O Tatou Aiga, O Tatou Auaiga
O Le Faataitaiga Alofa a Lou Tama
Sa faaali mai ia te au e lou tama le ala e alofa ai i lau fanau taase.
Agavale: ata tusi © iStock/Thinkstock; taumatau: ata na saunia e Del Benson
Na ou auai i le Ekalesia ina ua ou talia se valaaulia mai ni uo se toalua e auai atu i le seminare. Sa lagolago i taimi uma e ou matua au faaiuga ou te papatiso, auauna atu i se misiona, ma faaipoipo i le malumalu. Ae peitai, ou te manatua, le tiga na ou lagonaina (ma ou te matea na oo foi i ou matua) i le iloaina sa latou faatalitali ma le agalelei i le potu faatalitali o le Malumalu a Provo Iuta, ao faamauina i maua ma lou toalua.
Sa ma maua mulimuli ane se fanau e toafa, ma ou te manatua le olioli i le iloaina o i latou taitoatasi na faamauina ia i maua aua sa fananau i latou i le feagaiga. O le ma fanau, o le fanau muamua lea o fanau [a ou matua], ma e ui lava sa lei auai ou matua ma nai ou tei i le Ekalesia, ae sa latou latalata lava i le ma fanau taitoatasi. Mo le tele o tausaga sa matou nonofo latalata ai i le tasi ma le isi, ma sa mafai ona vaai ou matua i le ma fanau o auai i taaloga a le aoga ma le autalavou. Sa laua auai i papatisoga a le ma fanau taitoatasi.
Ae peitai, e oo ane i le taimi na avea ai le ma fanau ma ni tupulaga talavou, ua siitia atu lou aiga i se isi setete ona o lau galuega. Ae e oo lava foi i na tausaga, sa faalatalata mai pea ou matua i le ma fanau e ala i asiasiga ma tusi i taimi uma.
Ao faasolo ina faamatuatagata ou matua, sa amata ona maua lou tina i le mai o le galo o mea [Alesaima]. Sa naunau lou tama e auauna faamaoni e tausi o ia, seia oo lava i le taimi na manaomia ai e lona tulaga se tausiga faasoloatoa. Na oo lava foi i nei tausaga na taua mulimuli, sa aapa mai lava lou tama ia te au e ala i telefoni ma tusi faalevaiaso, ma i nisi o taimi, i aso uma. Sa vavalalata i taimi uma le matou mafutaga ma ou matua, ae i le aluga o le 10 tausaga mulimuli o le soifua o lou tama, sa faapitoa ai lava ona ma felatai. Sa ou iloa ai foi i le taimi lena, sa tutusa lava lona faamanuiaina i le latalata atu i nai ou tei e toatolu i le ala lava lea e tasi—e ui lava i eseesega i mea e fiafia ai ma tapuaiga sa matou filifilia ao matou faasolo matutua uma.
Agavale: ata tusi © iStock/Thinkstock; taumatau: ata na saunia e Del Benson
O ou matua ma lou aiga sa nonofo i talafatai faafeagai o le Iunaite Setete i le aluga o na tausaga mulimuli, ma sa la faia ni asiasiga se lua e sopoia ai le atunuu, e ui lava ina sa tuga le Alesaima o lou tina, lea sa matuai faigata ai ia Tama ona fesoasoani ia te ia i se malaga umi i le vaalele.
I lenei lava foi taimi, sa taitoatasi ai lau fanau uma ma filifili e le toe o i le lotu. E toalua na aveesea mulimuli ane o laua igoa mai faamaumauga o le Ekalesia. O lenei mea sa avea moni ma tofotofoga i o maua olaga ma lou toalua. Ma e ui lava sa le o ia o se tagata o le Au Paia o Aso e Gata Ai, ae sa tiga lou tama ma sa fenumiai foi i filifiliga a le ma fanau. O ia o se tagata lotu e le iloa lava e nisi, ma sa auai ma i matou i na tausaga e tatalo mo i latou.
I le 2005 sa maliu ai lou tama ina ua gasegase i le kanesa, ma sa maliu lou tina i le tolu tausaga mulimuli ane ai. Sa ma olioli ma lou toalua i le fai ma o laua sui i le tuuina atu o sauniga o le malumalu ina ua maliliu i laua.
Ua loa o ou tatalo ia malamalama i le auala sili ona lelei e talanoa atu ai i lau fanau i le taimi nei ona ua tagata matutua, o nisi ma o latou lava taitoalua ma fanau, ia e leai se tasi e AAG. E faalelagona ona ma latalata atu i le ma fanau uma e toafa, ma ma te faafetai ona e masani ona latou aapa mai i le alofa ia i maua.
Sa iu ina ou maua se tali manino lelei lava i le auala e ao ona ou ola ai, e masalo mo lou ola atoa o totoe, e faatatau i nei fanau ua matutua. Sa manaomia ona ou faia le mea sa fai e lou tama ia te au. E ui lava i le eseese o olaga sa matou ola ai ma le eseese o manatu faalelotu sa i ai ia i matou, sa naunau lava lou tama e faalatalata atili mai ia te au o se tama ma o se uo, ao ou oo i le tiga o le vaai atu i lau fanau ua filifilia ni ituaiga olaga ma ni talitonuga e ese mai nai lo au. Sa ou iloaina e ao ona ou mulimuli i le faataitaiga a lou tama, o le sa aoaoina au i auala e faia ai fanau e ese se tapuaiga: alofa atoatoa ia i latou, e pei o le a faia ai e le Faaola.