Faamaoni ma Faatuatua
O Musumusuga mai le Soifuaga ma Aoaoga a Iosefa Filitia Samita
Faaaliga: Na soifua mai le tina o le tusitala, o Naomi Samita Brewster, i le tausaga na valaauina ai Iosefa Filitia Samita i le Korama a Aposetolo e Toasefululua ma o le tamaitiiti lona lua a Ethel Georgina Samita, o le na faaipoipo ma Peresitene Samita i le mavae ai o le maliu o lona faletua muamua.
“Ia tatou faamaoni ma faatuatua i taimi uma, ma ia i ai se naunautaiga e tausi i poloaiga a le Alii ma faamamaluina o Ia ma manatua feagaiga na tatou osia ma Ia.”
Ina ua ulu atu Iosefa Filitia Samita e 33 tausaga i le Tapeneko i Sate Leki i le aso 6 o Aperila, 1910, e auai i le konafesi aoao, sa fai atu se tagata faasino nofoa ia te ia, “Ia Iosefa, o ai le aposetolo fou?”
“Ou te le iloa,” o le tali lea a Iosefa. “Ae e le o oe ma e le o au!”1
Ao faitauina mai ia igoa o le Au Aposetolo e Toasefululua mo se palota lagolago, na faafuasei lava ona maua e Iosefa se musumusuga atonu o lona igoa lea o le a sosoo le tauina mai. Ma sa tauina mai, ma lagolagoina ai o ia e avea ma alii lona 12 o lena korama faamamaluina.
Sa faaalia le lotomaualalo ma le aga malie o Iosefa ina ua ia toe foi mai i le fale mai le konafesi e faailoa atu i lona aiga lona valaauga fou. Sa ia faafeiloaia lana ava ma se faamatalaga le mautonu: “Ou te manatu e tatau ona faatau atua le povi,” o lana tala lea. Ma le leai o se masalosalo, sa faateia o ia ao ia faatalitali mo se faamalamalamaga faaopoopo. O lana tali faigofie lea, “E leai sou taimi ou te toe tausia ai!”2 Sa faapea ona amatalia ai se galuega faa-aposetolo lea na silia ma le onosefulu tausaga.
Atalii o le atalii o Ailama Samita, o Iosefa Filitia Samita o le Peresitene lona 10 o Le Ekalesia a Iesu Keriso o le Au Paia o Aso e Gata Ai. Sa umi atu lana auaunaga o se tasi o le Korama a Aposetolo e Toasefululua a o lei valaauina e avea ma Peresitene o le Ekalesia nai lo soo se isi lava Peresitene o le Ekalesia. I le 60 tausaga o lona avea ai ma se tasi o lena korama o molimau faapitoa, sa ia malaga muamua i le solofanua ma le taavale toso ma mulimuli ane i le taavale ma se vaalele e aoao atu le Au Paia. O ana saunoaga ma le tele o tusitusiga na faamanuiaina ai le Ekalesia ma i latou uma o le a faalogo i ana savali musuia.
Sa valaauliaina au e tusia lenei tusiga talu ai le ma mafutaga ma Peresitene Iosefa Filitia Samita, o lē sa ou valaauina ma le alofa o Tama Matua.Sa faagaeetia au i lona soifuaga mai le taimi na ou fanau ai, ina ua ia faia lou sauniga o le igoa ma le faamanuiaina, seia oo ina maliu o ia, ina ua avea au ma atalii o fanau o le na siiina lona pusa maliu i lona falelauasiga.
