Pagtabang sa Uban nga Makakaplag og Hugot nga Pagtuo diha kang Kristo
Ni Elder L. Tom Perry
Sa Korum sa Napulog Duha ka mga Apostoles
Gikan sa pamulong sa fireside sa Church Educational System, “We Were the Greatest Generation,” nga gipamulong sa Brigham Young University niadtong Marso 6, 2011. Para sa kompleto nga pakigpulong, adto sa cesdevotionals.lds.org.
Hagiton ko kamo sa pagtabang sa mga anak sa Dios nga makabalik sa ilang Kristyanong pagtuo ug sa lig-ong relihiyusong sukaranan nga mahinungdanon kaayo para sa kalinaw sa hunahuna ug sa tinud-anay nga kalipay.
Ang Balsamo nga Makaayo, ni David Lindsley
Si Pope Benedict XVI, namalandong sa nagkahuyang nga Kristyanong mga simbahan sa Europe, Australia, ug Estados Unidos, miingon, “Wala nay ebidensya para sa panginahanglan sa Dios, gani ni Kristo.” Siya midugang, “Ang gitawag nga tradisyonal nga mga simbahan ingon og nagkawala na.”1
Wala na kita magbuhat sa tradisyonal nga pagsimba. Mas daghang tawo ang miingon nga sila espirituhanon kaysa relihiyuso. Kon ang usa ka pagtulun-an mohaum sa ilang estilo sa kinabuhi, ila kining dawaton ug mahimong kabahin sa ilang pagtuo. Apan kon dili, magmugna sila og ilang kaugalingong hinimo sa tawo nga pagtuo. Ang pagtuo ug pagka-espirituhanon gilantaw karon isip mga produkto. Ang pagka-materyalismo mibuntog ug mihulip sa Dios.
Isip mga Santos sa Ulahing mga Adlaw, ang atong mga tingog kinahanglang madungog sa pagpakigbatok niining delikadong uso nga gidesinyo sa pagpawala sa pagtuo sa katawhan. Ang Basahon ni Mormon kadaghan nagpasidaan kanato kabahin sa paghulip sa atong pagsalig sa Dios sa mga butang nga dili molungtad. Naghulagway sa usa ka panahon diin daghang mga Nephite ang hinay-hinayng nahilayo sa ilang pagtuo, si Mormon miingon: “Sila mitubo sa pagkamapagarbuhon, nga gibayaw diha sa ilang mga kasingkasing, tungod sa ilang hilabihan ka daghan nga mga katigayunan; busa sila mitubo nga adunahan diha sa ilang kaugalingon nga panan-aw, ug dili mamati sa mga pulong [sa propeta], sa paglakaw nga matarung atubangan sa Dios” (Alma 45:24).
Samtang inyong makita ang nagkahuyang nga Kristyanong pagtuo sa katilingban, ang inyong kaugalingong pagtuo kinahanglang mas lig-on ug sigurado. Si Helaman mideklarar: “Hinumdumi nga kini diha sa lig-on nga sukaranan sa atong Manunubos, nga mao si Kristo, ang anak sa Dios, nga kamo kinahanglan gayud motukod sa inyong tukuranan; nga sa panahon nga ang yawa mopadala sa iyang mapintas nga mga hangin, oo, ang iyang mga panâ diha sa alimpulos, oo, sa diha nga ang tanan niya nga ulan nga yelo ug ang iyang mapintas nga unos mohampak diha kaninyo, kini walay gahum ibabaw kaninyo sa pagbitad kaninyo ngadto sa bung-aw sa pagkauyamot ug walay katapusan nga pagkaalaot, tungod sa lig-on nga sukaranan diin kamo natukod nga mao ang tinuod nga tukuranan, usa ka tukuranan diin kon ang mga tawo magtukod dili sila mapukan” (Helaman 5:12).
Si Nephi nagpahinumdom kanato:
“Ug kami naghisgot mahitungod kang Kristo, kami nalipay diha kang Kristo, kami nagsangyaw mahitungod kang Kristo, kami nanagna mahitungod kang Kristo, ug kami nagsulat sumala sa among mga panagna, nga ang among mga anak mahimo nga masayud sa unsa nga tinubdan sila mahimo nga mangita alang sa kapasayloan sa ilang mga sala. …
“… Kay ang matarung nga paagi mao ang pagtuo diha kang Kristo” (2 Nephi 25:26–28).
Kita ba adunay pundasyon sa pagsuporta niini nga pangangkon?
