Ol Gospel Stori blong Evri Dei Laef
Paoa blong Getsemane we I Klinim Gud Yumi
Brus R. MaKonki i bin bon long 29 Julae 1915, long Mijigan, long YSA. Oli bin sastenem hem long Fas Kaonsel blong Olgeta Seventi long 6 Oktoba 1946, mo oli bin odenem hem i kam wan Aposol long 12 Oktoba 1972. Hem i bin ded long 19 Epril 1985 long Sol Lek Siti. Toktok ia, hem i bin givim long jeneral konfrens long 6 Epril 1985.
Mi stap filim, mo Spirit i stap agri, se doktrin we i moa impoten we mi save tokbaot, mo testemoni we i moa strong we mi save talem, i abaot sakrifaes we i pemaot yumi we Lod, Jisas Kraes i bin mekem.
Atonmen blong Hem, i taem we i moa impoten we i bin hapen, o bae i hapen stat long stat blong Kriesen i go kasem ol yia blong wan taem we i no gat en blong hem.
Hem i aksen blong gud we i hae moa, mo i aksen blong gladhat we i moa bigwan we wan god nomo i save mekem. Tru long hemia, evri toktok mo kondisen blong plan blong fasin blong sevem man we i no save finis we Papa i givim, oli kam laef.
Tru long hem, i kam blong hapen se man i nomo save ded mo man i kasem laef we i no save finis. Tru long hem, Jisas i sevem evri man long ded, hel, devel, mo harem nogud ia we i no gat en blong hem.
Mo tru long hem, evriwan we oli biliv mo oli obei long bigfala gospel blong God, evriwan we oli tru mo oli fetful mo oli winim wol ia, evriwan we oli safa from Kraes mo toktok blong Hem, evriwan ia we oli panisim olgeta mo wipim olgeta from Hem we yumi blong Hem,—evriwan ia bae oli kam olsem Man we i Mekem olgeta mo bae oli sidaon wetem hem long jea blong Hem mo bae oli rul wetem Hem blong oltaem long wan glori we i stap oltaem.
Taem bae mi tokbaot ol bigfala samting ia, bambae mi yusum ol toktok blong mi nomo, nomata we bae yu tingting se oli ol toktok blong skripja, ol toktok we ol narafala aposol o profet oli bin talem.
I tru we olgeta nao oli talemaot faswan, be naoia oli ol toktok blong mi, from we Tabu Spirit blong God i bin testifae long mi se oli tru, mo naoia i olsem we Lod i bin talemaot olgeta toktok ia long mi long fas ples. Nao, mi bin harem voes blong Hem, mo mi save toktok blong Hem.
Insaed long Garen blong Getsemane
Tu taosen yia i pas, aotsaed long ol wol blong Jerusalem, i bin gat wan gudfala ples, we nem blong hem i Getsemane, ples we Jisas mo ol gudgudfala fren blong Hem oli bin go long hem blong stap kwaet blong tingting hevi mo blong prea.
Long ples ia, Jisas i bin tijim ol disaepol blong Hem abaot ol doktrin blong kingdom, mo evriwan long olgeta oli bin prea long Hemwe i Papa blong yumi evriwan, we oli bin stap mekem wok blong Hem mo oli bin stap givim seves long wok blong Hem.
Long tabu ples ia, olsem Iden we Adam i bin stap long hem, olsem Sinae we Jehova i bin givim ol loa blong Hem, olsem Kalvari we Pikinini blong God i bin givim laef blong Hem blong pem praes blong plante, tabu graon ia, i ples we Pikinini blong Papa we I Stap Oltaem we i no bin gat sin, i bin tekem long Hemwan, ol sin blong evri man wetem kondisen se bae oli mas sakem sin blong olgeta.
Yumi no save, yumi no save talem, i no gat man long wol ia i save tingting o talem stret, ful ripot long wanem Kraes i bin mekem long Getsemane.
Yumi save se Hem i bin swet, mo swet oli ol bigfala drop blong blad we i kamaot long evri hol blong skin blong hem taem Hem i dring ol makas blong konkon kap we Papa blong Hem i bin givim long Hem.
