E Mafai Faapefea e le Iloaina o le Aiga Atua ona Suia Au?
O mataupu faavae e lima e uiga i le Aiga Atua e mafai ona faia ai se eseesega i le ala o e ola ai.
Na aoao mai Iosefa Samita: “O le mataupu muamua lava o le talalelei, o le iloa lea ma le mautinoa o le uiga o le Atua.”1 O mea ua tatou iloa e uiga i le Aiga Atua e mafai ona suia ai le ala tatou te ola ai, e le gata i mea tetele ae faapea foi i nai mea iti, i aso uma. Mafaufau pe faapefea ona aafia e lou malamalama i le Aiga Atua lou olaga ao e faitau e uiga i nei mataupu faavae e lima.
E alolofa le Aiga Atua ia i tatou ma mananao i le mea sili mo i tatou.
O tagata o le Aiga Atua e faavavau ma pule aoao, ae Latou te popole pea ina ia tatou maua le fiafia ma le sologa lelei. Na molimau mai Peresitene Gordon B. Hinckley (1910–2008): “E fiafia i Latou ia i tatou, ma o i tatou o le autu o lo Latou popolega tele. O loo avanoa uma i Latou mo i tatou taitoatasi. Tatou te o atu i le Tama e ala atu i le Alo. O ia o lo tatou fautua i le nofoalii o le Atua. E maeu le ofoofogia o le mafai ona tatou talanoa atu i le Tama e ala atu i le suafa o le Alo.”2
Talu ai o sui o le Aiga Atua e alolofa ia i tatou ma e mananao i le mea sili mo i tatou, e taua a tatou filifiliga, ae maise lava mea iti tatou te faia i aso taitasi e aumai ai i tatou e latalata atili atu ai ia i Latou. E leai se tapulaa o lo tatou tulaga gafatia, ma e popole le Atua e uiga i lo tatou manuia, e oo lava i mea laiti.
Na tuuina mai e le Tama Faalelagi ia i tatou mea uma.
Ua tatou iloa ua tuuina mai e le Tama Faalelagi mea uma ia i tatou, o lea e tatau ai ona tatou iloa Lona aao ma ia loto faafetai. Pe a tatou loto faafetai, e ese a tatou amioga. Na folafola mai e Peresitene Thomas S. Monson faapea “e mafai ona tatou faaleleia i tatou lava, faapea foi ma isi, pe a tatou mumusu e tumau ai i le lalolagi o mafaufauga le lelei ma atiina ae ai i o tatou lava loto se uiga faaalia o le lotofaafetai.”3
Talu ai o mea uma ua ia i tatou e sau mai le Atua (tagai i le Mosaea 2:20–21; MF&F 59:21), o lo tatou agaga faafetai e mafai ona faia i tatou ia sili atu ona naunau e faasoa atu i isi. E aofia ai i lenei mea lo tatou taimi ma taleni faapea ma o tatou faamanuiaga faaletino.
E alofa mutimutivale le Tama Faalelagi.
O le galuega ma le mamalu o le Atua o le “aumaia [o] le tino ola pea ma le ola faavavau o le tagata” (Mose 1:39). Na te finagalo i lo tatou manuia, o lea na Ia ofoina mai ai ia i tatou le faamagaloga mo mea sese ua tatou faia. O Lona alofa mutimutivale ua saunia ai le faamagaloga pe a tatou toe faia na lava mea sese e tasi. O le Tama faalelagi, Iesu Keriso, ma le Agaga Paia o le a fesoasoani ia i tatou e sui.
O le alofa mutimutivale o le Atua o loo aoao mai i tatou ina ia loto faamagalo. Na saunoa mai Peresitene Dieter F. Uchtdorf, Fesoasoani Lua i le Au Peresitene Sili, “Talu ai e alofa tele le Atua ia i tatou, o lea e ao ai foi ona tatou alolofa atu ma faamagalo atu le tasi i le isi.”4 E aofia ai i lenei mea le faamagaloina o i tatou lava.
Na puapuagatia Iesu Keriso mo i tatou.
E ala i le Togiola, na puapuagatia ai le Faaola i o tatou tiga ma faanoanoaga uma (tagai i le Alema 7:11–13). A tatou maua se aso faigata ma lagona le pei e leai se tasi e malamalama, e mafai ona tatou iloa o le Faaola e malamalama. Ma a tatou maua se aso matagofie ma manao e faasoa atu i se tasi, o loo i ai iina le Faaola mo i tatou. E finagalo o Ia e faasoa atu mea o tatou fiafia ai e pei lava ona Ia faasoaina o tatou tiga.
O Le Agaga Paia e taialaina i tatou.
Na folafola atu e Iesu Keriso i Ana Aposetolo e mafai ona faatasi mai le Fesoasoani, po o le Agaga Paia, ma i latou i taimi uma e aoao atu ma faamafanafana atu ia i latou (tagai i le Ioane 14:16–17, 26–27). E mafai foi ona tatou maua le meaalofa o le Agaga Paia e taialaina i tatou. Ma e mafai ona tatou faatuatuaina o tali o le a tuuina mai e le Agaga Paia o le a fesoasoani ia i tatou. Faatasi ai ma Lana taitaiga, e mafai ona tatou fesootai pea lava pea ma le Aiga Atua. Ma ao tatou mulimuli i musumusuga tatou te maua, o le a amata ona sili atu le lelei o le tatou iloaina o i Latou.
Lesona i Aso Sa
O Le Autu o le Masina Lenei: O Poloaiga
Ata na tusia e Welden C. Andersen ma Matthew Reier; O Le Uluai Faaaliga, saunia e Del Parson; Keriso i Ketesemane, saunia e Harry Anderson