Mga Simbolo sa Sakripisyo ni Kristo
Ang pinakamaayong pagka-rekord nga kamatuoran sa tanang kasaysayan mao ang pagkatawo ug misyon ni Ginoong Jesukristo dinhi sa yuta. Ang Iyang misyon gipanagna na gikan pa sa panahon sa atong unang mga ginikanan. Sa basahon ni Moises atong mabasa:
“Ug si Adan ug si Eva, iyang asawa, mitawag sa ngalan sa Ginoo, ug sila nakadungog sa tingog sa Ginoo gikan sa agianan paingon sa Tanaman sa Eden, nagsulti ngadto kanila, ug sila wala makakita kaniya; kay sila gipahilayo gikan sa iyang atubangan.
“Ug siya mihatag ngadto kanila og mga sugo, nga sila mosimba sa Ginoo nga ilang Dios, ug kinahanglan nga mohalad sa unang mga anak sa ilang mga kahayopan, alang sa usa ka halad ngadto sa Ginoo. Ug si Adan nagmasulundon ngadto sa mga sugo sa Ginoo.
“Ug human sa daghan nga mga adlaw usa ka anghel sa Ginoo mipakita ngadto ni Adan, nag-ingon: Ngano nga ikaw naghalad og mga sakripisyo ngadto sa Ginoo? Ug si Adan miingon ngadto kaniya: Wala ako masayud, gawas nga ang Ginoo misugo kanako.
“Ug unya ang anghel misulti, nag-ingon: Kini nga butang mao ang usa ka pagkasama sa sakripisyo sa Bugtong Anak sa Amahan, nga puno sa grasya ug kamatuoran.
“Busa, ikaw mobuhat sa tanan nga imong buhaton diha sa ngalan sa Anak, ug ikaw maghinulsol ug motawag sa Dios diha sa ngalan sa Anak hangtud sa kahangturan” (Moises 5:4–8).
Sa ingon, ang mga sakripisyo gisugdan dinhi sa yuta isip ordinansa sa ebanghelyo, nga himoon ug ipahigayon pinaagi sa awtoridad sa priesthood, nagpakita sa umaabut nga sakripisyo sa Anak sa Tawo, kinsa motugyan sa Iyang kinabuhi para sa mga sala sa kalibutan.
Ang porma sa ordinansa gihan-ay aron mahimong piho ang mga punto sa sakripisyo sa Ginoo kon Siya moabut sa tunga-tunga sa kapanahonan. Ang halad sa Pagpalabay, sama pananglit, nanginahanglan sa lalaki nga nating karnero sa unang tuig, walay buling o hugaw, pilion isip halad. Ang dugo gipaagas ug giampingan nga walay bukog nga mabali—ang tanan simbolikanhon sa paagi sa kamatayon sa Manluluwas.
Makapahingangha nga ang sakripisyo sa paghalad gipadayon gikan sa panahon ni Adan hangtud sa panahon sa Manluluwas. Bisan tuod ang mga anak sa Israel miagi og daghang panahon sa apostasiya, ang paglaum nga ang Bugtong Anak motubos sa mga sala sa tanang katawhan ug ang Iyang maulaung dugo makapahimong posible sa pagka-imortal nagpabilin sa daghang kasingkasing.
Ang paghalad og mga sakripisyo sa kinatibuk-an giundang pagkahuman sa Pag-ula sa Manluluwas. Ang sakrament gipasiugdahan aron sa pagpahinumdom sa Iyang mga sumusunod nga Siya mianhi sa yuta ug mibuhat sa Iyang yutan-ong pangalagad. Atong mabasa sa Lucas:
“Ug siya mikuha sa tinapay, ug sa nakapasalamat na siya, kini iyang gipikaspikas, ug kanila gihatag niya, nga nag-ingon, Kini mao ang akong lawas nga gihatag alang kaninyo: buhata ninyo kini sa paghandom kanako.
“Maingon man usab, human sa panihapon, ang kopa gikuha niya nga nag-ingon, Kining kopa nga giula alang kaninyo mao ang bag-ong pakigsaad diha sa akong dugo” (Lucas 22:19–20).
Sa makausa pa nahingangha ko nga kining pahinumdom, bisan pa sa mangitngit nga panahon sa apostasiya, gibuhat sa daghang matang ug paagi sa tibuok mga henerasyon hangtud sa panahon sa Pagpahiuli sa ebanghelyo ni Jesukristo, sa dihang ang gahum sa priesthood gipahiuli sa yuta aron sa pagpahigayon niining sagrado, makaluwas nga ordinansa.
