O Se Meatotino Taua
Rafael Barrios, Santa Fe, Atenitina
Sa masani ona ou faigaluega i se nofoaga autu e tau atu i ai telefoni mo le tautuaina o tagata faatau, lea sa matuai faigata ai i le au faigaluega ona fegalegaleai le tasi ma le isi. Sa tonu i le matou supavaisa e fai se aiga o le aoauli i se tasi o Aso Toonai ma le matou vaega atoa ina ia maua ai se avanoa e faamasani ai. Sa ia faatonuina i matou e aumai se mea faitino sa taua ia i matou ma faamatala atu pe aisea na taua ai.
A o ou mafaufau i lana talosaga, sa ou iloaina o se avanoa lenei e aoao ai le matou aufaigaluega e uiga i le talalelei. Talu ai o mea tau lotu o se autu maaleale, na ou iloaina ai e tatau ona ou faaeteete i le mea faitino na ou aveina ma le auala ou te faamatalaina atu ai lona taua ia te a’u.
Ina ua oo i le aso o le aiga i le aoauli, sa matou fiafia uma lava e faamasani lelei le tasi i le isi. Ina ua uma le aiga, sa amata loa e le matou supavaisa le gaoioiga e ala i le faaali mai o lana mea faitino faatauaina—o se tusiata o lona aiga. Sa ia faamatala mai e uiga i faigata na ia oo i ai ina ua tetea ma lona toalua, ma le avea ma se tina nofotoatasi ma le amataina o se olaga fou.
Ina ua maea nisi faaaliga o mea faitino, sa oo loa i lo’u taimi. Sa ou ta’u atu i le matou aufaigaluega o la’u mea faitino o se mea sa ou sau ma au i aso uma lava: o la’u mama FMT. Sa ou tau atu ia i latou o mataitusi na faauigaina i le “Filifili Mea Tonu” ma o le mama e faamanatu mai ai ia te au ia ou usitai e le aunoa i poloaiga a le Atua. Sa fesili mai nisi o tagata e uiga i le Ekalesia ma talitonuga o le Au Paia o Aso e Gata Ai, o lea na ou maua ai se avanoa e tau atu ai le taua o aiga i le fuafuaga a lo tatou Tama Faalelagi mo Lana fanau, ma o aiga e mafai ona faavavau, ma o loo i ai so tatou Faaola na tuuina mai Lona soifua mo i tatou. Sa ou faasoaina atu foi nisi o aafiaga mai la’u misiona. A o ou tautala, sa ou lagonaina le Agaga, ma sa faapena foi i le matou au faigaluega.
Ina ua uma lena aso, na fesili mai nisi i isi fesili e uiga i le talalelei, ma sa ou valaauliaina nisi o i latou i le lotu. Mulimuli ane, na suia la’u galuega ma ou te le’i iloaina lava pe na i ai nisi o i latou sa mananao e iloa atili le talalelei, ae na ou lagonaina le fiafia i le iloa sa ou ta’u atu ia i latou ua i ai i luga o le fogaeleele le Ekalesia moni a Iesu Keriso ma o loo i ai se fuafuaga o le fiafia a le Tama Faalelagi mo Lana fanau.
I le avea ai ma tagata O Le Ekalesia a Iesu Keriso o le Au Paia o Aso e Gata Ai, ua ia i tatou se tiutetauave e faasoa atu le talalelei. E ala atu i mea laiti ma faatauvaa e pei o se mama FMT, e mafai ai ona tatou aoao atu ni lesona maoae e ono aoga mo le faaolataga o o tatou uso ma tuagane.