Faitau Lau Tusi a Mamona
Jewelene Carter, Virginia, ISA
Sa tatau ona faatumulia i maua i le olioli, peitai sa mamafa o ma loto ma sa aunoa ma ni mea i o maua lima. Sa fanau mai Debra Caelia Carter i le aso na tuupoina e fanau ai, 26 Aperila, 2010, peitai e fanau mai o ia ua maliu.
A o ma savavali atu i totonu o lo matou fale, sa ou uuina le palanikeke laitiiti piniki sa ou faaaogaina e sii ma luelue ai Debra i le falemai. Ina ua ou saofai i le nofoa, ma le lofituina i lagona ootia, sa sau lo ma atalii e lua tausaga i le palanikeke e leai se mea o i ai ma musumusu atu, “Talofa, tuafafine pepe. Ou te alofa ia te oe.
Na tafe ifo ou loimata, ma sa ou faliu ese. A o ou faia, sa tau atu lau vaai i upu o se pepa lautele o i ai se savali mai le mekasini o le Uo na tautau i le puipui: “E na o si tatalo lava le mamao ese o lo tatou Tama Faalelagi, ae o le Agaga Paia e na o si musumusu lava lona mamao ese.”1
Sa amata ona sasaa atu lo’u loto i le Atua i se tatalo filemu, ma le faatauanau. A o ou faia, sa ou lagonaina le musumusu mai o le Agaga Paia, “Toe faitau lau Tusi a Mamona.” Na faatoa uma lava ona ou faitauina, ae sa matilatila le lagona ma manino le uunaiga.
Sa ou usupo ane lava i le taeao na sosoo ai, ma amata loa ona ou faitauina le Tusi a Mamona. Sa ou faaaogaina penitala ma peni maka e faailoga ai fuaitau uma lava e uiga i le faatuatua, tatalo, faamoemoe, uiga o Iesu Keriso, talai atu o le talalelei, ma le faalogo i le siufofoga o le Alii. Sa ou iloaina e tatau ona ou faia mea na faia e Nifae, Enosa, Moronae, ma isi perofeta o le Tusi a Mamona ina ua latou puapuagatia i tofotofoga. Ma e ao ona ou faia ma lena lava alofa e tasi mo le Faaola lea na faatumulia ai o latou olaga i taimi o faigata.
I le aluga o nei itula o suesuega patino o tusitusiga paia i aso taitasi, sa ou lagonaina ai aao o le Alii o siomia au i Lona alofa, ma na ou lagonaina le mana o Lana taulaga togiola mo tagata uma. Sa fetalai mai le Agaga ia te a’u, na siomia au i se toafilemu, ma na oo mai tali i au tatalo faatauanau. O le mafaufau loloto i upu na ou faitauina na ou maua ai le malosi a o ou faanoanoa.
I se tasi aso, sa faatumulia ai au e le Agaga i le olioli a ou faitau i upu nei:
“Ua ou alofa i fanau laiti i se alofa ua atoatoa; ma ua tutusa i latou uma ma ua tofusia i le olataga. …
“Fanau laiti … ua ola uma i latou ia te Ia [Atua] ona o lona alofa mutimutivale. …
“Aua faauta, ua ola fanau laiti uma ia Keriso” (Moronae 8:17, 19, 22; faamamafa faaopoopo).
Sa ou lagonaina e pei lava ua ou vaai atu i si au tama o loo ola ia Keriso—o ataata ma fiafia ma opoina i Ona aao. Mai lava i lena taimi na ou lagonaina ai le malosi e tumau mausali ai, ma na ou lagonaina se faamoemoega fou ua mumu i totonu o lo’u agaga mo lo’u aiga. Na ou iloaina afai matou te pipiimau i le Togiola, i tusitusiga paia, i saunoaga a perofeta soifua, ma le tasi ma le isi e ala i a matou feagaiga o le malumalu, o le a toe faatasia i matou o se aiga e faavavau.
Ou te fiafia i le Tusi a Mamona, o loo molimau manino mai ia Iesu Keriso, ma mea na Ia faia ma o loo faia mo i tatou, ma mea e ao ona tatou faia ia avea ai e faapei o Ia. O le Tusi a Mamona e aumaia le malamalama i lo’u olaga ma faatumulia ai lo’u loto i le faamoemoe ia Keriso.