Ni Karokoa Ae Ti A Manga Kaitiboaki
Ukoukoran Bwaintangira n Tamnei
Iroun Beretitenti George Q. Cannon (1827–1901)
Moan Kauntira n te Moan Beretitentii
Man Te Latter-day Saints Millennial Star, Eberi 23, 1894, 258–61; kaboraoan kabonganaan mwaake ao moan manin taeka.
Iraman mai ibuakomi aika a ukoukori bwaintangira aikai ae e a tia te Atua ni beritani bwa e na kaoti?
Rawetamnei iroun © iStock/Thinkstock
Mwane ao aine n tatabemania nako n Ana Ekaretia Kristo a kona ni karekei ana bwaintangira Tamnein te Atua n tibwauaki nakoia ni kaineti ma aia onimaki ao ana kantaninga te Atua. …
Iraman mai ibuakomi aika a ukoukori bwaintangira aikai ae e a tia te Atua ni beritani bwa e na kaoti? Iraman mai ibuakomi, ngkana ko bobaraki imatan Tamam are i Karawa n am kamronron n utu ke n am tabo ae raba, ni bubuti ibukin bwaintangira aikai bwa a na kaotaki nakoimi? Iraman mai ibuakomi aika a titirakina te Tama, n aran Iesu Kristo, ni Kaotia nakoimi rinanon mwaaka ao bwaintangira aikai? Ke ko waaki nako n te bong teuana ma teuana, n aron te mataroa ae kakamwakuri iaon ana intiti, n akea te namakin iaon taekan te bwai anne, n aki kamanena te onimaki ke tera, n anaa nanom bwa ko na bwabetitoiko ao n riki bwa kaain te Ekaretia ao ni motirawa ikekei, n iango bwa e mano kamaiuam ibukina bwa ko a tia ni bwabetitoaki? …
… I ataia bwa iai nanon te Atua ni kamaiua te aoraki, bwa E tangiria n anga te bwaintangira ni kinai tamnei, te bwaintangira n te wanawana, n te atatai ao n taetae ni burabeti, ao bwaintangira tabeua aika a kainnanoaki. Ngkana iai mai ibuakora aika aki kororaoi, bon tabera bwa ti na tataro ibukin te bwaintangira are e na karikira bwa ti na kororaoi. Iai kabwakau? I onrake iai. Tera tabeu? N tataro nakon te Atua bwa e na anganai bwaintangira are e na kaeti kabwakau aikai. Ngkana te aomata ngai ae I unun, bon tabeu bwa n na tataro ibukin te tangira, bwa e taotaona nanona te tangira ao e atataiaomata. Ngai te aomata ae kairiribai? Bon tabeu bwa n na ukoukora te tangira, ae aki bakantang. Ngaiare arona naba ma ana bwaintangira te euangkerio ni kabane. A karaoaki ibukin te kantaninga aei. Akea te aomata ae riai n taekina, “O, I aki kona ni katoka karaoan aei; bon aron karikau.” E aki kakoauaki iai, ibukina bwa e a tia te Atua ni berita bwa e na anga te korakora ni kaeti bwaai aikai, ao n anga bwaintangira are e na kanakoi. Ngkana akea ana rabakau temanna i buakomi, ao e na butia te Atua ibukin te wanawna. Ti tebo ma bwaai riki tabeua. Anne ana baire te Atua ibukin Ana Ekaretia. E tangiriia Aika Itiaki bwa a na kororaoi n te koaua. Ibukin te kantaninga aei E anga ana bwaintangira ao ni katikui iaoia naake a ukokoria, n te aro bwa a na riki bwa aomata aika kororaoi n te aonaaba, n aki tabe ma mamaraia aika mwaiti, ibukina bwa e berita te Atua bwa e na anga bwaintangira aika a riai ibukin kororaoia.