Шударга гэрчлэл гэж юу вэ?

Элиз Aлександрия Холмз

puzzle of Church-related images

Таны гэрчлэл өөрийн чинь боддогоос илүү хүчтэй байж болно.

Өөрийгөө гэрчлэлийн цуглаан дээр сууж байна гэж бод. Гишүүд босч гэрчлэлээ хуваалцахыг харсан үедээ та өөрөө ч бас гэрчлэлээ хуваалцахсан гэж бодно. Харин юу гэж хэлэх билээ? Индэр дээр гартал уйлж эхэлбэл яах билээ? Бас уйлахгүй бол яах вэ? Та гэрчлэлтэй атлаа эргэлзэж магадгүй. Эсвэл гэрчлэл чинь ямар төвшинд байгааг мэдэхгүй байж болно. Гэрчлэл гэж юу болох хийгээд юу гэрчлэл биш болохыг мэдэхэд тань туслах зарим удирдамжийг доор өгүүлэв.

Гэрчлэл бол үнэн зүйлд итгэх итгэл үнэмшил хийгээд мэдлэг юм.

“Шударга гэрчлэл” (Aлма 4:19) цэвэр итгэлээс эхэлдэг. Таны гэрчлэл бол таны итгэдэг буюу үнэн гэдгийг нь мэддэг ямар нэг зүйлийн сүнслэг гэрч мөн (С ба Г 80:4-ийг үз). Таныг гэрчлэлээ хуваалцах үед мэднэ, итгэдэг мөн гэрчилж байна гэсэн үгс таны гэрчлэлийн хамгийн шударга бөгөөд хүчтэй хэсэг байх болно. Хэрэв та “Мормоны Ном үнэнийг би мэднэ” хэмээн чин сэтгэлээсээ хэлдэг бол амьдралыг өөрчлөх болон бусдад нөлөөлөхийн тулд Сүнсийг урих хүч танд байна гэсэн үг.

Зөвхөн танд зориулж хийсэн дотроо эвлүүлдэг зурагтай том хайрцаг байна гэж төсөөлөн бод. Та хайрцагны ханан дээрх зургийг ашиглан эвлүүлэхийг хичээнэ. Зургийн хоёр хэсэг нийлэхэд та тэднийг хоорондоо уялдаатай гэдгийг мэдэх болно. Гэрчлэл ийм байдлаар өсч хөгждөг. Сүнслэг туршлагатай болохын хэрээр гэрчлэлийн тань өөр өөр хэсгүүд нийлэн нэгдмэл болж, сайн мэдээний тодорхой үнэнүүдэд итгэх буюу тэдгээрийг мэддэг болно.

Сүмийн тухай бүх зүйл үнэн гэдгийг та одоохондоо мэдэхгүй ч гэсэн хэрэв тэдгээрийг мэдэх чин зүрхний хүсэл өөрт чинь байвал Тэнгэрлэг Эцэг таныг адисалж, эдгээр зүйлийг мэдэхэд тань туслах болно.

Гэрчлэл хувийн шинжтэй

Зургийг эвлүүлэх үед гэр бүл, найз нөхөд чинь хэсгүүдийг нийлүүлж зураг болгоход танд тусалж болно. Гэвч хэсгүүдийг эвлүүлж зураг болгоод үүнийгээ хамгаалах нь таны үүрэг юм. Зарим үед та эцэг эх, найз нөхдийнхөө итгэлд тулгуурлаж болно. Гэвч та илүү их сүнслэг туршлагатай болохын хэрээр өөрийнхөө туршлагад улам их итгэлтэй болно.

Хүн сайн мэдээнд өсч хөгжихийн хэрээр гэрчлэлээ хөгжүүлэх нь чухал юм. Зургийг эвлүүлэх өөр өөр арга хүмүүст байдаг бөгөөд нэг нь хоёр хэсгийг ирмэгээр нь нийлүүлэхэд нөгөө нь өнгө өнгөөр нь тохируулах гэж оролддог шиг бид бүгд өөрийнхөө өвөрмөц итгэл, туршлагаар дамжуулан хувийн гэрчлэлээ төлөвшүүлдэг билээ.

