Pagkat-on gikan sa Buhing mga Propeta
Gikan sa fireside sa Church Educational System nga gipamulong niadtong Marso 4, 2007, duha ka tuig sa wala pa gitawag si Elder Andersen ngadto sa Korum sa Napulog Duha ka mga Apostoles.
Ang ato bang pagtagad sa tambag ug mga pagtulun-an sa mga Kaigsoonan mas aktibo, mas masiksikon, ug mas masulundon?
Siyempre kita nahigugma ni Presidente Thomas S. Monson, sa duha ka mga magtatambag sa Unang Kapangulohan ug sa Korum sa Napulog Duha Ka mga Apostoles. Apan sa pagsulti sa atong gugma ug atong pagkamaunungon, ako mangutana, Ang ato bang pagtagad sa tambag ug sa pagtulun-an sa mga Kaigsoonan mas aktibo, mas masiksikon, ug mas masulundon?
Upat ka mga Pangutana nga Ipangutana
Hunahunaa kon unsaon ninyo sa pagtubag sa mosunod nga mga pangutana:
-
Makasulti ba kamo nako sa mga pangalan sa tulo ka sakop sa Unang Kapangulohan ug sa mga pangalan sa matag usa sa mga sakop sa Korum sa Napulog Duha Ka mga Apostoles? Kini mao ang 15 ka mga lalaki nga gipaluyohan ninyo ug nako isip mga propeta, manalagna, ug tigpadayag.
-
Kon kita mopakita og litrato niini nga mga Kaigsoonan, makaila ba kamo sa matag usa kanila? Panagsa ra kita mohatag og pagtagad sa usa ka tawo nga wala nato mailhi.
-
Makapaambit ba kamo nako sa tambag nga gihatag sa Unang Kapangulohan ug sa Korum sa Napulog Duha ka mga Apostoles sa miaging kinatibuk-ang komperensya? Ug nakahibalo ba kamo sa mga kabalaka ni Presidente Monson, ni Presidente Eyring ug Presidente Uchtdorf diha sa mga Mensahe sa Unang Kapangulohan sa Liahona niining tuiga?
-
Tingali ang mas importante, makapaambit ba kamo nako og usa ka bag-ong desisyon diin kamo dunay giusab sa inyong kinabuhi tungod sa tambag nga nadawat gikan sa usa niining 15 ka mga lalaki?
Ang Sumbanan sa Ginoo
Ang mga rason nganong ang atong mga tubag niini nga mga pangutana importante kaayo anaa sa mga calling ug responsibilidad sa Unang Kapangulohan ug sa Napulog Duha Ka mga Apostoles. Matag higayon nga ang Simbahan sa Ginoo naestablisar, ang Ginoo mitawag og mga propeta ug apostoles.Ang Manluluwas miingon, “Kamo wala magpili kanako, hinonoa ako mao ang nagpili kaninyo ug nagtudlo kaninyo” (Juan 15:16).Alang niining mga tawhana kana nga ordinasyon nakahatag og espirituhanong gahum ug ligdong nga responsibilidad—usa ka gahum nga masayud ug sa pagpamatuod ug responsibilidad sa pagtudlo ug sa pagpanalangin. Kini usab naghatag og responsibilidad ug saad natong tanan. Kita dunay responsibilidad sa pagpaminaw ug pagsunod, ug kita dunay saad nga ang mga panalangin moabut kon kita motuo ug mosunod sa ilang mga pulong.
Sa dihang ang Ginoo mitawag sa napulog duha ka mga disipulo sa Amerika human sa Iyang Pagkabanhaw, Siya mitudlo sa mga katawhan: “Bulahan kamo kon kamo mopatalinghug sa mga pulong niining napulog duha kinsa ako mipili gikan diha taliwala kaninyo sa pagpangalagad nganha kaninyo, ug aron mahimo nga inyong mga sulugoon” (3 Nephi 12:1). Sa atong panahon, sa lisud kaayo nga panahon, ang Ginoo misaad sa mga Santos, “Kon ang akong mga katawhan mopatalinghug ngadto sa akong tingog, ug ngadto sa tingog sa akong mga sulugoon kinsa ako mitudlo sa pagpangulo sa akong mga katawhan, tan-awa, sa pagkatinuod ako moingon nganha kaninyo, sila dili papahawaon sa ilang dapit” (D&P 124:45).
Kini ang sumbanan sa Ginoo. Siya mitawag og 15 ka mga lalaki gikan sa “ordinaryo nga mga kahimtang sa kinabuhi”1 ug mituga kanila sa mga yawe ug gahum sa paggiya kanato. Wala kita pugsa sa pagsunod; walay pagpamugos nga himoon. Apan kon kita maminaw sa ilang mga pulong, kon kita mosanong ug andam nga mousab sa atong mga kinaiya samtang mopamatuod ang Espiritu Santo sa ilang tambag, kita dili papahawaon sa atong dapit—nagpasabut nga kita mogunit sa gunitanan nga puthaw ug hangtud sa kahangturan magpabiling luwas diha sa dalan paingon sa kahoy sa kinabuhi.
Gilitratohan ni Craig Dimond © IRI; luyo: thinkstock/istockphoto