Kubanako, Nanokawaki, & ana Baire te Atua
E maeka te tia korokaraki i Albania.
N tain te kabanea ni kanganga n au taneiai ni maiu, I namakinna bwa te Tama are i Karawa bon raou inanon au tai ni mwananga.
Kamatata n te Korotamnei iroun David Curtis
Bon te moaningabong n 2008 ngke e kautai tinau bwa n na nako n te reirei. I bon rangin ni kukurei n te moaningabong anne, ma I aki ataia ae na riki bwa te kabanea ni kananokawaki ni bongin maiu ke te kabanea n tai ma ngaia. I aki kabanei au kiraati n te bong anne bukina bwa te aine ae raoraon ara koraki e anaai ao n tuangai bwa e a tia tinau ni bakabureia. Ai tibwa te 12 au ririki.
I iango, “N na kanga ni maeka n akea tinau?” Bon raoraou ae moan te tamaroa.
I tang inanon namwakaina aika mwaiti. I aki kan nako n reirei ibukina bwa ataei ake tabeman a taraai n ae kaokoro ao n nanokawaki ibukiu. Akea au iango bwa tera ae I riai ni karaoia, I ti ataia ae N na kakorakoraai ibukiia ni kabane.
N te bong teuana, nimaua ke onoua te namwakaina imwiin maten tinau, I mena n au ruu n tii ngai irarikin te winto, n tang, ni kataia n ataia bwa bukin tera ngkai I roko ikai. N te tai ae waekoa I ongo te bwanaa n au iango: “Ngkoe natiu te aine; N na aki karikiko bwa ko na rawawata.” I ataia bwa bon te Atua. Ma e kamimiai ibukina bwa I aki manga Onimakinna, riki ngkai I taku bwa te Atua ae anaa tinau mai irou E ngae ngke I aki ataia bwa tera ae E nanonna, I namakina te kamanoaki.
Teniua te namwakaina imwiina I nako Rome, Italy, ni kawara ai tamau. E teimatoa n tuangai taekan te aro aei ae kainna. Te tabati teuana, e kairai. I aki toki n uringnga ngke I nakonako ni kaitara mataroan te umwantabu n te moantai ao n namakina ana tangira te Tama are i Karawa ngke I rin. Ti tebo ma namakinan ae I mena ni mweengau.
I moanna n na nako n taromauri ni katoa Tabati ao nakon waaki ni kakukurei inanon te wiiki. I tatangiria ni mena ibuakoia kairake n te Ekaretia. A kakukureiai. A iango ao a kakoauai bwaai aika ti tebo ma ae I karaoia. Ngkanne, imwiin teniua te namwakaina, e bane au motirawa n te tiamwa ao I a riai n oki nako Albania.
Ngke I oki nako abau, I tuanga tamau te namakin are I a tia ni karekea ao te kukurei are I karekea n tainako. E aki tangiria. E tuangai ae e aki kariaia bwa N na teimatoa n nako n taromauri ke n reirei taekana. Ngaia ae N na taotaona nanou inanon teniua te ririki ni karokoa e koro 18 au ririki. N te tai anne I a kona n iango i bon irou ao ni bwabetitoaki.
Inanon te tai aei ao I rangi ni kakabwaiaki irouia aomata aika mwaiti aika a na tuangai te bwai ae a tia n reiakinna ni katoa Tabati n te taromauri. Temanna mai ibuakoia aomata aikanne bon Stephanie. E maeka i Italy ngke e kaaina te aro ai tamau, ma e a tia n okira mweengana n te United States. Ai tamau aei e taku bwa e na rangin n raoiroi ibukira bwa ti na koroboki imarenara, ngaia ae I karinna bwa raoraou n te Facebook.
E ngae ngke ti tuai ni kaitibo mai imwaina, N na teimatoa ni kukurei irouna ibukin buokau ni karikirakean au onimaki ao n reirei riki taekan ana euangkerio Iesu Kristo. E koroboki nakoiu e kuri katoa Tabati ao n tuangai bwaai ni kabane ake e reiakin n te taromauri ao ni kaekai au titiraki. Bon raoraou ae moan te tamaroa nakoiu.
N tokina, imwiin ririki n taotaonaki n nano, I bwabetitoaki ti uoua te bong imwiin koron au ka 18 n ririki. N te tai ae waekoa ao N na tibwauaia ma tinau te kukurei ae I namakinna n te bong anne, ibukina bwa N na bwabetitoaki ibukina. I ataia ae E na rangin ni kamoamoa n te maiu are I a tia n rineia.
I namakinna ae I kakabwaiakaki iroun te Tama are i Karawa ibukina bwa e mena ma ngai n au tai ni mwananga ni kawai aika mwaiti. N na ti tataninga ao n taotaonaki n nano ibukina bwa iai Ana baire ibukiu. Boni ngaia ae anganai te korakora n rinanoi kakaewenako aika I kaitara ma ngaai. E mena ikekei n tainako, ni buokai ni kukurei riki.