Sa dapit nga akong gipuy-an, giisip kamong managtrato human sa usa date. Sa unsang paagi nga ang usa ka tawo kaswal nga makig-date og lain-laing tawo nga dili makakuha og reputasyon nga imoral o dili matinuoron nga tawo?
Paghulagway sa litrato pinaagi ni Matthew Reier; sinsilyo © Thinkstock/iStockphoto
Usa kini ka dakong hagit sa daghang kabatan-onan nga mga Santos sa Ulahing mga Adlaw sa tibuok kalibutan. Gitambagan sila nga “maglikay sa kanunay nga pakig-date sa samang tawo” aron sila dili makapalambo og seryoso nga relasyon sa batan-on pa (Alang sa Kalig-on sa Kabatan-onan [booklet, 2001], 4). Apan sa kultura sa dakong bahin sa kalibutan, ang pagdapit alang sa usa ka relasyon nga panagtrato kasagaran mahitabo bisan wala pa ang unang pakig-date; ug maingon usab, ang usa lang ka-date nagpasabut nga eklusibo nga relasyon nga dunay pagpasaligay. Sa ingon nga kultura, ang pakig-date og lain-laing tawo ingon og nakasupak sa “relasyon” ug makahatag ninyo og reputasyon nga usa ka imoral o dili matinuoron nga tawo. Mao nga unsay inyong buhaton?
Una sa tanan, siguroha nga ang tanan nakahibalo sa inyong pagtuo ug pasalig ngadto sa mga sumbanan sa Ginoo sa kaputli ug sekswal nga kaputli nga walay bisan unsa gayud nga pagduhaduha sa inyong kinaiya ug batasan. Sunod, mahimo kamong aktibong maglihok sa pag-usab sa kultura sa pakig-date alang sa mas maayo sa inyong palibut pinaagi sa pagsulti sa mga sumbanan sa Simbahan. Kon ang mga tawo mangutana ninyo kabahin sa inyong mga sumbanan sa pakig-date, pangutan-a sila ngano, kon wala sila magtinguha nga maminyo dayon, nga mobati sila sa panginahanglan sa ingon ka emosyonal ug pisikal nga kasuod ug ekslusibong relasyon sa batan-ong edad. Imbitara sila sa pag-apil ninyo sa group date aron sila makakita sa makalingaw nga kalihokan samtang maglikay sa wala kinahanglan nga moral nga kakuyaw ug emosyonal nga drama sa pagkabatan-on. Ug ipahibalo nila ang giya ug tambag nga gihatag kaninyo sa buhi nga mga propeta ug apostoles.