Matinud-anon nga mga Ehemplo
“Ug usa ka gamay nga bata moguyod kanila” (2 Nephi 21:6).
Isip sakop sa kinatibuk-ang kapangulohan sa Primary, ganahan ko nga makighimamat sa mga bata sa tibuok kalibutan. Bisan asa ako moadto, akong mahimamat ang talagsaong mga bata nga nagsunod ni Jesukristo ug matinud-anong nagsunod sa ebanghelyo. Kasagaran sila mao ang nangulo sa ilang mga pamilya ug sa uban sa pagsunod sa mga sugo.
Kausa usa ka General Authority mibisita sa ward sa Hong Kong diin ang mga tawo naglisud sa pagsuporta sa ilang mga pamilya. Gisultihan niya ang bishop nga ang mga miyembro kinahanglan mobayad sa ilang ikapulo.
Ang bishop nabalaka. Naglisud gayud ang mga tawo sa pagkaon ug kwarta sa pagtubag sa ilang panginahanglan.
“Kon sila mobayad sa ilang ikapulo, ang Ginoo mopanalangin kanila,” miingon ang General Authority.
Naghunahuna sa makadiyot ang bishop. Dayon siya miingon, “makigsulti ko sa pipila sa labing matinud-anong mga miyembro sa among ward—ang mga bata sa Primary!”
Pagkasunod Dominggo, ang bishop mibisita sa Primary. Iyang gitudloan ang mga bata sa balaod sa ikapulo. Mihangyo siya nila sa pagbayad sa ikapulo sa kwarta nga ilang kinitaan. Ang mga bata misaad nga sila mobayad—ug gibuhat nila!
Pipila ka bulan ang milabay, ang bishop nakigmiting sa mga hamtong sa ward. Gisultihan niya sila nga ang ilang mga anak nagbayad sa ikapulo.
“Andam ba kamong mobayad usab sa ikapulo?” siya nangutana.
Ang mga hamtong natandog sa matinud-anong mga ehemplo sa mga bata. Miingon sila nga sila mobayad usab sa ilang ikapulo. Tungod kay ang mga bata nagpakita og ehemplo, ang ilang mga pamilya nakadawat sa mga panalangin nga ilang gikinahanglan (tan-awa sa Malaquias 3:8–10). Ang hugot nga pagtuo ug pagpamatuod sa tanan milig-on.
Bisan asa man kamo magpuyo, kamo makagiya sa uban pinaagi sa inyong maayong ehemplo. Sunda ang mga sugo ug sunda si Jesukristo. Dayon kamo mahimong usa ka panalangin sa inyong pamilya ug sa uban.
Nag-ampo kami alang ninyo. Ug kami nasayud nga, sama sa mga bata sa Hong Kong, ang inyong ehemplo makahimo og kalainan alang sa kaayohan!
Litrato © Busath Photography; paghulagway pinaagi ni Maren J. Scott