O le a le tulaga o le Ekalesia i le tulaga faatauatane ma le faatauafafine? Pe talafeagai lefaauo atu i tagata e i ai lagona faatauatane/faatauafafine?
E tetee le Ekalesia i amioga ma uiga faatauatane ma le faatauafafine, ma tatou te aapa atu ma le loto malamalama ma le faaaloalo ia i latou e tosina atu i le itupa lava e tasi.
Afai e te iloa ni tagata e i ai lagona o le tosina atu i lana lava itupa, ia mulimuli i mataupu faavae e te faia i isi au faauoga: “Ia filifili ma le faaeteete au uo. O le a tele ina latou faatosinaina ou mafaufauga ma au amioga, e oo lava ina fesoasoani e fuafua le ituaiga tagata o le a avea ai oe. Ia filifili uo e tutusa mea tou te faatauaina, ina ia mafai ai ona outou fefaamalosiaua’i o le tasi i le isi ia ola i ni tulaga maualuluga. O se uo moni na te faamalosiauina oe e te faia le mea silisili. … Ia fai faalelei ma agalelei ma faaaloalo i tagata uma” (Mo Le Malosi o le Autalavou [tamaitusi, 2001], 12).
Ua aoao mai le Ekalesia o le tulaga feusuai o le tagata ua i ai se faamoemoega i le fuafuaga a le Tama Faalelagi. Ina ia tatou fiafia ma ia faataunuu lena faamoemoega, ua poloaiina ai i tatou e ola i le tulafono o le legavia. O amioga faatauatane/faatauafafine e le ogatasi lea ma lena faamoemoega ma e solia ai poloaiga a le Atua.
Ae peitai, afai ua tosina atu se tasi i tagata o lana lava itupa ae na te le faatinoina na lagona, ua le agasala lena tagata. O le tulaga o le Ekalesia mo le ola mama e tutusa lava mo tagata uma, e tusa lava po o le a le itupa e tosina atu i ai se tasi. E le mafai e le Alii po o Lana Ekalesia ona sopoloa le vaai i soo se amioga e solia ai Ana tulafono. E toe faapea atu, tatou te inosia le amioga le mama, ae le o le tagata.