Yumi save se Hem i bin safa, tugeta long bodi mo long spirit, moa bitim we i posibol blong man i safa long hem, be nomo hemia i go kasem ded.
Yumi save se, long sam wei, yumi no save andastanem nating, safaring blong Hem i bin stretem ol samting we jastis i askem, i pem praes blong ol sol we oli sakem sin aot long ol sobodi mo ol panismen blong sin, mo i mekem sore i stap blong olgeta we oli biliv long tabu nem blong Hem.
Yumi save se Hem i bin ledaon long graon we fes blong Hem i stap long graon taem ol sobodi mo ol safaring blong wan bigfala hevi trabol i mekem Hem i seksek mo i mekem Hem blong i no dring long konkon kap.
Yumi save se wan enjel i bin kam aot long ol ples blong glori blong kam mekem Hem i kam strong moatru long hadtaem ia blong Hem, mo yumi ting se strong Maekel nao i bin kam, we hem i bin foldaon fastaem blong man i save laef.
Folem hamas yumi save talem, ol safaring ia we oli bigwan tumas—safaring ia we i no gat wan moa we yumi save makem long hem—i bin gohed blong kolosap tri o fo aoa.
Taem we Oli Arestem Hem, Oli Putum Hem long Kot, mo Oli Wipim Hem
Afta long hemia—bodi blong Hem i taet mo i nomo gat paoa—Hem i bin fesem Judas mo ol narafala man we oli folem devel, sam long olgeta we oli kam stret long Sanhedrin (kaonsel blong ol man Jiu); mo oli pulum Hem i go wetem wan rop we i fas long nek blong Hem, olsem wan kriminol, blong ol top krinimol oli jajem Hem, we, olsem ol man Jiu, oli sidaon long jea blong Eron, mo olsem ol man Rom, oli wantem paoa blong Sisa.
Oli bin tekem Hem i go long Anas, long Kaeafas, i go long Paelat, i go long Herod, mo i gobak long Paelat. Oli bin akiusum Hem, oli sakem strong toktok long Hem, mo oli bin kilim Hem. Wota blong maot blong olgeta we i smel nogud i bin ron daon long fes blong Hem olsem ol rabis wip we oli stap mekem bodi blong Hem we i fulap long harem nogud i nomo strong.
Wetem ol bigfala wip blong nogud kros, oli wipim mo wipim nogud bakegen bak blong Hem. Blad i ron daon long fes blong Hem taem oli putum wan hat blong king we oli mekem wetem ol ropnil we oli stikim ol aebro blong Hem we i stap seksek.
Be antap long evri samting ia, oli bin wipim Hem, oli bin wipim Hem wetem 39 wip, oli stap wipim Hem ia wetem wan wip we fulap string blong sap bun, mo aean i stap long hem.
Plante oli bin ded afta we oli wipim olgeta nomo, be Hem i bin girap long safaring blong ol wip ia blong Hem i save ded long wan ded blong sem antap long strong kros blong Kalvari.
Afta, Hem i bin tekem kros blong Hem bakegen kasem taem Hem i bin foldaon from kros i hevi mo from ol soabodi mo safaring we i kam bigwan blong evri samting ia.
Antap long Kros
Laswan, long wan hil we oli singaotem Kalvari—bakegen, hem i aotsaed long ol wol blong Jerusalem—long semtaem we ol disaepol we oli no save mekem wan samting oli stap lukluk mo oli bin filim ol safaring ia we i kam kolosap long ded blong bodi blong olgetawan, ol soldia blong Rom oli putum Hem antap long kros.
Wetem ol bigfala hama, oli nilim ol sap aean i go tru long leg mo han blong Hem. I tru, we Hem i bin kasem kil from ol sin blong yumi, mo skin blong bodi blong hem i bin kasem ol mak blong kil from ol rabis fasin blong yumi.
Nao oli leftemap kros blong evriwan i lukluk nogud, mo sakem strong tok mo daonem Hem. Hemia, oli bin mekem, wetem rabis tingting, blong tri aoa, stat long naen klok moning i go kasem medel dei.
