Atong mga Panimalay, Atong mga Pamilya
Wala Gyud Ko Singgiti sa Ginoo
Mibati ko nga walay mahimo samtang ang among kinamagulangang anak nga lalaki nasulod sa mga lit-ag ni Satanas, ug kasagaran akong napagawas ang akong kahadlok pinaagi sa kasuko. Kinahanglan nakong usabon akong kaugalingon imbis nga usabon akong anak.
Sa dihang ang among upat ka anak gagmay pa, ang akong bana ug ako nagtuo nga kon kami mopakita og maayong ehemplo ug padak-on sila nga nagsunod sa ebanghelyo uban sa gugma ug kamakanunayon, siguradong dili sila mobiya niana nga dalan.
Usa ka adlaw sa ting-init kami napugos nga dili na motuo niana. Ang among kinamagulangan nga anak, mga 14 anyos, nangaligo uban sa iyang mga higala. Sa dihang miadto ko sa swimming pool uban iyang mga manghud, nakakita ko niya nga may sigarilyo sa iyang kamot. Nabalaka ko, mao nga sa wala madugay nakig-istorya ko niya. Siya yanong miingon nga nasayop ko. Walay swerte, mao kadto ang sinugdanan sa iyang mga pagpamakak.
Sa kadugayan siya mas mipalayo namo. Siya lisud na namong duolon ug kanunay masuko nga walay hinungdan. Ang ilimnong makahubog, drugas, bati nga pinulongan, ug mga bakak nadugang sa sigarilyo. Ug ang iyang batasan ngadto sa pamilya dili na maantus.
Sa sinugdanan among gikontrolar ang iyang mga kalihokan aron proteksyonan siya, apan kana nakadugang lang sa iyang pagsukol. Ang disiplina walay epekto. Sa dihang ako siyang gikasab-an ug gihagit nga mousab, kanunay mi nga maglalis nga mas nakapalayo sa among relasyon.
Ang among kahadlok alang sa among anak lisud alang sa akong bana ug kanako. Nagtinguha kami og giya pinaagi sa pag-ampo, apan mibati ko nga walay mahimo nga nagtan-aw sa akong kinamagulangang anak nga lalaki nga nagpili sa delikado nga dalan. Samtang kami nag-ampo, kami mibati nga dili kaayo mag-inistrikto kaniya. Ingon og kini dili epektibo ug dili maayo, apan ang tanan namong mga paningkamot sa una sa pagpugong sa iyang kinaiya wala magmalampuson. Busa mipili mi sa pagsilot o pag-limit lang niya kon ang iyang mga binuhatan direktang nakaapekto sa sa among pamilya.
Bisan pa sa pagpaningkamot sa pagsunod sa tambag sa Ginoo, among nakita nga nagkagrabe ang sitwasyon. Nanlimbasug ko sa pagbuntog sa akong pagduha-duha sa kaugalingon ug pagkawala sa kadasig. Ang akong bana ug ako naningkamot nga kanunay mag-family home evening ug mag-ampo uban sa pamilya, apan nakonsensya ko pag-ayo kon makahinumdom ko sa kada higayon nga kami nagkulang ug sayop nga nagtratar sa among anak. Kadaghan kong mihilak, gamay lang og kinatulgan, ug usahay gikapoy og maayo nga igo ra nakong mabuhat ang angay nga buluhaton.
Ang kinabuhi sa pamilya nga among naandan daw hapit na mawala. Ang family home evening kanunay mahuman sa kasamok ug panaglalis. Ilabi na ko kon mawala ang akong pailub sa akong mga minahal ug ipabati gayud na nako kanila.
Ang akong bana ug ako miila nga dili mi makatugot nga ang among pamilya magkatibulaag tungod sa sitwasyon. Mihukom mi sa pagpadayon sa pagsunod sa tambag sa Ginoo ug sa mga propeta, busa naningkamot mi og maayo sa paghimo og dili pinugos, dili pormal nga mga family home evening sa mga bata nga gustong moapil. Apan gihapon wala ko makadawat nga ang among kinamagulangan nga anak nga lalaki nabitik sa lit-ag ni Satanas. Uban sa pag-ampo, pagpuasa, ug paglaum—tanan nga daw maoy nahabilin kanamo—among gisangun ang among palas-anon sa Ginoo ug misalig Kaniya.
