Iyang Gipanalanginan ang Akong Bati nga Pagkakanta nga Nota
Randy Lonsdale, Alberta, Canada
Namula ang akong dunggan tungod sa kaulaw samtang ang akong tin-edyer nga anak, si Derek, ug ako nahuman og kanta sa “Be Still, My Soul [Akong Kalag, Magmalinawon]”1 diha sa sakrament miting. Wala nako matarung og warmed up ang akong tingog sa wala pa magsugod ang miting, ug ang resulta, sa dihang mikanta ko sa taas nga nota, nayabag ko.
Milingkod ko og balik, mibati nga dili komportable bisan sa suporta nga gipakita sa akong nagpahiyum nga asawa, nagsiguro kanako nga wala nako mapawala ang diwa sa miting.
Human sa panapos nga pag-ampo miadto ko sa akong sakyanan aron kuhaon ang manwal sa leksyon. Usa ka sister sa among ward nagbarug duol sa pultahan, naghilak. Usa ka higala misuporta kaniya pinaagi sa paggakos kaniya. Sa akong pag-agi, ang naghilak nga sister mitawag nako ug mipahayag sa iyang pagpasalamat kanako sa pagpili sa himno nga among gikanta ug pagpasundayag niini sa paagi nga nakatandog gyud kaniya.
Siya mipasabut nga siya nanganak og stillborn baby [patay nang daan nga bata] mga pipila na ka adlaw ang milabay ug naningkamot sa pagbuntog sa kasuko ug kasubo sukad niadto. Samtang si Derek ug ako mikanta sa himno, siya mibati sa Espiritu nga mitandog sa iyang nasakitan nga pagbati uban sa kalinaw, kahupayan. Kini mihatag kaniya og paglaum nga iyang gikinahanglan aron mabuntog ang iyang kasubo.
Bakikaw kaayo kong militok og salamat ug migawas sa pultahan, mibati nga napanalanginan ug nagmapainubsanon sa iyang mga pulong. Sa akong pag-abut sa sakyanan, ako nakahinumdom sa pakigpulong sa debosyonal ni Kim B. Clark, presidente sa Brigham Young University–Idaho. Siya miingon, “Kon kita mobuhat nga adunay hugot nga pagtuo kang [Jesus] sa paghimo sa Iyang buhat, Siya motabang kanato” sa pagserbisyo sa uban ug “mopanalangin nato sa pagsulti unsay ilang kinahanglang madungog.” Siya mitudlo usab nga “ang atong gisulti ug gibuhat ingon og makaulaw o dili kaayo perpekto. … Apan ang Manluluwas modala sa atong mga pulong ug aksyon ug Iya kining ipabati sa kasingkasing sa mga tawo pinaagi sa Iyang espiritu. Iyang abagan ang atong matinud-anon apan dili hingpit nga paningkamot ug himoon kining eksakto, sa tinuoray, himoon niya kini nga hingpit.”2
May mga luha sa pasalamat ang akong mga mata samtang mibalik ko sa meetinghouse. Ang Ginoo mipanalangin sa akong dili perpekto nga pasundayag sa musika ug midala sa mensahe niini ngadto sa nasakitang kasingkasing sa sister aron sa paghupay sa iyang masulub-ong kalag. Dugang pa, ang Ginoo migamit niining makapatandog nga kasinatian aron ang akong kasingkasing mas makasabut sa lalum nga baruganan sa ebanghelyo.