Nao ol heven oli kam blak. Tudak i bin kavremap ol ples blong wan taem blong tri aoa, olsem we i bin hapen long ol man blong Nifae. I bin gat wan strong win, olsem se stret bodi blong God i bin stap safa.
Mo i tru, Hem i bin safa, from we taem we Hem i bin stap hang long kros blong wan nara tri aoa, stat long medel dei i go kasem tri klok aftenun, evri safaring mo soabodi long Getsemane we i no gat sore long hem i bin hapen bakegen.
Mo, laswan, taem ol safaring blong pem praes from yumi i kasem mak blong hem—taem Hem i bin winim viktri, taem Pikinini blong God i bin mekem tingting blong Papa blong Hem i bin hapen long saed blong evri samting—nao Hem i talem, “Olgeta samting i finis nao” (Jon 19:30), mo Hem i bin ded.
Insaed long Spirit Wol
Taem pis mo kamfot blong wan ded blong sore i mekem Hem i fri long ol soabodi mo ol harem nogud blong wol ia, nao Hem i bin go insaed long paradaes blong God.
Taem Hem i bin mekem sol blong Hem i wan ofring from sin, Hem i bin rere blong luk laen blong Hem, folem toktok we Hem i bin talem.
Olgeta ia, i gat evri tabu profet mo fetful Sent blong ol taem bifo we i pas; olgeta ia, i gat evriwan we oli bin tekem nem blong Hem long olgeta, mo we, oli bin bon bakegen long saed blong spirit tru long Hem, oli kam ol boe mo ol gel blong Hem, semmak olsem wetem yumi; evriwan ia oli bin kam tugeta long spirit wol, long ples ia blong luk fes blong Hem, mo blong harem voes blong Hem.
Afta kolosap 38 o 40 aoa—tri dei olsem we ol Jiu oli skelem taem—Lod blong yumi we God i blesem Hem i kam long gref long hol blong ston blong Arimatea, long ples we Nikodimas mo Josef blong Arimatea i putum bodi blong Hem long hem.
Taem Hem I Laef Bakegen long Ded
Afta, long wan wei we yumi no save andastanem nating, Hem i bin tekem bodi ia, we i no luk wan doti samting yet, mo i go antap long taem we i no save finis we i gat glori we i mekem Hem olsem Papa blong Hem we i bin laef bakegen long ded.
Nao, Hem i bin kasem evri paoa long heven mo long wol, i kam olsem god blong taem we i no save finis, i kamaot long Meri Magdala mo long plante narafala moa, mo i bin go antap long heven, blong Hem i sidaon long raet han blong God Papa we I Gat Olgeta Paoa, mo blong rul blong oltaem long glori we i no save finis.
Taem Hem i bin girap long ded long nambatri dei, i mekem Atonmen i kam fulwan.Bakegen, long sam wei we yumi no save andastanem nating, wanem i kamaot long Taem we Hem i Laef Bakegen long Ded i pas i go long evri man blong oli save girap bakegen long gref.
Olsem we Adam i bin tekem ded i kam, Kraes i bin mekem laef i kam; olsem we Adam i papa blong bodi we i save ded, Kraes i papa blong bodi we i no save ded.
Mo wetem tugeta, fasin blong save ded mo fasin blong nomo save ded, man i save wokemaot fasin blong hem we Jisas i sevem hem, mo i go kasem ol hae ples we oli stap antap bitim ol skae, long ples we ol god mo ol enjel oli stap blong oltaem long wan glori we i no save finis.
Wan Save Abaot Atonmen
Nao, Atonmen blong Kraes i stamba doktrin blong gospel, mo hem i doktrin we man i no andastanem gud nating aot long evri trutok we oli bin talemaot long yumi.
Plante long yumi oli gat wan save we i smol nomo mo yumi dipen long Lod mo gud hat blong Hem blong luk se bae yumi gotru long ol tes mo ol denja blong laef.
Be sapos yumi sapos blong gat fet olsem Inok mo Ilaeja, yumi mas bilivim wanem we oli bin bilivim, save wanem we oli bin save, mo laef semmak olsem we oli bin laef.
Bae mi invaetem yufala blong joenem mi blong kasem wan stret mo strong save abaot Atonmen.
