Paoa blong Skripja
Taem tu yangfala blong Tahiti i bin givim janis long ol skripja, laef blong tufala i bin jenis.
Roma i no bin wantem tumas blong stadi ol skripja. Vaitiare i no bin wantem tumas blong go long seminari. Mo tufala i no nidim blong mekem. Be taem tufala i bin jusum blong mekem, mo laef blong tufala i bin jenis.
From Wanem Bae I No Olsem?
From wanem bae wan yangfala i jusum blong spendem tu aoa evri Tosdei naet blong stadi ol skripja wetem mama blong hem? Long wan yia we i pas, Roma Teroatea blong Tahiti i bin stap tingting long sem samting.
Nao bae hem i save askem from wanem wan yangfala bae i jusum blong no mekem.
Long tri yia seminari, Roma i neva lisin gud taem ol tija blong hem i givim ol skripja blong ridim blong nekis lesen. “Mi no bin wantem blong ridim ol skripja,” hem i talem. “Mi no intres nating long ol skripja.”
Be hem i stap tingting se from wanem ol lida blong Jos long wod mo stek blong hem oltaem oli yusum ol skripja long ol toktok mo lesen blong olgeta. Hem i bin stap luklukgud ol lida blong hem. Hem i bin luk olsem wanem i isi blong stek presiden blong hem i kwotem ol skripja.
Mekem se taem we Faaa Tahiti Stek i seraotem ol seminari studen i go long ol tim blong gat skrijpja mastri kompetisen long ful las yia blong hem long seminari, Roma i bin disaed blong givim janis blong hem long ol skripja.
Hemia nao olsem wanem stadi taem blong evri wik, blong hem mo mama blong hem i bin stat. Evri Tosdei naet, tufala i stadi tugeta from klas kompetisen long nekis dei, stap lanem wea ol impoten ves oli stap mo tu, blong lanem baehat plante long olgeta.
Mo hemia nao, olsem wanem ol samting oli stat blong jenis wetem Roma. Skripja stadi blong hem i mekem rilesensip blong hem wetem mama blong hem i kam strong moa. Hem i bin stat blong luk wanem we ol skripja i tijim i go stret wetem wanem we i stap hapen long wol tedei. Taem hem i stap prea abaot wanem we hem i stap ridim, hem i bin kam blong luksave se oli bin kam long God.
I bin helpem hem tu, blong mekem se tim blong hem i win long stek skripja mastri jampionsip.
Roma i luksave long ol blesing we hem i bin kasem, wan lesen hem i bin lanem taem hem i stap stadi. “Long Mosaea 2:24 King Benjamin i bin tijim se taem yumi jusum blong mekem wanem we Lod i askem, yumi kasem blesing semtaem,” Roma i talem. Wan long ol bigfala blesing we hem i bin kasem hem i we “afta blong stap stadi ol skripja long yia ia, mi save se Buk blong Momon i tru.”
No Talem long Mi Wanem blong Mekem
Long stat blong skul long yia, Vaitiare Pito i no bin wan memba blong Jos. Mekem se, bae olsem wanem nao wan niu memba we i neva bin go long seminari bifo i helpem tim blong hem blong winim Faaa stek skripja mastri jampionsip?
“Mi no bin wari se mi no gat tumas eksperiens,” hem i talem. “Mi bin lanem plante long ol ves ia long taem we ol misinari oli bin givim ol lesen long mi.”
Plante long ol famle blong Vaitiare i bin joenem Jos afta we papa blong hem i ded long wan taem we oli no tingting long hem, mo wod misin lida i tekem ol misinari i go long hom blong Vaitiare. Oli bin tokbaot famle yuniti mo fasin blong stap tugeta blong oltaem. “I bin mekem wan bigfala jenis long famle blong mifala,” hem i talem.
Be, i no bin jenisim tumas fasin blong gel ia blong 17 yia we i independen. “Afta we mi bin baptaes, evriwan i talem long mi se mi mas go long seminari,” hem i talem. “Mi no laekem taem man i talem long mi wanem blong mekem, mekem se i tekem sam taem smol blong mi go.”
Afta, hemwan i bin disaed blong go mo hem i bin faenem se hem i laekem. Oli bin askem hem blong joenem tim blong sem skripja mastri we Roma i bin stap long hem.
Long fastaem hem i no bin traehad blong ridim ol skripja we oli givim wok long hem blong ridim. Be taem hem i bin disaed blong mekem, i no longtaem afta, hem i kam blong luksave lelebet sam blesing.
“Ol skripja oli bin helpem mi plante,” hem i talem. “Mi bin lanem plante samting long ol skripja,” mo tu, abaot prea mo olsem wanem i impoten mo we Papa long Heven bae i ansarem ol prea ia.
Hem i lanem tu se taem hem i disaed blong mekem wan samting, olsem blong go long seminari o ridim ol skripja, blong kipim komitmen ia i isi moa bitim taem we hem i mekem from hem i mas mekem o hem i “sapos” blong mekem.
Naoia we skul yia i stap finis, Vaitiare i glad se hem i jusum blong go long seminari mo stadi ol skripja: “Mi save se taem yumi ridim ol skripja, yumi kasem blesing.”
Taem Roma Teroatea (andanit) mo ol seminari klas blong hem oli bin travel i go long narafala aelan kolosap we hem i Morea (lef) blong testem save blong olgeta long skripja, oli no bin wari long wanem bae i hapen—Roma i kam wina finis.
Taem we Vaitiare Pito blong Tahiti i bin disaed blong stadi ol skripja, hem i stat blong luksave ol blesing.
Ol foto oli kam long Adam K. Olson, be nomo sapos oli raetem se i defren; antap: foto © iStock; foto blong flaoa © iStock