Mwanangan Anna
E maeka te tia korokaraki i Arizona, USA.
E riki te rongorongo aei ni Meei 1889.
Anna Matilda Anderson e tei ni kaan ma tinana ao tarina ae e ikawai, Ida, iaan te kiaba ae roro. Mai bukini matana, e a noora te turein ni kaoti. E ruru. Te turein aei e na tokaria mai Sweden ao ni moana mwanangana nako America.
“Karaoa ae raoiroi ao kakauongo nakon Unimwaane Carlson,” e wirikiriki tinan Anna n te taetae n Sweden. E koonia ataeinaine ni kaania ma ngaiia. Unimwaane Carlson bon te mitinare are e beku i Sweden ibukin teniua te ririki, ngke waniua ana ririki Anna. Ngkai bon ana tai n oki nakoia ana utu i Idaho, n te United States.
Ngke e baireia Mamma bwa e na kanakoia Anna ao Ida nako America bwa a na birinako man te bwainikirinaki i Sweden, Unimwaane Carlson e anga nanona bwa e na tararuaiia. Ngkai e tei irarikin te turein. E anga ana tiaaina nakoia ataeinaine bwa a na kawaria. Ida e koona tinana ao mwaing nako mooa, ma Anna e tiku.
“I tangiriko,” e taku Anna. “N na aki mwaninga taekami.”
“N na aki mwaninga taekami naba. Ngkai kaniko ma ngai ao kakauongo Ngkana ko roko n te tabo ike ko aki ota iai bwa tera are a taekinna aomata, tai mwaninga n tataro nakon te Tama are i Karawa bwa E kona n ota iroum.”
Inanon iaiangoan ana taeka tinana, e toka Anna iaon te turein ao n tekateka irarikin Ida ao Unimwaane Carlson. E bon rang kukurei n aron moan tokana iaon te turein, ma ngkai e kan noora riki tinana te kabanea n tai. E bon rang abwabwaki te turein ibukin tarakin ubuia aomata, ma e wingare ngke e noora ana kiaba tinana ae roro are e tei nako eta ibuakoan te bwariko n aomata. E kauringaki bwa Mamma e bon tabe n tataraia.
Ma tiinakon bubun te moko, e a butinako te turein. N te moan tai e buti ni karaurau n te aro are e a biri Mamma irarikin te turein. Te kiaba ae roro e kaboo nakon Anna. Ma n te tai ae waekoa te kiaba ae roro e a bua nako man ana taratara. E raraa te wintoo Anna ao ni miimi bwa tera ae nang riki n taai aika a na roko.
Tabeua te wiiki imwiina, Anna e raraa wintoon te turein riki tewaana. Aei are e a uotia nako Salt Lake City, Utah. “Iai kaokoron America ma Sweden, ja?” e taku nakon Ida.
“Ja,” e kabooa ni wirikiriki Ida n te taetae n Sweden. “Ma America bon mweengau ngkai, ao ngkana ti beku korakora ibukina, ti kona ni kaoa Mamma nako ikai.”
E aki bati n tau te mwane ibukin Mamma ibukin kabooan ana tikete. Te utu i Ogden, Utah, e kabanemwane ibukin mwanangan Ida nako America. E na tiku Ida irarikiia iaon aia tabo ni man ao ni mwakuri ni kabwara baena irouia. Ma Anna e na tiku irarikin ai tinana i Salt Lake City. E a tia n roko ai tinan Anna tabeua te ririki are imwaaina, ao Mamma e koroboki n tuanganga bwa e nang roko Anna.
Imwiin mwanangan te turein i Sweden, a toka n te booti nakon te North Sea nako Denmark. Ngkanne a ieie nako England ao Ireland imwaain touan te Atlantic Ocean ao a rororake i New York City. E nimarawarawa Anna man moan te mwananga ae 15 bongina. E kukurei ngke e toka n te turein i New York ni kaea nangin Utah.
“Ogden, Utah!” e katanoata te tia tararua. Akea ana atatai Anna n te taetae n Imatang, ma e kinaa aran te kaawa. E namakina te rawawata. E a namakina riki te rawawata ngke e teirake Unimwaane Carlson n tabeka ana baeki ao ana baeki Ida.
“Ko nang bon nako?” e titirakina tarina.
“Eng,” e taetae Ida ni karaurau. “Tai raraoma, e na bon mena ai tinam ikekei ngkana ko a roko i Salt Lake City.”