Sa tanang kapanahonan sa narekord nga kasaysayan atong makita ang kanunay nga pahinumdom sa misyon sa atong Manluluwas. Siya mianhi sa yuta isip balaanon ug tawhanon—Dios ug tawo. Kini nakapahimo Niya sa pagbuhat sa Iyang dakong sakripisyo para kanatong tanan pinaagi sa Iyang Pag-ula. Aduna pa bay mas lig-ong pamatuod nga si Jesus mao ang Kristo, ang Manluluwas sa kalibutan, kay sa pagtuon ug pagsunod sa Iyang makaluwas nga mga doktrina, nga Iyang gipadayag sa tanang dispensasyon sa kalibutan? Iyang gihatag kanato ang Iyang ebanghelyo aron sa paggiya ug pagdirekta kanato sa atong yutan-ong pagpakabuhi.
Ang Ebanghelyo Mao ang Solusyon
Si Presidente David O. McKay (1873–1970) miingon:
“Ang responsibilidad sa pagpakita sa kalibutan nga ang ebanghelyo ni Jesukristo ang makasulbad sa mga problema niini anaa sa mga tawo nga nagatuo niini. … Nagtuo sab ko, nga ang matag problema sa kalibutan masulbad pinaagi sa pagsunod sa mga baruganan sa ebanghelyo ni Jesukristo.
“Ang solusyon sa dagkong mga problema sa kalibutan anaa sa Simbahan ni Jesukristo. Adunay igong tabang para sa mga panginahanglan sa mga indibidwal, ug para usab sa nasud ug pundok sa mga nasud. … Moangkon ko nga daw kita nangangkon nga adunay mas labaw nga kaalam, apan dili kana tinuod. Yano lang kini nga paggamit sa plano sa Dios ngadto sa mga problema sa kalibutan. Kamo nga naghupot sa priesthood adunay mas dakong responsibilidad, karon nga nagkinabuhi mo niining mamugnaong panahon sa kasaysayan sa kalibutan, nga sukad wala pa mahitabo sa Simbahan. Ako kining balikon. Kon kita nag-angkon nga naghupot sa kamatuoran, obligasyon sa matag Santos sa Ulahing mga Adlaw nga magkinabuhi sa paagi, nga kon ang mga tawo madasig, sa pagsulay og timbang-timbang sa mga panalangin sa ebanghelyo, ila kining makaplagan nga nindot ug maayo.”2
Ang talagsaong mensahe nga atong gisangyaw ngadto sa kalibutan mao nga ang ebanghelyo sa atong Ginoo ug Manluluwas napahiuli na sa kalibutan. Anaa na pag-usab ang Iyang Simbahan dinhi sa kalibutan uban sa gahum ug himaya sa balaang priesthood.
Kadtong naordinahan gihatagan og gahum sa paglihok alang Kaniya isip Iyang mga tinugyanan sa pagtudlo sa mga doktrina, ordinansa, baruganan, ug gahum sa pagbugkos dinhi sa yuta nga pagailhon didto sa langit. Kini ang Simbahan sa Manluluwas. Siya nagdumala sa mga buluhaton sa Iyang Simbahan pinaagi sa Iyang pinili nga mga propeta. Ang iyang mga propeta nagtudlo sa ebanghelyo ngadto sa uban ug nagpamatuod nga si Jesus mao ang atong Manluluwas ug Manunubos. Karong panahona mao ang dispensasyon sa kahingpitan sa panahon, nga gipamulong na sa mga propeta sa sinugdanan sa kapanahonan. Kini ang panahon sa pagtuman sa tanang gipamulong sa mga propeta sa Ginoo ug natala diha sa balaang mga kasulatan. Ang Simbahan ni Jesukristo sa mga Santos sa Ulahing mga Adlaw dili bag-o nga simbahan apan ang gipahiuli nga Simbahan sa kalibutan karong panahona.
Kamo ang henerasyon nga gitagana sa Ginoo alang niining panahona. Kamo mikawas gikan sa tubig sa bunyag nga adunay pakigsaad ug saad ngadto sa Ginoo sa pagrepresentar Kaniya sa pagtabang sa mga tawo nga sila mopalayo sa kalibutanong mga paagi ug mobalik sa mga panalangin nga gisaad kanato kon kita mosunod Kaniya ug magkinabuhi sumala sa Iyang ebanghelyo. Kamo makatabang sa mga anak sa Langitnong Amahan nga makabalik sa ilang Kristyanong pundasyon, makapalambo og hugot nga pagtuo ngadto Kaniya, ug mobalik sa Iyang mga pamaagi.
