Be I No Gat Jos long Ples Ia
Juli Aesmel, Wes Ostrelia, Ostrelia
Long taem blong wan trip i go long ol ples kolosap long Mediterenian Si, mi bin mekem strong tingting blong go long ol miting blong Jos long ol ples we mi save faenem Jos. Long Sevil, long Spen, mi pem wan wokman blong wan hotel blong givhan, mi tekem wan buk blong telefon, mo wan map blong siti blong helpem mi blong faenem wan lokol Lata-dei Sent mitinghaos. Mi bin raetemdaon adres mo nem blong Jos long Spanis. Satedei naet, mi bin prea blong save wanem taem nao bae ol miting oli stat, mo mi bin filim wan strong filing se mi nidim blong stap long mitinghaos long 10 klok moning.
Jes bifo mi aot blong go long jos long haf pas naen long moning, mi bin prea bakegen se bae mi save faenem wan mitinghaos. Folem map blong mi, mi stat blong draev i go tru long plante smol smol rod. Hem i bin wan naes moning. Mi bin pasem ol ples blong dring kofi, mo wan maket blong pijin we i fulap long ol pijin we oli stap singsing.
Mi go kasem adres ia blong faenem nomo wan ples we i no luk nating olsem wan jos. Mi wokbaot i go antap mo daon long strit ia mo lukaot gogo, i no gat samting. Tingting blong mi i fas mo mi wari, mo taem i kolosap 10 klok moning.
Laswan, mi bin prea long Papa blong mi long Heven: “Papa, yu yu bin komandem mi blong go long jos, mo mi stap ia, be i no gat jos long ples ia.”
Stret long taem ia, i gat wan man we i dresap gud long wan fulsut i kamaot long kona blong strit. Hem i luk olsem we hem i wan memba blong Jos, mo mi filim se bae mi stopem hem. Nao wetem toktok we i seksek, mi talem long hem se mi stap lukaotem wan jos. Hem i talem wan samting we mi no andastanem, mo mi lukluk hem nomo, fes blong mi i nogud. Mekem se hem i openem smol sutkes blong hem, mo mi luk tu leda buk we i luk olsem ol skripja. Mi givim hem smol pepa blong mi we mi bin raetem “La Iglesia de Jesucristo” (Jos blong Jisas Kraes). Hem i bin smael mo i poenem i gobak long rod we mi bin kam long hem, mo tugeta mitufala i wokbaot i go long jos. Bilding i bin stap long wan defren adres, we i sam minit longwe nomo, mo i isi blong mestem sapos yu no save se i stap wea. Hem i bin stap long wan smol skwea graon, biaen sam bigfala get.
Long mitinghaos, i no longtaem mi faenemaot se man ia we i bin helpem mi, hem i nomo bisop blong wod mo miting i stat long haf pas ten. Mi bin kam long taem mo inaf taem blong wet smol moa.
Long taem blong miting blong wod blong livim kakae mo testemoni, mi bin filim blong talem testemoni blong mi. Wetem wan misinari we i transletem ol toktok blong mi long Inglis i go long Spanis, mi talemaot testemoni blong mo tokbaot olsem wanem Lod i bin mekem rod blong mi blong mi kam long jos. Afta, bisop i talem testemoni blong hem mo i bin eksplenem se hem i mas go pakem trak blong hem longwe long moning ia, mekem se hem i let smol, i no olsem oltaem. Taem hem i luk mi, hem i ting se mi luk olsem wan memba blong Jos, mekem se hem i stop blong helpem mi. Afta, hem i tokbaot ol memba we oli lus long saed blong spirit mo i talem se yumi mas helpem olgeta blong faenem Jos.
Ova long ol yia we i pas, ol memori blong ol ples blong siti blong Sevil oli go lus, be memori blong mi blong faenem jos, i no bin lus. Memori ia i wan testemoni long mi, abaot bigfala lav we Papa blong yumi long Heven i gat long yumi mo se han blong Hem i kamaot blong mi luk long laef blong mi sapos nomo mi lukaotem ol samting we i “blong mekem i gud long [mi]” (Rom 8:28).