E mamataku Anna ngkai Ida ao Unimwaane Carlson a kaitibo ma ana utu n te titeition. A na anaa Ida n te waekon ae iai rabunana nakon mweengana ae boou n te tabo ni man ao ngkanne a mwananga nako Idaho. Ngkai Anna e a namakina te maroaa n tii ngaia.
E karongoa tangin te turein n te tairiki ni karokoa are e tei ma teutana ruruna n te titeition i Salt Lake City. E a bon kaan nukanibong. E anaa ana baeki Anna ao e kiba nako aon te kai inano. E kakaea ai tinana ma matana aika a kua.
Ma akea temanna ae tataningaia ikekei.
E a taonaki n te maaku Anna. E taratara riki aon te kai, n ana iango bwa mwiina iai te bwai ae mwaninga. E karaurau n taratara rinanon te roo. E kataia ni kinai mataia aomata n otan te tabo ni bwaa. Ma akea ai tinana ikekei.
E a kawaraki irouia ianena ao a titirakinna. E taku Anna bwa a kan ibuobuoki, ma e aki ota n te bwai are a taekinna.
E bon tuai n namakina te maaku inanon maiuna. Tiaki ngke e bwainingareaki iroun raona n reirei i Sweden ibukin ana aro ae boou. Tiaki ngke e nimarawarawa iaon te booti nako New York. Ao tiaki naba ngke e kaboo nakon Mamma.
E kamatuui matana Anna ao n uring rikaaki ana taeka tinana: “Tai mwaninga n tataro nakon Tamam are i Karawa ibukina E ataa arom.”
E wene Anna iaon te kai ni kaania ana tiutikeeti ao e tataro mwaaka nakon are e taneiai n tataro iai inanon maiuna. E tataro bwa te Tama are i Karawa e na kamwananga temanna ibukin buokana are e rabakau n taetae n Sweden ao e kona n ota irouna.
Ngke e tia n tataro, e tararake. Bon akea temanna ae tataningaia. Ma ngkanne e a noora te utu ae kaain Tiaman are e kinaia man te mwananga n te turein. E anga ana tiaaina te tina nakoina bwa e na iriia. E tabe n tang, e anaa ana baeki ao n nakonako irarikiia.
E iriiria nako maiakin oon rinan n auti n te Temple Square. E taraa te tabo are e kateaki iai te tembora ae boou ae koro tikiraoina. Ngkanne n te tai ae waekoa e ongo Anna tangin mwaneka n nakonako irarikina. Te aine ae kawaekoa nako rarikiia, ni kamwataua n taraiia taan roko. Te aine ae tarataraia te utu n Tiaman temanna imwiin temanna. Ngkanne e a karaua n taratara raoi Anna. Ngke e tararake Anna, e tei te aine ao e taraia. E a manga taraia Anna, e a moanna n oki ana kantaninga.
E kinaa Anna! Bon ana tia reirei n te Reirei n Tabati are e a tia n nako Utah teuana te ririki are mai imwaaina! E kinaa!
E katika Anna te tia reirei ni koona iaan baina. E kaoi ranin matan Anna ao ni wirikiriki n te taetae n Sweden, “I a manga moan uti riki n te tai ae okioki. Tamneia taan mwaing ake a roko e koana au iango. I aki kona ni matu. I kairaki iroun te Tamnei bwa N na nako n te tembora n noooria ngkana iai temanna ae I kinaa ikekei.” E taua bain Anna ao e kairia nakon te kawai. “Ngkai nakomai irai.”
E ataia imwiina Anna bwa ai tinana ao ai tamana a tia ni mwaing mai Salt Lake ao e tuai reke irouia ana reta tinana. E kanako rongorongo ana tia reirei nakoia, ao a roko n anaa Anna aua te bong imwiina. N te kabane Ida ao Anna a kona ni kaoa naba Mamma nako America
Ma ibukin ngkai, a aki tabe ni baike a riki. Ngke e nakonako Anna nakon mweengan ana tia reirei, e iangoa, “te Tama ae i Karawa e anganai riki ae bati nakon are I bubuti n au tataro. I tii bubuti ibukin temanna are e kona n ota irou, ao E kanakoa temanna ae I kinaa.”
Kamatata n te korotamnei iroun Shawna J. C. Tenney