Хэрэв та ямар нэг зүйлийн талаар эргэлзвэл удирдамж авч, үнэнийг мэдэхийн төлөө чин сэтгэлээсээ залбир. Залбирлын хариу бидний хүсэн хүлээсэн байдлаар ихэвчлэн ирдэггүй ч нүд, чихээ тавин хариуг анхааралтай хүлээ.

Гэрчлэл байнга өсч байдаг

Ямар ч зүйл хийлгүйгээр эвлүүлсэн зургийг хайрцгаас гаргаж ирэх боломжгүйтэй адил та гэрчлэл нэг дор ирдэг гэж эндүүрч болохгүй. Та сайн мэдээний үнэнүүдийг бага багаар, хэсэг хэсгээр суралцаж чадна.

Бат бөх гэрчлэлийг өөртөө төлөвшүүлэх нь байнгын хүч чармайлтыг шаардана. Сайн мэдээний мэдлэгээ өсгөн нэмэгдүүлэхээр ажиллавал Ариун Сүнс таны хүч чармайлтыг адисалж, гэрчлэл тань байнга өсөн нэмэгдэх болно.

Илүү өргөн цар хүрээтэй ойлголт

Ерөнхийлөгч Диетер Ф.Угдорф

“Христийн тухай мэдэхийг шаргуу эрэлхийлэгчид эцэстээ Түүнийг мэдэх болно. Их Эзэний бурханлаг дүр зураг бага багаар, таавар лугаа адил нэг удаад нэг хэсэг нь нээгдсээр тэдэнд Түүний дүр зураг бий болно. Хэсэг тус бүрийг ялган таних нь амаргүй бөгөөд энэ нь бүхэл хэсэгт хэрхэн холбогдох нь тодорхой харагддаггүй. Хэсэг бүр бидэнд зургийг илүү сайн олж харахад тусална. Эцэстээ хангалттай олон бүрэлдэхүүн хэсэг нэгдэн нийлсэн үед бид зургийн гоё сайхныг мэдэрдэг. Тэр үед бид туршлагаа эргэж хараад, Аврагч үнэхээр бидэнтэй хамт байхаар ирсэн тухай нэг дор биш харин алгуураар, анир чимээгүй, бараг ажиглагдамгүйгээр мэддэг билээ.”

Тэргүүн Зөвлөлийн Хоёрдугаар зөвлөх, Ерөнхийлөгч Диетер Ф.Угдорф, “Waiting on the Road to Damascus,” Лиахона, 2011 оны 5-р сар, 70.

Шударга гэрчлэлийн тухай залуучууд юу гэж хэлснийг сонирхоё.

“Зарим үед хамгийн агуу гэрчлэл хүүхдийн гэрчлэлтэй маш адилхан байдаг. Есүс Христ болон Тэнгэрлэг Эцэг амьд бөгөөд Тэд бидэнд хайртай гэдгийг гэрчлэх нь хамгийн агуу гэрчлэл мөн.”—Maтиас К., Aргентин

“Шударга гэрчлэлтэй байх нь чухал гэдэгт би итгэдэг. Учир нь бид бусдыг сайн мэдээнд авчрахад энэхүү гэрчлэлээ ашиглаж чадна.”—Квейд Х., Австрали

“Гэрчлэл бол таны хамгийн найдвартай түшиг тулгуур. Хэрэв та бат бөх гэрчлэлтэй бол эргэн тойронд чинь юу ч болж байлаа гэсэн тулгарсан асуудал бэрхшээлийг төвөггүй даван туулж чадна.”—Зейн В., Калифорни, АНУ

“Хэрэв хүн ямар нэг зүйлд үнэхээр итгэдэг бөгөөд гэрчлэлээ хуваалцах үед түүний үг бусдад нөлөөлж бас тэдний гэрчлэлийг хүчирхэгжүүлж байвал энэ нь үнэн гэрчлэл мөн гэж би боддог.”—Замагомейн M., Өмнөд Африк

Би ийм гэрчлэлтэй бил үү … ?

