Ang Habol sa Pasko ni Mama
Jed Packer, Utah, USA
Mga paghulagway pinaagi ni Bradley H. Clark
Usa sa pinakamahagitong kasinatian sa akong kinabuhi nahitabo wala madugay human sa pagkamatay sa among 10 anyos nga anak nga babaye tungod sa kanser sa utok. Ang panultihong “Dili gyud nimo madala ang materyal nga mga butang” nahimong klaro samtang among gitan-aw ang iyang kwarto usa ka Sabado sa hapon.
Wala na si Clarissa, apan ang iyang kwarto puno ra gihapon sa mga butang nga iyang nabilin. Karon kami adunay lisud nga buluhaton sa pagdesisyon kon unsay buhaton sa iyang personal nga mga gamit. Nasayud ko nga ang pagdispatsar og usa ka butang dili sayon, ilabi na para sa akong asawa.
Ang pagdumala sa daghang dinalian nga mga buluhaton nga may kalabutan sa ospital, pagpa-chemotherapy, ug pagpa-radiation nagbilin namo og gamay lang nga panahon sa paglimpyo ug paghan-ay.
Daghan mi og nahinumduman samtang among giimpake ang mga butang nga iyang gihan-ay sa iyang headboard o bookshelf. Kining tanan nahimong makahuluganon—gikan sa iyang paborito nga habol, libro, o kwentas ngadto sa iyang stuffed animal, mga libro sa eskwelahan, ug football. Ang akong asawa nagbakho samtang nagpangutana kami kon unsay buhaton sa matag butang.
Among gipundok ang kadaghanan sa mga libro ni Clarissa ug amo kining gidala ngadto sa eskwelahan asa siya nag-elementarya para magamit sa ubang mga bata. Among gihatag ang iyang kabinet sa silangan. Pipila sa iyang mga sinina among gihatag sa iyang mga ig-agaw. Ang paghunahuna sa uban nakatabang nga mahupay og gamay sa lisud nga sitwasyon sa paghatag sa iyang mga gamit.
Pipila ka semana ang milabay, samtang nagkaduol ang Pasko, duha sa akong batan-ong anak nga mga babaye mihangyo sa ilang inahan kon ila ba nga magamit ang pipila sa mga sinina ni Clarissa aron himoong espesyal nga gasa sa Pasko. Ilang gipili ang sinina nga may mahinungdanon nga panumduman sa pamilya ug mainampingong naggunting sa mga square nga nagrepresentar sa bililhong mga higayon sa iyang kinabuhi.
Pipila ka adlaw sa wala pay Pasko, sila ug ang ilang lider sa Young Women, nga mitabang nila sa paghunahuna sa ideya, mipakita nako sa habol nga ilang gihimo. Nagtan-aw kong natingala sa kada square sa panapton, nga nagrepresentar sa mga hitabo sa kinabuhi ni Clarissa: usa ka square gikan sa iyang uniporme sa football, usa ka square gikan sa sinina nga among gipalit niya panahon sa pagbiyahe sa pamilya, usa ka square gikan sa pajama nga iyang gisul-ob sa ospital. Ang kada piraso, bililhon ug nindot kaayo, nakapahinumdom kanako sa among panahon uban kaniya. Akong giingnan akong mga anak nga nindot kini kaayo. Nasayud ko nga ang ilang inahan maganahan niini pag-ayo.
Niadtong buntaga sa Pasko nakakita ko og gasa nga kinasingkasing nga gihatag. Dili nako makalimtan ang ekspresyon sa dagway sa akong asawa sa dihang iyang giablihan ang iyang gasa ug nakakita sa unsay gihimo sa iyang mga anak para niya. Kada gabii sukad niadto iyang gamiton ang iyang habol sa Pasko matag gabii, naghinumdom sa mga panumduman ug naghandum sa adlaw nga ang among pamilya mag-uban pag-usab—salamat sa Pag-ula ug Pagkabanhaw ni Jesukristo.
Dili nako makalimtan ang ekspresyon sa dagway sa akong asawa sa dihang iyang giablihan ang iyang gasa ug nakakita sa unsay gihimo sa iyang mga anak para niya.