Mga Higala sa tibuok Kalibutan
Ako si Minna gikan sa Sweden
Ang tagsulat nagpuyo sa Utah, USA.
Hallå, Vänner!*
Ganahan ba kamong magpuyo sa usa ka balay nga eskwelahan? Si Minna ug ang iyang pamilya nagpuyo sa probinsya sa habagatang Sweden. Ang ilang balay usa kanhi ka eskwelahan daghang mga tuig na ang milabay. Miingon siya nga ang labing nindot nga bahin mao nga ang balay adunay kwarto nga dako kaayo alang sa daghang mga tawo. Sa Disyembre, ang pamilya ni Minna moimbitar sa mga silingan, mga higala, ug pamilya alang sa espesyal nga “pagpanganta.” Mga 80 ka tawo ang moanha aron manganta sa mga kanta sa Pasko. Dayon malingaw sila sa pagpangaon sa dili pa ang tanan mobalik ngadto sa mabugnaw nga panahon sa tingtugnaw sa Scandinavia.
Mao kini ang dakong kalbasa nga akong gipupo sa among tanaman.
Sa akong eskwelahan ako lamang ang miyembro sa Simbahan, mao nga mosulay ko sa pagpakigbahin sa ebanghelyo sa akong mga higala. Dad-on nako kanunay ang pipila sa akong mga higala gikan sa eskwelahan ngadto sa akong mga adlaw sa kalihokan sa Primary. Kana nagpasabut nga ako nahimong misyonaryo karon, sama sa akong igsoong mga babaye.
Ganahan kong molukso sa trampoline. Malingaw usab akong mopatukar sa piano ug flute.
Nag-edad ako og 10 anyos ug ang kamanghuran sa 9 ka mga anak sa akong pamilya. Duha sa akong igsoong mga babaye nagmisyon—ang usa sa France ug ang usa Temple Square sa Utah.
Usa sa akong paborito nga buhaton uban sa akong pamilya mao ang pagdrayb ngadto sa capital sa Sweden sa Stockholm. Ganahan kong mobisita sa akong mga apohan ug ubang mga paryente nga nagpuyo didto.
Ang akong pamilya ganahang mag-swimming. Sa ting-init [summer], mangadto mi sa linaw duol sa among balay. Sa tingtugnaw [winter], mangadto mi sa pasilidad nga dunay daghang mga pool ug mga waterslide.
Litrato sa Stockholm ni Mark Oleksiy/Hemera/Thinkstock; paghulagway pinaagi ni Brad Teare