Хэрэв та доорх асуултуудыг өөрөөсөө асуусан бол зарим хариултыг нь үзнэ үү.

Би гэрчлэлээ хэлэхдээ ямар нэг түүх буюу туршлагыг хуваалцах ёстой юу?

Хүмүүс гэрчлэлээ хэлэхдээ түүх юм уу хувийн туршлагаа олонтоо хуваалцдаг бөгөөд энэ нь гэрчлэл хэрхэн өсөн нэмэгддэгийг харуулах хамгийн сайн арга болж чадна. Гэвч түүх бол гэрчлэл биш. Товчхон бөгөөд тохиромжтой түүх аль нэг сургаалыг дүрслэн өгүүлэхэд тусалж болно, гэхдээ уг түүх гэрчлэлийг тань хэрхэн өсгөсөн мөн уг туршлагаас та ямар сайн мэдээний үнэнүүдийг суралцсанаа хуваалцаарай. Гэрчлэл гэдэг бол таны очиж үзсэн газрууд эсвэл хийж бүтээсэн зүйл, амжилт ололтын тань тухай мэдлэг биш, харин сайн мэдээний тухай таны мэдлэг юм.

Арванхоёр Төлөөлөгчийн Чуулгын Ахлагч Давид А.Беднар заасан нь: “Гэрчлэл бол Ариун Сүнсний гэрчээр оюун ухаан, зүрх сэтгэлдээ үнэн гэж мэддэг зүйл мөн (С ба Г 8:2-ыг үз). Бид сануулах, уриалах эсвэл зүгээр л сонирхолтой туршлагаа хуваалцах төдийгүй үнэнийг сэтгэл зүрхэндээ шингээн дээдэлбэл үгийнхээ үнэнийг батлах Ариун Сүнсийг урьж чадна.”¹

Нөгөөтэйгүүр, хуваалцах туршлагынхаа талаар сайтар тунгаа. Нүгэл, наманчлал болон сүнсний ариун нандин туршлагатай холбоотой түүхүүд өөрийн чинь болоод өрөөл бусдын хувьд нэн хувийн шинжтэй байдаг. Хэрэв та сүнслэгээр өдөөгдөөгүй бол ийм түүхүүдийг олны өмнө хуваалцах ёсгүй. Сүнслэгээр өдөөгдсөн тохиолдолд ч гэсэн, болсон явдлыг нарийн тодорхой тоочилгүй ерөнхийд нь ярьж, уг туршлагаас сурсан зүйл дээрээ анхаарал төвлөрүүл.

Би гэрчлэлээ хуваалцахдаа хайр, талархлаа илэрхийлэх ёстой юу?

Та гэрчлэлээ хуваалцах үед хайр, талархлаа илэрхийлэх нь тохиромжгүй биш ч гэсэн ийнхүү талархал илэрхийлэх нь гэрчлэл биш юм. Гэрчлэл нь сайн мэдээний тухай таны сурч мэдсэн сүнслэг зүйлс дээр төвлөрдөг. Хайр, талархлаа илэрхийлэх нь гэрчлэлийг орлох ёсгүй.

Арванхоёр Төлөөлөгчийн Чуулгын Ахлагч M.Рассел Баллард ийн хэлжээ, “Манай олон гишүүний гэрчлэлд ‘Би талархалтай байдаг’, ‘Би хайрладаг’ гэсэн үгс байнга сонсогддогт [би] санаа зовдог. Маш цөөхөн гишүүд ‘Би мэднэ’ хэмээн даруухнаар чин сэтгэлээсээ хэлдэг.”²

Үнэн гэрчлэлтэйгээ харуулахын тулд би уйлах буюу сэтгэл хөдлөлөө харуулах ёстой юу?