O Se Perofeta na Muai Faauuina
Faapei o perofeta uma a le Atua, na muai faauuina Iosefa Filitia Samita e sau i le lalolagi e tusa ai ma le faatulagaga paia a le Alii (tagai Galuega 17:26). O Iosefa o le lona fa o le fanau ae o le atalii muamua a Julina Lambson Samita. I le agaga faamaualalo o le tina faamaoni i le Feagaiga Tuai o Hana (tagai 1 Samuelu 1:11), na tauto atu Julina faapea afai e avatu e le Alii ia te ia se atalii, “o le a ia faia uma i lona malosi e fesoasoani ia ia te ia ia aoga mo le Alii ma lona tama.”3 E le gata i le taliina e le Alii o lana talosaga ae na faaalia foi ia te ia, a o lei fanau mai lana tama tama, o le tamaitiiti o le a i ai se aso o le a valaauina ai e auauna atu o se tasi o Ana molimau faapitoa i le Korama a Aposetolo e Toasefululua.4
Na soifua mai Iosefa i le aso 19 o Iulai, 1876, e Iosefa F. ma Julina Lambson Samita. Na fanau mai Iosefa, ao avea lona tama o se Aposetolo ma se fesoasoani ia Peresitene Polika Iaga. Ina ua iva masina o Iosefa, sa ave o ia e ona matua i le faapaiaga o le Malumalu o St. George Iuta. O se taimi mulimuli ane sa ia talasua ai faapea, “O lou uluai tofiga i le ekalesia o le malaga faatasi lea ma Polika Iaga e auai i le faapaiaga o le Malumalu o St. George.”5
Ina ua maua e Iosefa lona faamanuiaga faapeteriaka i le 19 tausaga, o se peteriaka musuia na tuuina ona lima i luga o le ulu o Iosefa ma tau atu: “O lou faamanuiaga le ola i se olaga lelei umi ma o le finagalo o le Alii o le a avea oe ma se alii malosi i Isaraelu.… E moni o le a e tu i le lotolotoi o tagata o se perofeta ma se talifaaaliga ia i latou, ona ua faamanuiaina ma faauuina oe i lenei valaauga.”6
Olaga Faaleaiga: O Se Tuufaatasiga o le Alofa ma Tofotofoga
Ia Iosefa Filitia Samita, “o le aiga o le faalapotopotoga sili ona taua i le taimi nei ma le faavavau.”7 Na ola ae o ia i se aiga e puleaina i le alofa, faatuatua, tulaga maualuluga faatulagaina lelei, ma le galue ma le filiga, ma sa ia saili pea lava pea e aumai na lava mataupu e tasi i lona lava aiga. (Tagai i le mataupu e 4, 15, ma le 16 o Aoaoga a Peresitene o le Ekalesia: Iosefa Filitia Samita.)
Na ia faaipoipo ia Louie Emily Shurtliff i le Malumalu o Sate Leki i le 1898. I le mavae o le tausaga e tasi na valaauina ai o ia i se misiona i Peretania Tele mo le lua tausaga ma sa lagolagoina ai ma le faamaoni e lona toalua.Ina ua toe taliu mai, na toe faaauau le la faatasiga ma sa faamanuiaina i le fanau mai o ni afafine e toalua. O le mea e faanoanoa ai, i le taimi o se maitaga faigata lona tolu na maliu ai Louie.
I lona faavauvau na tatalo ai Iosefa, “Ou te tatalo i Lau Afio, fesoasoani mai ia te au, ia ou ola ina ia ou agavaa e feiloai ma ia i le mamalu e faavavau, ina ia ma toe faatasi ma ia, ma ia le toe faaeseeseina. … Fesoasoani mai ia te au e tausi i au fanau taua ina ia tumau i le mama ma le le pona i o laua olaga atoa.”8
I se uunaiga a lona tama, na sailia ai ma le agaga tatalo e le tamā faavauvau o le fanau e toalua se ava ma se tina mo lana fanau laiti. Na faamanuiaina ona manaoga amiotonu i le mauaina o Ethel Georgina Reynolds i lona olaga. Sa la faaipoipo ia Novema 1908 i le Malumalu o Sate Leki. Na avea lenei tamaitai ofoofogia ma tina o le fanau teine e toalua muamua a Iosefa ma mulimuli ane, na fanauina ai se fanau faaopoopo e toaiva.
I se tasi taimi, sa mamafa lava i le mafaufau o le Aposetolo le avega a lona faletua ao ia malaga atu i se konafesi faalesiteki. Sa ia tusia se tusi ia te ia ma faapea mai: “o loo ou mafaufau ia te oe ma manao e faatasi ma oe i taimi uma mo ni vaiaso o i luma, e fesoasoani e tausi ia te oe. O le a ou fesoasoani ia te oe i mea uma ou te mafaia e pei ona i ai, ma le faamoemoe o le a mafai ai ona e lagona la’u faatosinaga. Fai atu i tamaiti ina ia agalelei ia te oe ma le tasi i le isi.”9 Ona ia faasoa mai lea ia te ia o lagona loloto o lona loto i le tulaga o se solo, lea sa avea mulimuli ane o se tasi o a tatou viiga, “E Foliga Umi le Malaga?” (nu. 127).
O le mea e faanoanoa ai, na maliu Ethel i le 1937. I le taimi o lona maliu, e toalima le fanau e lei faaipoipo o i le aiga. Sa lagona e Elder Samita le uunaiga e saili se isi ava ma se soa. I le 1938, na ia faaipoipo atu ai ia Jessie Evans Samita i le Malumalu o Sate Leki.