Migrabe ang mga problema. Sa usa ka labing lisud nga panahon, mihangyo ko sa akong bana og panalangin sa priesthood. Naglaum ko og mga pulong sa kahupayan ug pagdasig. Apan, ang Ginoo nasayud sa akong tinuod nga mga panginahanglan. Gipasidan-an ko kabahin sa akong pakiglalis sa akong anak. Ang Ginoo mipabati kanako nga wala gyud ko singgiti Niya bisan kausa—apan kanunay nakong gisinggitan akong mga anak.
Niana nga panalangin, gitambagan ko og dugang nga kinahanglang makigsulti ko sa akong anak mahitungod sa akong mga kabalaka kaniya kay sa badlungon siya. Akong naamguhan nga ang akong kasuko ug pagpanaway sa tinuoray mao ang akong pagpakita sa akong kahadlok alang kaniya. Kanunay nako siyang atakihon, ug iya lang gidepensahan ang iyang kaugalingon. Naghunahuna ko og mga pamaagi sa pag-usab sa akong batasan.
Niining higayona, ako nagserbisyo isip usa ka magtutudlo sa institute. Akong nakita nga dili lisud sa pag-atubang sa kalma ug matugtanong paagi uban sa mga batan-on sa simbahan tungod kay wala ko manlimbasog sa emosyon sa usa ka inahan.
Naningkamot ko sa paglantaw sa akong anak nga dili sa panan-aw sa usa ka nabalaka nga inahan apan isip tawo nga walay pagpihig. Kini nga stratehiya, ug daghang pag-ampo ug pagpuasa, nakatabang nako sa pagkontrolar sa akong emosyon ug lantawon ang akong anak nga lalaki—nga karon hapit na mag-18 anyos—sa laing paagi. Nakita nako pag-usab ang iyang maayo nga mga kinaiya. Nakahimo ko sa pagpahayag sa akong mga pagbati ug kabalaka ngadto kaniya sa kinasingkasing paagi ug wala kaayo ko kulbai.
Nahimo kining dakong kausaban sa among relasyon. Ang akong anak nga lalaki ug ako naghisgut og daghang mga butang, ug nahimo nako nga siya mismo moatubang sa mga sangputanan sa iyang batasan. Ang akong bana ug ako mitambag lang kaniya sa mga paagi nga siya mismo makasulbad sa iyang mga problema.
Sa hinay-hinay, siya misugod sa pagdawat sa among gugma ug suporta. Ang among pagtagad kaniya, human sa lima ka lisud nga mga tuig, karon gibase na sa pagtahud. Ang iyang kinabuhi, sa daghang mga paagi, sa gihapon gubot, apan siya padulong na paghan-ay niini. Hinay-hinay niyang giila unsa ang importante gyud sa kinabuhi ug unsay makahatag og mahangturong katagbawan.
Ang pagsunod sa tambag sa Ginoo nakatabang sa among pamilya nga makaangkon pag-usab og mas malipayon nga kinabuhi. Ang akong bana ug ako nakakat-on sa paghulma sa among kaugalingong kinabuhi ug sa kinabuhi sa among pamilya imbis nga hulmahon ang kinabuhi sa among anak.
Karon ako nasayud unsa ang gipasabut nga isalig ang akong mga anak ngadto sa Ginoo. Siya mas nakaila kanila kay kanako. Ako nakakat-on nga dili mobati nga may tulubagon sa tanang desisyon sa among mga anak. Ang akong bana ug ako nakadiskobre nga ang labing maayo nga tabang nga among mahatag sa among anak mao ang pagduol sa Ginoo ug mosalig sa Iyang kabubut-on ug tambag.
Paghulagway pinaagi ni Ben Sowards