Reirein te Euangkerio
Te Nakoanibonga: Te Angka ni Koaua
Iroun Unimwaane L. Tom Perry (1922–2015)
Man te Kooram n Abotoro n te Tengaun ma Uoman
Te rongorongo aei e katauraoaki mairoun Unimwaane L. Tom Perry ni Meei 28, 2015, uoua te bong imwaain matena, bwa e na taekinaki nakoia kairake ake iai irouia te nakoanibonga.
Te kabanea ni korakora inanon maiu bon ana nakoanibonga te Atua. I kakoaua bwa bon te angka naba ni koaua ibukimi ataeinimwaane. Ma karekean te mwaaka anne inanom maium, ko riai n ataia ao ni kabongana.
Taneiai aika Moantaai ma te Nakoanibonga
I ikawairake n taabo aika kamweengaraoi i Logan, Utah. Akea au raraoma inanon ataeiu ibukin te amwarake ke te kamanoaki ke te reirei. Ma tao ibukin ae e bebete te maiu, I kainnanoa te bwai teuana ae N na taua ni kamatoa are e na riki bwa te angka ibukiu.
Irou te angka anne bon ana nakoanibonga te Atua. I mena n te tabo ae aki taneiai te aba iai ngke I ikawairake. Ngke e weteaki tamau bwa e na riki bwa te bitiobi ngke teuana au ririki, boni ngaia au bitiobi ibukin 19 te ririki. Ana kairiiri ni karo ao n tamnei bon te buoka ae koro arona nakoiu.
I taku bwa anne raoi bukina ngkai I ingainga ni kan karekea te Nakoanibonga ae te Aaron n au ka 12 n ririki. I uringa te bong ae kakawaki are I namakina iai bain tamau iaon atuu ngke e katabuai. Imwiin anne, I rikirake rinanon nakoa n te Nakoanibonga ae te Aaron ao ni butimwaai nakoa ake I rang kakukureiaki iai.
Kabutan te toa e rang kakawaki nakoiu. Ko kona n nooria aomata ni kabanei nanoia n ongotaeka nakon te Uea ao ni kawakin Ana tua ngkai a butimwaea kanikinaean rabwatana ao raraana.
Rikirake n Ataakin te Nakoanibonga
Inanon waakin te tai, I angabeeba man te kauarinan, ao imwiina teuana te ririki n te kuura, I weteaki bwa N na nako ni mitinare. I kukurei ni katoa miniti mai iai ao n tangiriia toau ni mitinare. Iai temanna toau ni mitinare are e riki bwa korakorau. I reiakina ae bati mairouna ngke ti kakoroa nanon tabera.
Ibukina bwa e boo te buaka n te aba, ngke I oki man au mitinare I kaaina ana Tanganibuaka te United States. Ngke e toki te buaka, I okira te kuura, ni mareaki, ao ni karikirakea au utu. Ni waaki nako rinanon rinanin mwakuri aika bibitaki e a kairai nakon taabo aika mwaiti ni kabuta te United States, ike I reiakinaki iai ae bati ngkai I beku n nakoa aika mwaiti n te nakoanibonga. N te kabane ao I a mwaing nako Boston, Massachusetts, ike I beku bwa te beretitenti n te titeiki. Bon mai ikanne are I a weteaki bwa N na riki bwa te tia ibuobuoki nakon te Tengaun ma Uoman ao ngkanne, imwiin 17 te namwakaina, nakon te Kooram n Abotoro n te Tengaun ma Uoman.
Reirei aika Reiakinaki n nakoau ae te Abotoro
Tera ae I a tia n reiakinna ngkai I kaaina te Kooram n Abotoro n te Tengaun ma Uoman?
I reiakinaki bwa iai te kairi, te angka, ao te kamanoaki n te nakoanibonga.
Iai te nakoanibonga n taainako. Imwaain rokon Atam nakon te aonaaba, iai Irouna te nakoanibonga. Ngkai a uamaenako kanoan Atam nako aon te aonaaba ma te nakoanibonga, e bon riai barongaakin te nakoanibonga ao aron kabonganakina. Te Uea e baronga te nakoanibonga man wetean Aberaam bwa e na tararua ana utu aika iai irouia te nakoanibonga. Te bootaki aei e reitinako iaan Itaaka ao Iakobwa, are e bitaki arana imwiina nakon Iteraera.
Bubua n ririki imwiina, tibun Iteraera a kuneiia bwa a mena inanon te tautoronaki. Te Uea e kamwananga Mote bwa e na kainaomataiia, ma ngke e kamaiuiia Moote, a kaotiia bwa aomata aika tuai n tauraoi ni karekea te Nakoanibonga ae te Merekitereka. Ngaia are te Atua e anganiia te Nakoanibonga ae te Aaron ni karokoa ana tai te Tia Kamaiu.
I kunea bwa e kakukurei te bwai are e moan karaoia te Tia Kamaiu ngke E moana Ana mwakuri. E baronga te Nakoanibonga ae te Merekitereka. E weteiia Abotoro ao n reireiniia tuua ao waakin te nakoanibonga. E wetea Betero bwa e na riki bwa te tinia Abotoro, ni katea rinanin te kariaia n Ana Ekaretia. N te tai anne ao ngkai, bon Iesu Kristo are E rineia Ana tinia Abotoro bwa e na tararua te Ekaretia, ao bon te Tia Kamaiu are e kairia n ana beku n te nakoanibonga.
Ngaia are te nakoanibonga iai rinanna ae baireaki mairoun te Atua ao te Tia Kamaiu rinanon te tinia Abotoro nakoia tabeman Abotoro ao ni waaki nako nakoia naake iai irouia te nakoanibonga n te Ekaretia. Kiingin te kariaiakaki a anganaki Abotoro, ao ni karokoa are a mena taian kiing akanne iaon te aba, ti na kairaki mairoun te Uea n Ti Ngaia. Te kairiiri ae tabu aei e kamanoira ao ni kakoaua nakoira bwa te Ekaretia e na aki kona ni bitaki man te koaua. E na teimatoa n titebo ibukina e aki kairaki mairoun te aomata iaon te aba. E bon kairaki mairoun te Uea.
Reiakina Tuan te Nakoanibonga
Te kabanea ni kakawaki n reirei ae I karekea ibukimi kairake n ataeinimwaane bon kamatebwaian tuan te nakoanibonga, n ota n te mwaaka are ko karekea ni kamwakuran am nakoanibonga, ao n reiakinna bwa e kanga ni kakabwaia maium ao maiua tabeman.
I berita bwa ngkana ko reiakina tuan te nakoanibonga ao ni kakoroa nanon am beku n te nakoanibonga, e na riki te nakoanibonga bwa te angka ae matoatoa are e na kamanoko raoi n te maiu n tamnei ao ni uota te kimwareirei nakoim ae moan te bati. Riiki bwa kaain te kooram n te nakoanibonga ni koaua. Kakawariia raoraom ao ni kairiia nakon am kooram. Karika te aro n itaritari inanon am kooram are e na riki bwa aan maium ae teimatoa.