Ngkai te tia reirei ae 14-ana ririki ni maiu, tera raoi ae I kona n anganano iai nakon te reirei n te mweenga?

Ni kaineti ma booki aika tabu, oin te kantaninga ibukiia taan reirei n te mweenga bwa a na “kawari aia auti membwa n tatabemaniia, ni kaumakiia bwa a na tataro ma bwanaaia ae raba ao ni karaoi beku n te utu ni kabane” (D&C 20:51). Taan reirei ni kakawari “a na tararuaiia … ao n raoniia ao ni kakorakoraiia” aomata ake a katabeaki irouia bwa a na reireiniia (D&C 20:53). A “kauring, kabwarabwara, kaumaki, ao n reirei, ao ni kaoiia ni kabane bwa a na nakon Kristo” (D&C 20:59).

Ngkai titirakiniko i bon iroum, “I kona ni karaoi bwaai aikai?” Te kaeka bon eng. Titirakina toam bwa ko na kanga n anganano. E kona ni buokiko n reiakina karaoan taian bontaeka, ni kaota am koaua, anga reirei, ao a bati riki. Ngkanne ko kona n nooria i bon iroum arom ni kakabwaiai maiuia naake ko kawariia, ao ko na onimakiniko ni kamanenaan ana bwaintangira te Atua are e a tia n anganiko ni kakoroa nanon aei ao tabeua mwakurin nako te nakoanibonga rinanon maium.