopito atoa, e le mafaitaulia tagata ua fesili i le fesili na tuuina mai e Iopu: “Afai e oti le tagata, e toe ola mai ea o ia?” (Iopu 14:14). Ina ia alaga “Ioe!” e tali atu ai i sea fesili, o le avanoa maoae lea o i latou ua i ai se molimau ia Iesu Keriso ma Lona Toetu.
Ae o le toatele o i latou o loo siomia i tatou e ola i lenei olaga e “aunoa foi ma le Atua i le lalolagi” (Efeso 2:12) ma e tatau ona iloatino le va o mea moni ma talitonuga eseese e faatatau i le oti. Mo se tasi, ua i ai le faamaoniga o mea latou te matauina patino, po o le “mea moni le manaia” e faapea, o le oti e aoao ma maoti—latou te lei vaai lava i se tasi o toe foi mai ai. O loo i ai foi lipoti salalau solo o aafiaga na toetoe a oo ai i le oti, ma le maeu o le laugatasia o ia [aafiaga]. Ma e i ai foi le mea moni e faapea, o aganuu a tagata i le lalolagi atoa, na i ai lava i taimi uma se ituaiga o manatu e uiga i le olaga i tua atu o le oti, o le isi tulaga laugatasia o loo tauanau mai se faamalamalamaga.
Ae o le faamautinoaga o o tatou olaga e le muta i le oti, e sau mai i le Atua, o le ua faaalia mai, mai lava i le amataga e ala i le anoano o molimau, e aofia ai perofeta, aposetolo, ma le mea aupito taua, o le Agaga Paia.
Mai le Amataga
O le ata o le faaolataga ma aoaoina muamua lava i lenei lalolagi ia Atamu ma Eva, o tatou uluai matua. Sa laua aoao e uiga i le talalelei a Iesu Keriso ma le ala e toe foi atu ai i le afioaga o le Tama Faalelagi—ma sa laua malamalama o le toe foi atu o lona uiga sa tatou i ai muamua faatasi ma Ia. O lea la, mai le amataga, sa manino lelei Atamu ma Eva o lenei olaga, e le na o le pau lea o le mea e i ai. Sa laua iloa—ma aoaoina a laua fanau—ona o le Togiola a Iesu Keriso, o le a latou toetutu pe a mavae lenei olaga ma, afai sa latou usiusitai, e maua le ola e faavavau (tagai Mose 5:10–12).
Ua fautua mai e manatu faalelalolagi e faapea, o le talitonuga i se olaga i tua atu o le oti o se taunuuga e tasi lava o se manaoga aoao faalemafaufau. Ae nai lo o lena, o le manatu lautele e uiga i le olaga pe a mavae le oti, e faatusa i se ituaiga o manatuga faaletupuaga pe aotele (pe afai e le o se manatuaga i le muai olaga) o le mea sa faaali mai i le amataga ona tuufaasolo ai lea mai lea tupulaga i lea tupulaga. O le mea sa saunoa mai ai Peresitene Iosefa F. Samita (1838–1918) e uiga i nisi o faiga masani a tapuaiga e faatatau foi i talitonuga masani e pei o le olaga pe a mavae le oti: “E mautinoa lava o le malamalama e uiga i [ai] … sa aveina atu e le fanau a Atamu i atunuu uma, ma faaauau atu ai … ia Noa … ia i latou o e na suitulaga ia te ia, ma salalau atu ai i malo ma atunuu uma” (“Discourse,” Deseret News, Fep. 19, 1873, 36).
O le mea lena, o le manatu e uiga i se olaga i tua atu o le olaga lenei, ua matuai aoao lava ona o lona afuaga e taimi tutusa lava ma le afuaga o le tagata soifua lava ia.
