Ol Hos blong Mi we Mi Somap
Sandra Jenings, Niu Meksiko, YSA
Mi bin gat wan pikja blong tu smol hos we mi somap long tred blong kolosap wan yia. Mi stap komplitim taem we mi faenem se mi bin mekem wan mistek long kala blong wan long tufala hos ia. From se i wan kala we i isi blong no luksave wetem kala blong hos, i mekem se mi no luksave mistek blong mi kasem taem mi bin luk se kala blong hos i no agri wetem ol kala kolosap long kanvas (putum pikja long hem).
Mi no bin glad. Mi bin spendem plante taem blong wokem pikja ia, mo tingting ia blong karemaot ol tred blong kala ia we i no stret i mekem mi les. Wetem wota i fulap long ae blong mi, mi openem tin doti mo sakem pikja ia i go insaed.
Mi bin sidaon long tebol we mi stap putum ol tul blong somap blong mi long hem mo krae from naes pikja blong hos blong mi we mi lusum mo muv i go long ol nara projek. Be mi no save mekem—mi no save livim projek we mi bin wokhad long hem. Mi openem tin doti mo karembak kaliko ia. Mi faenem wan not long kala we i no stret ia mo karemaot slo. Mi tanem pikja ia, mo stat blong karemaot tred.
Samtaem i isi blong karemaot kwik. Ol nara taem mi faenem se i had. Mi no sua olsem wanem blong karemaot wanem we mi bin mekem finis. Samtaem mi mas katem wanwan tred long wan taem. Boe blong mi i sapraes taem i luk se bae mi mekem evri wok ia blong mekem i stret. Mo hem i wan pikja nomo we mi somap long han.
Taem mi karemaot ol tred ia, mi stat blong tingbaot fasin blong sakem sin mo olsem wanem i had blong stretem sam long ol mistek we mi bin mekem. Tru fasin blong sakem sin i nidim strong tingting blong wantem mekem wan samting, wok, mo safa, be i nidim blong wokhad.
Taem mi somap hos ia bakegen, mi bin tingbaot se fasin blong sakem sin i letem Atonmen blong Jisas i karemaot mak blong sin aot long laef blong mi mo helpem mi blong stat niu. “Ol hos blong mi blong sakem sin ia” i hang long hom blong mi, olsem wan kwaet samting be i mekem mi tingbaot strong blong mekem wanem i stret, blong neva givap taem mi foldaon, mo blong tingbaot se tru long fasin blong sakem sin, Atonmen bae i mekem samting i defren.