Unsay Inyong Mahimo
Siguro mangutana mo, “Unsay akong mahimo?” Pipila ka bulan ang milabay ang among presidente sa stake, namulong panahon sa miting sa sakrament, misugyot og upat ka butang nga atong mahimo aron mapabalik ang uban sa ilang Kristyanong pagtuo:
1. Mag-ampo kada adlaw.
Si Presidente Thomas S. Monson miingon: “Niadtong nakadungog kanako karon kinsa nanlimbasug sa mga hagit ug mga kalisud dako man o gamay, ang pag-ampo mao ang tighatag og espirituhanong kalig-on. … Ang pag-ampo mao ang paagi diin kita moduol sa atong Amahan sa Langit, kinsa nahigugma kanato. Pakig-istorya ngadto Kaniya diha sa pag-ampo ug dayon paminawa ang tubag. Ang mga milagro mahitabo pinaagi sa pag-ampo. … Hinumdumi ang pag-ampo og maayo.”3
Pag-ampo mo matag adlaw ug tabangi ang uban nga mobalik sa ilang Kristyanong pagtuo pinaagi sa pagtabang nila sa pagluhod ug pag-ampo ngadto sa Dios.
2. Magtuon sa mga kasulatan kada adlaw.
Aduna pa bay mas lig-ong saksi kabahin ni Jesukristo kaysa mga pagpamatuod nga atong makaplagan diha sa Basahon ni Mormon? Sa 239 ka mga kapitulo niini, 233 naghisgot kabahin sa Manluluwas.4 Dili ba kana nindot kaayo?
Siguradoa nga nagbasa mo sa kasulatan kada adlaw. Dayon tabangi ang uban nga mahibalik sa ilang Kristyanong pagtuo pinaagi sa pagdasig nila sa pagtuon usab sa kasulatan kada adlaw.
3. Magpabiling takus nga mosulod sa templo.
Pipila kaninyo nakasulod na sa templo; ang uban wala pa. Maayo nga makasabut kon unsa ang gikinahanglan aron makaangkon og rekomend sa templo. Klaro natong nasabtan ang proseso nga kita moduol sa usa ka maghuhukom sa Israel ug ipamatuod kaniya ang atong katakus sa paghupot og rekomend sa templo ug dayon tumanon ang mga sumbanan nga gikinahanglan aron magpabilin kana nga rekomend.
Pagkinabuhi sa paagi nga ang inyong matarung nga ehemplo mopakita unsaon nga mahimong angay para sa mga panalangin sa templo.
4. Magserbisyo kada adlaw.
Hinumdumi ang mga pulong ni Haring Benjamin, “Ako mosulti kaninyo niini nga butang nga kamo unta makakat-on og kaalam; nga kamo unta makakat-on nga kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17). Ang Ginoo sa literal nga paagi motubag sa atong mga pag-ampo pinaagi sa atong pagserbisyo ngadto sa uban.
Magmahimong ehemplo sa Kristohanong pagserbisyo, ug tabangi ang uban nga mobalik sa ilang Kristyanong pagtuo pinaagi sa pagdasig nila sa pagserbisyo sa uban.
Pagbag-o ug Paglig-on sa Pasalig
Nasayud ko ang Dios buhi. Nasayud ko nga kitang tanan Iyang mga anak ug Siya nahigugma kanato. Nasayud ko nga Iyang gipadala ang Iyang Anak sa kalibutan aron mahimong maulaong sakripisyo alang sa tanang katawhan. Nasayud ko nga kadtong modawat sa Iyang ebanghelyo ug mosunod Kaniya makaangkon og kinabuhing dayon, ang pinakamahinungdanon sa tanang gasa sa Dios. Nasayud ko nga ang Manluluwas midumala sa Pagpahiuli sa ebanghelyo dinhi sa kalibutan pinaagi sa pagpangalagad ni Propeta Joseph Smith. Nasayud ko nga ang bugtong mahangturon nga kalipay nga atong makaplagan sa atong mortal nga kasinatian moabut pinaagi sa pagsunod ni Jesukristo, pagtuman sa Iyang balaod, ug sa Iyang mga kasugoan.
Hagiton ko kamo sa pagbag-o ug paglig-on sa inyong pasalig. Hagiton ko kamo sa pagtabang sa mga anak sa Dios nga mobalik sa ilang Kristyanong pagtuo ug sa lig-ong relihiyusong sukaranan nga mahinungdanon kaayo para sa kalinaw sa hunahuna ug sa tinud-anay nga kalipay niining panahon sa mortal nga pagsulay.
Unta ang Dios mopanalangin kaninyo sa kaisug, kadasig, ug tinguha aron mahibalik ang pagtuo diha sa ebanghelyo sa atong Ginoo ug Manluluwas.
Aduna pa bay mas lig-ong saksi kabahin ni Jesukristo kaysa mga pagpamatuod nga atong makaplagan diha sa Basahon ni Mormon? Sa 239 ka mga kapitulo niini, 233 naghisgot kabahin sa Manluluwas.
Ang Pagpamulong ni Haring Benjamin, ni Jeremy Winborg