Олон хүн гэрчлэлээ хуваалцах буюу Сүнсийг хүчтэй мэдэрсэн үедээ уйлж сэтгэлийн хөдөлгөөнөө харуулдаг ч хүн болгон Сүнсийг мэдэрсэн үедээ ийм хариу үйлдэл үзүүлдэггүй. Та гэрчлэлээ хуваалцах үедээ бусдыг дуурайж сэтгэлийн хөдөлгөөнөө илэрхийлэх ёсгүй.

Ерөнхийлөгч Ховард В.Хантер (1907–1995) хэлсэн нь: “Хүчтэй сэтгэл хөдлөл буюу нулимс аяндаа урсах нь Сүнс тэр хүнд байгаагийн тэмдэг гэж үзэх хандлага бий болсонд миний санаа зовнидог. Их Эзэний Сүнс сэтгэл догдлуулж, нулимс мэлмэрүүлэхэд хүргэж болох ч сэтгэл хөдлөлийн энэхүү гадаад илэрхийллийг тухайн хүнд Сүнс байгаа нь тэр гэж эндүүрэх ёсгүй.”³

Хэрэв би өөртөө гэрчлэл бий гэдэгт итгэлгүй байвал гэрчлэлээ хуваалцах гэж хичээх ёстой юу?

Таны гэрчлэл хангалттай хүчтэй эсвэл бусадтай хуваалцахаар хангалттай үнэ цэнэтэй биш мэт санагдаж болох ч та гэрчлэлээ хуваалцаж байхдаа танд ямар их гэрчлэл байгааг олж мэдэх болно. Гэрчлэлээ хуваалцахаас бүү ай. Хэдийчинээ их гэрчлэлээ хуваалцах тусам гэрчлэл чинь төдийчинээ өсөн нэмэгддэгийг та мэдэх болно.

Арванхоёр Төлөөлөгчийн Чуулгын Ерөнхийлөгч Боид К.Пакер хэлсэн нь:

“‘Гэрчлэлтэй болох хүртлээ гэрчлэлээ хуваалцаж би яаж чадах юм бэ?’ Бурхан амьд, Есүс бол Христ, сайн мэдээ үнэн гэдгийг би яаж гэрчилж чадах юм бэ? Надад ийм гэрчлэл байхгүй байхад, эдгээр зүйлсийг гэрчлэх нь шударга бус хэрэг биш үү?’ хэмээн номлогч асуух нь байдаг л зүйл юм.

Би танд нэг зарчмыг заая: гэрчлэлийг хуваалцах үед гэрчлэл байгаа нь мэдэгддэг. Сүнсний мэдлэгийн төлөөх эрэл хайгуулд чинь хаа нэгтээ, философичдын нэрлэдгээр ‘итгэлийн нахиа’ байж л байгаа. Энэ бол та гэрлийн ирмэг дээр хүрч очоод ганц хоёрхон алхмын цаадах зам тань гэрэлтэй гэдэгт бат итгэн, харанхуй руу алхан орох агшин юм.”⁴

Эшлэл

1. Давид A.Беднар, “More Diligent and Concerned at Home,” Лиахона, 2009 оны 11-р сар, 19.

2. M.Рассел Баллард, “Pure Testimony,” Лиахона, 2004 оны 11-р сар, 41.

3. Ховард В.Хантер, Миний сайн мэдээг номло: Номлолын ажлын удирдамж (2004), 99.

4. Боид К.Пакер, “The Quest for Spiritual Knowledge,” Лиахона, 2007 оны 1-р сар, 18.

Эвлүүлдэг зургийг Эрик П.Жонсен; гэрэл зургуудыг Велден К.Андерсен

Гэрчлэл