I Taetae nakon te Atua n aron are I taetae ma Raoraou
Iroun Unimwaane Juan A. Uceda
Man te Itingaun
“Tataro, bwa E mena ikekei; taetae, bwa E kakauongo” (Aia Boki n Anene Ataei, 12).
Ngke I uarereke, I bon rang maamaa, ao e boni kaangaanga irou kakaeaia raoraou. E bati au tataro nakon te Atua ibukin tokanikaiu iaon maaku ao maamaau. I tataro Nakoina n aron ae raoraou. Akea temanna ae reireinai bwa e kanga karaoana—I bon tii tangiria bwa N na taetae nakon temanna. Akea raoraou,ngaia are I kunea temanna are I a kona n taetae Nakoina.
Imwina ao I a kaitibo ma mitinare. A anganai ana Boki Momon, ao I a moanna ni wareware iai. Ngke I wareka 3 Nibwaai 17, I bon rang rootaki man ana anga Iesu ngke e anaiia ataei ao n tataro ibukiia. I ataia bwa aei bon te kawai ae eti n tataro.
I baireia ni wareki ni kabane koroboki aika tabu n rongorongon Iesu Kristo ngke e tataro. N Ruka 3:21, imwiin bwabetitoana iroun Ioane, e tataro Iesu nakon te Tama are i Karawa ao a uki karawa. Ngke I wareka arei, I ataia bwa I tangiria ni kan tataro n te aro are a na uki naba karawa.
N tabetai I namakina te kua ao akea namakinan te kan tataro. Ma imwiina I uringnga bwa e kanga n tataro Iesu. I kataia ni kokoaua ma te nano ni koaua n au tataro n te aro bwa e aonga ni uki karawa naba ibukiu.
N tabetai a kimototo au tataro ibukina I aki kona n iangoi taeka ake a na kabwarabwara raoi arou. I tii karekea te namakin ae bati inanou, ao I taku, “Ko ataa te bwai ae I kataia n taekinna. Taiaoka tii buokai.”
N tabetai ngkana I tataro ni kakabwaia te amwarake, I uringnga bwa e ngae ngke au tataro e uarereke, a kona n uki karawa. I kataia ni manuokina te aonaaba ao n reitai ma te Tama are i Karawa. Ao inanon te aro ae nanorinano, I atong bwaai ma korakoran nanou.
Ngkana I namakina te rau ao te raunano, I ataia bwa a uki karawa nakoiu.
Imwiin reireiaia au utu taekan te euangkerio irouia mitinare, tinau, mwaaneu, ao Ngai ti bwabetitoaki. Ma tamau, tariu, ao mwaaneu are temanna a tuai kaaina te Ekaretia. I rang tangira tamau bwa e na riki bwa kaain te Ekaretia. I aki mamatam, ao ni katoa bong I tataro ibukin tamau bwa e na butimwaea te euangkerio ao ni bwabetitoaki.
I ataia bwa I riai n tataro nakon tamau, ma I ataia naba bwa I riai n tataninga ana kaeka te Atua. N tabetai e kangai, “Tiaki, tiaki ngkai.” N tokin te tai ao tamau e a ongora ao ni mataata, ao e a bwabetitoaki.
Ngkana tinam ke tamam tiaki kaain te Ekaretia, taetae ma raoraom—Tamam are i Karawa. Bubutia bwa e na ana nanon tinam ke tamam. Taetae nakoina ma te nanorinano ao te kokoaua, n te kawai ae koaua. Ma ngkanne karaurau teutana imwin teutana. E na tuangiira. E atai bwaai aika e na karaoi. E kinaia riki tamam ao tinam nakoim. E ataia bwa e na kanga n anai nanoia.
Tai raraoma. Iai raoraom. Tataro ma nanom, ao te Tama are i Karawa e na kakauongo iroum. A na uki karawa. E kinako, ao E na kakabwaiako.
Kamataata n te Korotamnei iroun Dilleen Marsh