O Upumoni Manino ma Taua
I le avea ai ma tagata o le Au Paia o Aso e Gata Ai, e mafai ona tatou fesoasoani e aumai le faamoemoe i olaga o i latou o e ola e aunoa ma le Atua i le lalolagi, e ala i le tuuina atu ma le mautinoa o la tatou molimau i le mea moni o lo tatou i ai: o le oti e le o le mutaaga lea. Ma le isi, e mafai ona tatou talia le tele o fesili e uiga i le olaga pe a mavae le oti ona o upumoni manino ma taua o le talalelei toefuataiina ua faapea ona faaalia mai. O ni tali pupuu nei i ni nai fesili faapena.
O le a le mea e tupu ia i tatou i le taimi tonu tatou te oti ai?
I le taimi o le oti, e tuueseese ai o tatou agaga mai o tatou tino ona ulu atu lea i le lalolagi o agaga (tagai Iakopo 2:26; Alema 40:11).
E faapei o tatou agaga?
O o tatou agaga e foliga lava e pei ona sa i ai i le olaga i le muai olaga: o tino tagata ua atoatoa le tupu i se tagata matua (tagai Eteru 3:16; Aoaoga a Peresitene o le Ekalesia: Iosefa F. Samita [1998], 132–33). A mavae le oti, o le a i ai i o tatou agaga ia lava uiga faaalia, mea e fiafia ai, ma manao, ia sa ia i tatou i le taimi na tatou oti faaletino ai i le lalolagi (tagai Alema 34:34).
O le a le agaga?
O le agaga o se ituaiga o mea e tino mai, ae “ua sili atu ona lelei pe mamā” (MF&F 131:7).
E faapei le lalolagi o agaga?
E lua tulaga po o vaega autu e i ai i agaga i le lalolagi o agaga: o le parataiso ma le falepuipui o agaga. O agaga amiotonu e o i le parataiso, o se “nofoaga e malolo ai, o se nofoaga o le filemu o le a latou malolo ai mai i o latou faalavelave uma ma mai le popole uma, ma le faanoanoa” (Alema 40:12). O agaga o tagata o e e lei taliaina lava le talalelei a Iesu Keriso, e faapea e i ai i le falepuipui o agaga (tagai 1 Peteru 3:18–20). E mafai lava ona latou filifili i le lelei po o le leaga, ma talia pe teena le talalelei. E mafai e agaga o loo i le parataiso ona talai atu le talalelei ia i latou (tagai MFF 138). O i latou o e ua umi se taimi o tuueseeseina o latou agaga ma tino, ua manatu i lenei tuueseesega o “se pologa” (MF&F 45:17; 138:50).
O le a le lagi?
O le lagi ua tele lava ina malamalama i ai, o le nofoaga lea o loo afio ai le Atua, ma o le nofoaga e iu ina mafai ona nonofo ai tagata amiotonu. I lenei tulaga, e ese mai ai i le parataiso o le lalolagi o agaga.
O le a lena mea o le seoli?
I tusitusiga paia, o seoli e mafai ona faatatau i se mea e tasi pe lua: (1) “o le nofoaga le tumau i le lalolagi o agaga mo i latou o e na le usiusitai i le olaga faaletino” po o le (2) “o le nofoaga tumau lea o e lē faaolaina i le togiola a Iesu Keriso” (Taiala i Tusitusiga Paia, “Seoli,” scriptures.lds.org). I se faauigaga faalauaitele, o le tulaga faaleagaga e tigaina ai i latou o e na teenaina le talalelei. Na aoao mai Iosefa Samita: “O le tiga matautia o agaga ua o ese atu … o le iloa lea ua latou le mauaina le mamalu ua fiafia ai isi ma sa ono mafai ona o latou fiafia ai foi, ma o i latou lava e tuua’ia” (Aoaoga a Peresitene o le Ekalesia: Iosefa Samita [2007], 238).
O le a le toetu?
O le toetu o le toe faatasia o le agaga ma le tino i se tulaga atoatoa, e le toe oti (tagai Alema 11:43).
O ai o le a toetu?
O tagata uma o e na ola i le lalolagi o le a toetutu (tagai 1 Korinito 15:22; Alema 11:44).
O le a le taimi o le a tatou toetutu ai?
