Man we I Stap long Medel, Jisas Kraes
I kam long “The Mediator,” Ensign, Mei 1977, 54–56.
Jisas Kraes, Man blong yumi we I Stap long Medel, i pem praes we yumi no save pem blong mekem se yumi save gobak stap wetem Papa long Heven.
Bae mi talem wan stori long yu—wan parabol.
Wan taem, i bin gat wan man we i bin wantem wan samting tumas. I luk se i moa impoten bitim eni nara samting long laef blong hem. Blong mekem se hem i kasem samting ia we hem i wantem, hem i mas mekem wan bigfala kaon.
Hem i bin kasem woning long fasin blong no mekem tumas kaon mo speseli oli bin wonem hem long saed blong man we bae hem i go askem mane long hem, man we bae i givim mane long hem. Be i luk se samting ia i impoten tumas long hem blong gat wanem we hem i wantem naoia nomo. Hem i sua se bae hem i save pembak afta.
Mekem se hem i bin saenem wan agrimen. Bae hem i pemaot smolsmol i go afta. Hem i no bin wari tumas long hem tu, from i luk se las dei blong pembak kaon, i longwe yet. Naoia, hem i gat wanem we hem i bin wantem, mo hemia nao i luk se i impoten.
Man we i givim mane, oltaem i stap biaen long tingting blong hem, mo hem i bin mekem sam smol peimen i go, mo i stap tingting se dei blong luksave samting [dei blong pembak evri mane] bae i neva kam.
Jastis o Sore?
Be, olsem we i hapen oltaem, dei ia i bin kam mo agrimen i kasem las dei blong hem. Kaon ia, hem i no pem fulwan. Man we i bin givim mane i kamaot mo i bin askem ful peimen blong hem.
Long taem ia nomo hem i bin luksave se man we i bin givim mane long hem i gat paoa blong tekembak (tekemaot) evri samting we hem i gat, be tu, hem i gat paoa blong sakem hem i go long kalabus tu.
“Mi no save pembak yu, from we mi no gat paoa blong mekem, “hem i konfes olsem.
“Afta,” man we i givim mane i bin talem, “bae mi tekem ol samting blong yu, mo bae yu go kalabus. Yu bin agri long hem. Hem i bin joes blong yu. Yu bin saenem agrimen, mo naoia, yumi mas mekem folem.”
“Be yu no save seftem taem o ravemaot kaon ia?” man we i mekem kaon i askem. “Mekem wan rod blong mi blong holemtaet wanem we mi gat mo blong mi no go long kalabus. Tru, yu yu mas biliv long sore? Bae yu save soem sore long mi?”
Man we i givim mane i ansa, “Sore, i wansaed oltaem. Bae i mekem yu nomo yu harem gud. Sapos mi soem sore long yu, bae mi no kasem mane blong mi. Mi mi askem jastis. Yu yu biliv long jastis?”
“Mi bin biliv long jastis taem mi bin saenem agrimen,” man we i askem kaon i talem. “Hem i bin long saed blong mi long taem ia, from we mi ting se bae i protektem mi. Mi no bin nidim sore long taem ia mo mi no bin ting se bae mi nidim.”
“Jastis ia nao i askem blong yu pem agrimen o yu safa long panismen,” man we i givim mane i ansa. “Hemia i loa. Yu bin agri long hem, mo hemia rod blong folem. Sore i no save stilim jastis.”
Nao tufala i stap long poen ia nao: Wan i stap tokbaot jastis, mo narawan we i askem sore. I no gat wan i save win be wan i mas lus nomo.
“Sapos yu no ravemaot kaon, bae i no gat sore,” man wei givim mane i askem.
Ansa i kam, “Be sapos mi mekem, bae i no gat jastis.”
I luk se tufala loa ia, tufala i no save wok. Tufala i ol tingting we i no save finis we i olsem se oli agensem wanwan long tufala. Olsem wanem? Bae i no gat wan wei we jastis i kamaot fulwan mo sore tu long semtaem?