Yumi mas sakemaot ol tingting blong man mo waes tingting blong ol waesman mo lisin gud long Spirit ia we yumi gat blong lidim yumi long evri trutok.
Yumi mas lukaotem samting insaed long ol skripja, akseptem olgeta olsem maen mo tingting mo voes blong Lod mo stret paoa blong Godblong Hem i sevem yumi.
Taem yumi stap rid, tingting hevi, mo prea, bae insaed long maen blong yumi, bae i gat wan pikja blong ol tri garen blong God i kamaot—Garen blong Iden, Garen blong Getsemane, mo Garen blong Emti Gref long Hol blong Ston, ples we Jisas i bin kamaot long Meri blong Magdala.
Kriesen, Foldaon, mo Atonmen
Long Iden, bae yumi luk evri samting we oli krietem olsem we bae oli stap long paradaes—i no gat ded, i no gat fasin blong gat pikinini, i gat wan taem blong gat eksperiens.
Bae yumi kam blong save se wan kriesen olsem, we man i no save long hem, i bin wan wei ia nomo blong mekem se i gat Foldaon.
Afta, bae yumi luk se Adam mo Iv, fas man mo fas woman, oli kamaot long ples blong tufala we tufala i nomo save ded mo paradaes glori blong tufala, blong tufala i kam ol fas man wetem bodi long wol ia.
Fasin blong save ded, i go wetem fasin blong mekem pikinini mo ded, bae i kam long wol. Mo from man i brekem loa, i gat wan smol taem blong traem man mo taem blong tes we i stat.
Afta, long Getsemane, bae yumi luk Pikinini blong God i pemaot man from ol ded long saed blong bodi mo spirit we i bin kam long yumi from i bin gat Foldaon.
Mo laswan, long fored blong wan emti gref long hol blong ston, bae yumi kam blong save se Kraes, Lod blong yumi i bin brekem ol rop blong ded mo i stanap blong oltaem, i win ova long gref.
Olsem ia nao, Kriesen i papa blong Taem blong Foldaon; mo tru long Taem blong Foldaon, fasin blong save ded mo ded i kam; mo tru long Kraes, fasin blong nomo save ded mo laef we i no save finis i kam.
Sapos i no bin gat Taem we Adam i Foldaon, we tru long hem ded i kam, bae i no save gat Atonmen blong Kraes, we tru long hem, laef i kam.
Blad blong Hem we I Pem Praes blong Man
Mo naoia, long saed blong Atonmen ia we i stret evriwan, we blad blong God we i bin ron i tekem i kam—mi testifae we i bin tekem ples long Getsemane mo long Golgota, mo long saed blong Jisas Kraes, mi testifae se Hem i Pikinini blong God we i laef, mo oli bin krusifaem Hem from ol sin blong wol. Hem i Lod blong yumi, God blong yumi, mo King blong yumi. Hemia miwan mi save, mo i no gat wan i talem long mi.
Mi mi wan long ol witnes blong Hem, mo long wan dei we i stap kam, bambae mi filim ol mak blong nil long ol han blong Hem mo long ol leg blong Hem mo bambae mi wasem leg blong Hem wetem wota blong ae blong mi.
Be bae mi no save gud moa bitim we mi save naoia se Hem i Pikinini blong God we I Gat Olgeta Paoa, se Hem i Sevya mo Ridima blong yumi, mo we fasin we Jisas i kam blong sevem ol man i kam mo hemia tru long blad blong Hem we i pem praes from yumi mo i no long wan narafala wei bakegen.
God i letem se bae yumi evriwan i wokbaot long laet, semmak olsem we God, Papa blong yumi i stap long laet, blong mekem se, folem ol promes, blad blong Jisas Kraes, Pikinini blong Hem bae i klinim yumi long evri sin.
Smol pat blong pikja ia, I no Folem Tingting blong mi, be mekem folem tingting blong yu, we i kam long Hari Andeson © Pacific Press Publishing
Smol pat blong pikja ia, Tomas we I Gat Tu Tingting, we i kam long Karl Henrij Blog, oli yusum wetem raet we i kam long Nasonal Histri Miusium long Frederiksbeg long Hilerod, Denmak