Safaring blong Hem I Mekem Harem Nogud blong Yumi I Isi
Barbara Winta, Arisona, YSA
Olsem wan nes long kea yunit blong ol bebi we oli jes bon nomo, mi kea long olgeta we oli sik, samtaem hem i ol bebi we oli smosmol olgeta. Wan naet oli bin jusum mi blong lukaot wan smol boe we i bon 17 wik eli mo wet blong hem i kasem nomo haf kilo (0.5 kg). Ol han blong hem oli smol we, ol smosmol leg blong hem oli bigwan olsem fingga blong mi, mo leg blong hem daon i saes blong bigfala fingga blong mi. From hem i gat nogud problem blong pulum win, ol dokta oli no ting se hem i save laef truaot long naet.
Wan kwaet i foldaon ova long ful yunit ia oltaem taem wan niufala bebi i stap faet from laef. Wari i stap kam antap long evriwan, speseli nes blong bebe ia, mo long naet ia hem i bin mi. Papa mo mama blong hem i bin stap wetem hem ful dei, be oli bin taed. Mama blong hem i bin gobak long rum blong hem blong i kasem spel.
Praevet rum blong bebi ia i gat wan glas we oli stap putum bebi i stap insaed long hem from hem i bon eli (inkubeta), ol skrin, fan, mo IV pam, we i stap kipim hem i laef. From bebi ia i sik tumas mo i nidim bigfala kea, oli no bin mekem mi blong lukaot eni narafala sik bebi long naet ia. Bae mi stap long saed blong hem nomo ful naet ia, mo stap bisi blong givim meresin, lukaot gud long hem, givim tritmen long hem, mo ol tes.
Taem naet i stap go, mi traem blong tingting long olsem wanem nao bae mi filim sapos mi mi mama blong bebi ia. Harem nogud bae i bigwan tumas.
Mi wasem sloslo fes blong hem, tajem ol smosmol han mo leg blong hem, jenisim sloslo hem mo kavremap hem long wan niufala sofsof blangket. Mi stap tingting long wanem bakegen mi save mekem blong smol sikman blong mi ia. Wanem nao bae mama blong hem i mekem? Wanem nao Papa long Heven i wantem mi blong mekem?
Smol klin spirit ia we i gud tumas bae i gobak long Papa blong hem long Heven. Mi stap tingting sapos hem i fraet. Mi tingting long ol pikinini blong miwan. Taem oli smol mo fraet, mi stap singsing long olgeta. “Mi Pikinini blong God” hem i wan singsing we oli laekem tumas. Mi traem blong no krae, mo singsing long bebi ia.
Olsem wan nes mi luk ol paep mo blad, kaontem taem we bebi ia i stap pulum win, mo lisin long bit blong hat blong hem, mo lukluk gud ol namba long ol skrin. Olsem wan Lata-dei Sent mi luk wan selestial spirit mo glad long plan blong sevem man.
Taem naet ia i stap gohed, helt blong hem i kam nogud. Long en, hem i bin developem wan kondisen we i mekem se blad i go insaed long ol lang blong hem.
Long moning, smol sikman blong mi ia i ded kwaet nomo. Hem i bin livim ol han blong mama blong hem mo i bin “gobak long God we i bin givim laef long [hem]” (Alma 40:11).
Mi bin kam moa kolosap long Sevya mo Papa long Heven long naet ia. Mi developem wan bigfala save long lav blong Lod blong ol man blong wol ia—mo lav blong Hem blong mi. Mi bin tingbaot iven mi sapraes, from dip lav we mi bin filim blong Hem. Mo mi filim wan strong tingting blong kam moa kaen, moa naes, gat moa fogivnes, gat moa sore—kam moa olsem Hem—wan dei mo wan bit blong hat long wan taem.