I gat wan wei! Loa blong jastis i save hapen fulwan mo sore i save hapen fulwan—be i nidim wan narawan. Mo i bin hapen olsem long taem ia.
Man blong Hem we I Stap long Medel
Man we i askem kaon ia i bin gat wan fren. Hem i bin kam blong help. Hem i bin savegud long man we i bin mekem kaon ia. Hem i ting se hem i krangke blong putum hem long wan situesen olsem. Be, hem i bin wantem blong givhan from se hem i lavem hem. Hem i stanap long medel blong tufala, i fesem man we i givim mane, mo i givim tingting ia: “Bae mi pemaot kaon ia sapos yu mekem man ia we i gat kaon i fri long agrimen ia, blong mekem se hem i holem taet ol samting blong hem mo i no go long kalabus.”
Taem man we i givim mane i stap tingting hevi long tingting ia, man we i stap long medel i ademap, “Yu bin askem jastis. Nomata hem i no save pem yu, bae mi mi pem yu. Bae ol samting i stret long yu, mo yu no save askem moa. Bae i no stret.”
Mo mekem se man we i givim mane i bin agri.
Nao man we i stap long medel i tanem hem i go long man we i bin mekem kaon. “Sapos mi pemaot kaon blong yu, bae yu akseptem mi olsem man we mi bin givim mane long yu?
“O yes, yes,” man we i askem kaon i talem. “Yu bin sevem mi long kalabus mo yu bin soem sore long mi.”
“Afta,” man we i givhan i talem, “bambae yu pembak kaon blong yu long mi, mo bae mi mi talem ol kondisen. Bae i no isi, be bae i posibol. Bae mi givim wan rod long yu. Bae yu no nidim blong go long kalabus.”
Mekem se man we i givim mane, oli pembak hem fulwan. Oli bin stretem gud hem. I no gat wan agrimen we i bin brok. Be man we i bin askem kaon, hem i bin kasem sore. Tufala loa ia oli stap blong oli kamtru. From se i bin gat wan man we i stap long medel, jastis i bin kasem ful pat blong hem mo sore i bin hapen.
Man blong Yumi we I Stap long Medel
Wanwan long yumi i laef long wan kaen kaon long saed blong spirit. Wan dei, kaon ia bae i klos, mo bae yumi mas pembak. Be, wanwan taem, yumi save luk naoia, taem dei ia i kam kolosap mo taem blong pembak nomo i kam kolosap, bae yumi lukluk raon mo harem nogud evriwan mo wet long wan man, eni man, blong i kam helpem yumi.
Mo tru long loa we i no save finis, sore i no save kam sapos nomo wan i stap, we i wantem mo i save pemaot kaon blong yumi, mo pem praes mo putum ol kondisen blong pemaot yumi.
Sapos i no gat wan man we i stap long medel, sapos yumi no gat wan fren, ful praes blong jastis i mas foldaon long yumi. Ful peimen from evri loa we yumi brekem, nomata i smol o sapos i bigwan, bae yumi mas pemaot fulwan.
Be yu mas save hemia: Trutok, trutok we i gat glori, i talemaot se i gat wan Man we I Stap long Medel. “I gat wan God nomo i stap. Mo i gat wan man nomo i stap, we i save tekem ol man oli kam joen wetem God. Man ya, Jisas Kraes we hem nomo i givim laef blong hem blong pem rod blong olgeta man blong oli save go fri” (1 Timoti 2:5). Tru long Hem, sore i save kam kasem wanwan long yumi mo yumi no brekem loa blong jastis we i no save finis.
Blong sore i kam, bae i no kam olsem nomo. Bae hem i tru long wan kavenan wetem Hem. Bae i folem ol kondisen blong Hem, ol gudfala kondisen blong Hem, we i tekem wan pat we i gat nid, we i baptaes andanit long wota blong kam klin aot long ol sin.
Evri man oli gat proteksen tru long loa blong jastis, mo long wan taem, wanwan long yumi i save kasem blesing blong sore we i pemaot yumi mo i mekem yumi kam gud bakegen.
Pikja i kam long Dan Ber