E eseese taimi o le a toetutu ai tagata? O le Toetu o Iesu Keriso sa faailogaina i le Uluai Toetu, po o le toetutu o e amiotonu. O nisi tagata amiotonu ua uma ona toetutu talu mai lena taimi. A mavae le Afio Mai Faalua o Iesu Keriso, o le a toatele isi tagata amiotonu o le a toetutu. I le taimi o le Meleniuma, o le a toetutu ai isi tagata lelei. A mavae le Meleniuma, o le a faapea ona toetutu ai tagata amioleaga. (Tagai MF&F 76:32–112; 88:97–101.)
E faapei ia tino toetutu?
O tino toetutu o aano ma ivi (tagai Luka 24:39), e le toe oo i ai le oti (tagai Alema 11:45), atoatoa (tagai Alema 11:43), faamamaluina ma matagofie. “E leai se mea e sili atu le matagofie e vaavaai i ai nai lo o se alii po o se tamaitai toetu” (Peresitene Lorenzo Snow [1814–1901], The Teachings of Lorenzo Snow, ed. Clyde J. Williams [1996], 99).
O le a le mea e tupu pe a mavae lo tatou toetutu?
A uma ona toetutu tagata uma ma faaiuina le Meleniuma, o le a aumai i tatou uma i le afioaga o le Atua ina ia faamasinoina e tusa ai ma a tatou upu, galuega, mafaufauga, ma manao (tagai Faaaliga 20:12; Alema 12:14; MF&F 137:9). O Iesu Keriso o le a avea ma o tatou Faamasino (tagai Ioane 5:22, 27–29; Roma 14:10).
O le a le mea e tupu pe a uma le Faamasinoga Mulimuli?
A uma le Faamasinoga Mulimuli, o le a tatou maua se tasi o nei taui e faavavau:
Malo selesitila: o le maota o le Tama Faalelagi, Iesu Keriso, ma i latou uma o e ua agavaa mo le ola e faavavau e ala i le faia ma le tausia o feagaiga uma o le talalelei (tagai MF&F 76:50–70).
Malo teresitila: o le maota o na tagata lelei o e sa lei talia le talalelei a Iesu Keriso ae na mauaina i le lalolagi o agaga, o e sa lei totoa i le olaga i le molimau ia Iesu Keriso (tagai MF&F 76:71–80).
Malo telesitila: o le maota o i latou o e sa amioleaga ma sa lei talia le talalelei a Iesu Keriso, o e sa lei toetutu seiiloga e uma le Meleniuma (tagai MF&F 76:81–89)
Faasalaga e le gata: o le tulaga faaiu o atalii o le malaia, faapea foi ma le tiapolo ma ana agelu (tagai MF&F 76:31–49).
O a mea o le a fai e tagata i le malo selesitila?
O i latou o e o le a mautofi i le tikeri aupito maualuga o le malo selesitila o le a faaeaina, o lona uiga, o le a latou maua le ola e faavavau, avea e pei o lo tatou Tama Faalelagi, ma maua mea uma o loo i ai i le Tama. O le uiga o le avea e pei o le Tama Faalelagi, o le maua o Ona uiga auaumama o le atoatoa, e aofia ai le alofa ma le auauna atu.1 O lona uiga foi, o le galulue faatasi i Lana galuega ma le mamalu, o le “ia aumaia le tino ola pea ma le ola faavavau o le tagata” (Mose 1:39). O le faaeaga e aofia ai le faamauina i le faaipoipoga mo le faavavau, nonofo i ni aiga e faavavau, ma maua ni fanau agaga e faavavau. (Tagai MF&F 76:59, 62; 130:2; 132:19–23.)
O a mea a isi tagata e fai i isi malo?
O i latou i isi malo o le a avea ma agelu, “o agelu ia o ni auauna galulue, e auauna atu ia te i latou o e ua agavaa mo se fuataga mamao tele atu, ma silisili atu naʼuā, ma faavavau, o le mamalu” (MF&F 132:16). O le a latou le faaipoipo pe maua ni fanau agaga (tagai MF&F 131:1–4; 132:16–17).