O Le Mea Tatou Te Talitonu I Ai
Tatou te Talitonu i le Mulimuli i le Perofeta
E pei o le uluai Ekalesia lea na faatuina e Iesu Keriso i le taimi o Lana galuega i le tino, o le Ekalesia i aso nei ua “atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea” (Efeso 2:20). O loo i ai a tatou Aposetolo e toasefululua, faapea foi ma le Peresitene o le Ekalesia ma ona fesoasoani, o perofeta, tagatavaai, ma talifaaaliga. Ua valaauina i latou e molimau ia Iesu Keriso ma aoao atu Lana talalelei i le lalolagi atoa.
E filifili e le Faaola Ana perofeta ma saunia i latou e ala i le tele o aafiaga e taitai ai le Ekalesia. Pe a talanoa tagata o le Ekalesia e uiga i le perofeta, o loo latou faatatau atu i le Peresitene o le Ekalesia, le tagata e toatasi i luga o le fogaeleele na te maua faaaliga mo le Ekalesia atoa.
Ona o le Peresitene o le Ekalesia e saunoa mo le Alii (tagai MF&F 1:38), e le o se mea atamai ai le ilo ma filifili na o ni vaega o ana fautuaga lea tatou te mananao e mulimuli ai. Nai lo o lena, tatou te faia ana fautuaga ma valaaulia e pei na tatou mauaina tuusao mai ia Iesu Keriso, “i le onosai ma le faatuatua atoa” (MF&F 21:5).
Ao tatou filifili e faalogo ma mulimuli i le perofeta ma isi aposetolo, e faamanuiaina i tatou i a tatou taumafaiga ia avea e pei o Iesu Keriso, ma e puipuia i tatou mai le le saogalemu ma taufaasese a le lalolagi (tagai Efeso 4:11–14).
Mo se faataitaiga, tatou te maua le saogalemu faaleagaga i se lalolagi e fesuisuiai ai amioga lelei ma tulaga faatauaina e ala i le ola i tulaga le fesuisuiai e aoao mai e perofeta ma aposetolo. Tatou te maua foi le puipuiga faaletino i le mulimuli i fautuaga faaperofeta e aloese mai aitalafu, faataatia ese se tupe teu, ma teu meaai.
Ao tuu atu e le Peresitene o le Ekalesia ma le Au Aposetolo o latou ola i le galuega a le Alii—e femalagaai i le lalolagi e molimau atu ia Keriso, aoao le Au Paia, ma vaai le taitaiga o le Ekalesia i le lalolagi atoa—Na te lagolago ma faamanuia i latou ma o latou aiga. Tatou te lagolago ia i latou ao tatou tatalo mo i latou, usitai i a latou fautuaga, ma saili ia maua le Agaga Paia e faamautu ia i tatou upumoni latou te aoao mai.
Ao tatou lagolago i le perofeta ma aposetolo, tatou te maua se molimau ia i latou o ni auauna a le Atua. E ui lava e le atoatoa i latou, ae o le a le faataga i latou e le Tama Faalelagi e taitai ese i tatou (tagai Teuteronome 18:18–20).
Ata na tusia e J. Beth Jepson