Na tusia e se tasi e iloa lelei i laua: “E ui i le eseesega i le luasefulu ono tausaga ma le eseesega i uiga, soifuaga, ma aoaoga, ae sa matagofie le fegalegaleaiga a Iosefa Filitia ma Jessie Evans Samita. … O le mea na faafesootai ai lenei va tele i nei uiga eseese tele o le alofa faamaoni ma le faaaloalo o le tasi i le isi.”10 (Tagai i itulau e 6–23 o le tusi lesona.)
O Se Tagata Sailiili i le Aoaoina e ala i le Suesue ma faapea foi i le Faatuatua
O Iosefa Filitia Samita sa lauiloa i le Ekalesia i le avea ai ma se tagata atamai i mau ma le talalelei. E amata i lona talavou, sa i ai sona manao faaloloto e “saili i le aoaoina, e ala lava lea i le suesue ma le faatuatua foi” (MF&F 88:118).Sa ia faitauina faalua le Tusi a Mamona ao lei atoa lona 10 tausaga. Ina ua misia o ia e ana uo, e masani lava ona latou mauaina o ia i le mea e teu ai vao mago mo manu o loo faitauina ia tusitusiga paia.11
Sa ia faamatala atu i se aulotu i ni nai tausaga mulimuli ane, e “mai le taimi sa ou muai iloa ai faitau, sa ou maua le fiafia ma le faamalieina sili mai le suesueina o tusitusiga paia … nai lo se isi lava mea i le lalolagi atoa.”12 (Tagai i le mataupu e 10 ma le 18.)
I se tasi taimi na tuuina atu ai e Peresitene Heber J. Grant (1856–1945) se faamālo i le sikolasipi a Peresitene Samita e ala i le tauina atu, “Ou te mafaufau ia te oe o oe o se tagata sili ona atamai i tusitusiga paia o le Au Pulega Aoao a le ekalesia ua i ai nei.”13
O lona galala mo le aoaoina e le o ta’ua ai faapea sa lei auai o ia i taaloga i le avea ai ma se tama talavou e oo lava i le avea ma se tagata matua. Sa fiafia o ia e taalo pesipolo ma le tele o taaloga lea na taaalo ai le autalavou na ola ae i se siosiomaga o mea tau faatoaga. I le avea ma se tagata matua sa avea o ia ma se tagata taalo po polo naunautai ma e auai soo atu i taaloga a lana lava fanau. Sa auai foi o ia i taaloga i faatasiga a aiga. Ou te manatua faamama’i se taaloga sofipolo ina ua taina e lo’u tamamatua se polo ma lavea ai le meapueata a se tamaloa a lo matou aiga na pueata mai le itu tauagavale o le malae.
O Se Tagata e Puipuia ma le Agaalofa le Faatuatuaga
E oo lava i le taimi ao leai valaauina o se Aposetolo, o Iosefa Filitia Samita sa lauiloa o sē puipuia le faatuatuaga, lea e i ai taimi na mafua ai ona manatu nisi o ia o se tagata saua. E ui sa ia le faavaivai i lona manao ina ia faamaoni i ana feagaiga ma ia uunaia tagata uma e taliaina le talalelei toefuataiina a Iesu Keriso, ae sa i ai sona itu agavaivai sili atu lea sa faigofie ona iloa e lona aiga ma uo. Na saunoa mai Peresitene Spencer W. Kimball (1895–1985) e faapea: “E tele taimi tatou te fai atu ai talu ai ona o le Toasefululua o le a avea ma faamasino o Isaraelu, soo se tasi o i tatou o le a faamasinoina e ia o le a fiafia, aua o lana faamasinoga e agalelei, alofa mutimutivale, tonu, ma paia.”14
Na faaalia e Peresitene Samita se faataitaiga o lea agalelei i se fonotaga lea na talanoaina ai se faalavelave na aafia ai se taavale a le Ekalesia. O se toeaina na aveina se loli o fualaau faisua ma e leai se inisiua na mafua ai le faalavelave. Ina ua mavae ni feutagaiga, sa fautuaina le Ekalesia e ave le mataupu i le faamasinoga. Ae peitai, na saunoa mai Peresitene Samita: “Ioe, e mafai ona tatou faia lena mea. Ma afai tatou te tuleia ma le malosi atoa, atonu o le a tatou manumalo foi i le aveesea mai o le loli mai si tamaloa; ona faapefea lea ona ola o ia? Na toe suia e le komiti lana fautuaga, ma faamalolo lea mataupu.15
Sa ou lagona le alofa o isi mo ia ao ou latalata atu ia Peresitene Harold B. Lee (1899–1973) i le Fanuatanu o Sate Leki ina ua mavae le faapaiaga o le tuugamau o Peresitene Samita.Sa ou fai atu ia te ia, “Peresitene Lee, i le avea ai ma se sui o le aiga ou te manao ia e silafia lou talisapaia tele o le agalelei sa e faaalia i lo’u tamamatua. I le tali mai sa ia tilotilo sao mai i ou mata ma fai mai ma le agamalu, “Ou te alofa i lena tamalii!”
