Ua Valaaulia Outou
O ai e le fiafia e mauaina se tusi valaaulia? A tatou mauaina se tusi valaaulia e auai atu ai i se pati o le aso fanau po o se taumafataga o le faaipoipoga, tatou te lagona le fiafia i le mafai ona faamanatu faatasi ma isi ia mea taua na tutupu i o latou olaga. O le autu o le Mutuale mo le 2014 o loo aofia ai foi se valaaulia fiafia o le taua faavavau: “O mai ia Keriso, ma faaatoatoaina ia te ia, ma faafiti outou lava mai mea uma e le faaleatua” (Moronae 10:32).
O le tele o valaaulia e manaomia ai se tali—se faailoa atu—e faailoa atu ai pe tatou te talia pe leai le valaaulia. Na e tali atu i lenei valaaulia i lou olaga? O le o mai ia Keriso o lona uiga o loo tatou tausia feagaiga paia na tatou osia i le papatisoga. O lona uiga ua tatou talia Iesu Keriso o lo tatou Faaola ma le Togiola patino. O lona uiga ua tatou iloa ma talitonu i le mea na aoao atu ai e Alema lona atalii o Sepulona: “Ua leai se isi lava ala po o ni auala e mafai ona faaolaina ai o le tagata, ua nao ia, ma ala mai ia Keriso” (Alema 38: 9). O le taliaina o lenei valaaulia o lona uiga ua tatou tautino atu e mulimuli i le faataitaiga atoatoa o Keriso e ala i le ola ai i olaga mama ma faapaiaina, ma e ala i le alofa ma le auauna atu i isi.
O lenei valaaulia e le o se mea na tupu i se taimi e tasi; o se faagasologa. Ua valaauliaina i tatou e mulimuli i se ala lea o le a taitai atu ai i tatou i le malumalu, i le mea tatou te osia ai isi feagaiga ma lo tatou Tama oi le Lagi ma auai i sauniga taua mo lo tatou faaeaga. O lenei ala e mafai ona aofia ai le auauna atu i se misiona. O le a aofia ai le faaipoipoga i le malumalu ma avea ma alii ma tamaitai amiotonu i le malo o le Atua. O lona uiga foi o le tumau e oo i le iuga. E pei ona taua i le valaaulia, pe a tatou o mai ia Keriso, e mafai ona faaatoatoaina i tatou ia te Ia. O Keriso ua mafai ai ona tumau i lenei ala o le feagaiga e ala i le faatuatua ia te Ia, ma e ala i le salamo. O lenei faagasologa o le faaatoatoaina e mafai ona amataina i le aso; o le Togiola a Keriso ua mafai ai.
O lenei valaaulia ua talosagaina ai i tatou e faafitia i tatou lava i mea uma e le faaleatua—ia ese mai i tifiga, tulaga faatonuina, ma faataitaiga a le lalolagi. Ua valaauliaina i tatou e “tuu ese mea o lenei lalolagi, ma saili mo mea … sili atu ona lelei” (MF&F 25:10). Matou te molimau atu o le taliaina o le valaaulia e “o mai ia Keriso ma faaatoatoaina” o le a taitai atu ai i le fiafia i lenei olaga ma le ola e faavavau i le lalolagi a sau. Ua valaaulia outou e tali atu i le taimi nei!