O Se Auauna Faamaoni ma Faatuatua
O le galuega a Peresitene Samita sa faailoga i le usiusitai i poloaiga a tusitusiga paia e talai atu le salamo (tagai, mo se faataitaiga, MF&F 6:9; 11:9). Sa ia saunoa mai: “Ua ou manatu ua avea ma au misiona, ina ou lagona le fiafia, ou te mafaufau, i le Agaga o le Alii i au femalagaaiga i siteki o Siona, ma fai atu i tagata o nei o le aso o le salamo ma valaau atu i tagata o le Au Paia o Aso e Gata Ai ina ia manatua a latou feagaiga, … uunaia i latou ina ia faamaoni ma faatuatua i mea uma.”16 (Tagai i le mataupu e 5.)
I le faagasologa o lona soifuaga ua toeitiiti 96 tausaga, na tatalo ai Peresitene Samita ina ia ona tumau faamaoni ma faatuatua ma tumau seia oo i le oti. E moni lava, sa matauina e Peresitene Boyd K. Packer, Peresitene o le Korama a Aposetolo e Toasefululua: “E oo lava ina ua mavae le ivasefulu e na te tatalo ina ia ona ‘tausia ana feagaiga ma matafaioi ma tumau e oo i le iuga.’”17
Mo Peresitene Samita, o le “faamaoni ma le faatuatua” sa sili atu nai lo se fuaitau e fai soo. O se faaaliga mai le loto o lona faamoemoe mo tagata uma—mo tagata o le Ekalesia o e ua osi feagaiga ma ioe, mo fanau uma a le Tama o i le Lagi. “E tatau ona tatou muamua ma taimua, …” na aioi mai ai Peresitene Samita, “mo le malo o le Atua ma Lana amiotonu. Ia tatou faamaoni ma faatuatua i taimi uma, faatasi ai ma se naunautaiga e tausi i poloaiga a le Alii ma faamamalu ia te Ia ma ia manatua feagaiga na tatou osia ma Ia. O lau tatalo lenei mo Isaraelu uma.”18 (Tagai i mataupu e 19–22.)
A o e mafaufau loloto ma le agaga tatalo i ana aoaoga musuia, o le a faamalosia lau molimau ma o le a faamanuiaina oe i se malamalama faateleina o le upumoni faigofie ma mama o le talalelei a Iesu Keriso. O lenei kosi o suesuega o le a faateleina ai lou naunau e ola ai ina ia “faamaoni ma faatuatua”.
Luga: O le ata lenei o le taulealea o Iosefa Filitia Samita sa tuuina i le Tusi Paia a le aiga a ona matua. Taumatau: Fiafia Iosefa e taalo po polo ma lona uso o Tavita. Lalo: O Elder Samita (lona lua mai le agavale) ma uso faifeautalai i Egelani, 1901. O le ata o loo i le itulau faafeagai e aumai foi mai le taimi ao avea o ia o se faifeautalai. Lalo, taumatau: O Elder Samita (agavale) ma uso Aposetolo o Siaosi Alapati Samita ma Isaraelu Samita, 1936.
Luga: O Peresitene Samita ma ona atalii.Luga i le taumatau: O Elder Samita o loo faafeiloaia e Peresitene Tavita O. Makei, 1961. Taumatau: O Peresitene Samita o loo alala i luga o le tulaga i le Tapeneko i Sate Leki. Lalo: O Peresitene Samita o loo pueina lona ata i se taaloga pesipolo, o se taaloga sa fiafia e taalo ai a o talavou.
Ata mai le faaaloaloga a le Potutusi o Talafaasolopito a le Ekalesia ma ata teu a le aiga o Samita