Ang mga Humanitarian Effort ng Simbahan: Paglilingkod ng mga Disipulo
Ang Ebanghelyo ay puno ng mga kuwento tungkol sa pagpapagaling ng Tagapagligtas sa mga may karamdaman, bulag, at lumpo. Sagana rin ang mga banal na kasulatan sa paanyaya ng Panginoon na sundin Siya, gawin ang Kanyang mga gawain, at maging tulad Niya. Upang magawa ito kailangan din nating mahabag—maghangad na tumulong at magpagaling, magdala ng pasanin, at ibsan ang dusa at paghihirap.
Ang hangaring ito ang alituntuning humihikayat upang isagawa ang mga humanitarian effort ng Simbahan sa iba’t ibang panig ng mundo—mga gawaing may pondong kusang ibinigay ng mga miyembro ng Simbahan na may ganoon ding hangarin.
Nitong mga nakalipas na taon milyun-milyong tao sa mahigit 100 bansa ang natulungan ng humanitarian services ng Simbahan na nagbibigay ng malinis na tubig sa malalayong lugar, nag-aambag ng magagamit ng mga di makapaglakad, tumutulong na mapigilan o magamot ang pagkabulag, nagliligtas ng nanganganib na buhay ng mga sanggol, nagbabakuna laban sa sakit, at tumutulong na maparami ang ani at mapagbuti ang nutrisyon.
Malinis na Tubig
Ang tubig para sa inumin, pagluluto, paglilinis ng katawan, at irigasyon ay salat sa maraming lugar sa mundo. Madalas na naiipon lang ito sa iilang galong tubig mula sa ilog, lawa, o mababaw na balon na puno ng dumi at mikrobyo. Maraming oras ang nauubos sa pag-igib ng tubig kaya hindi makapagtrabaho nang husto ang matatanda na makatutulong sana sa pagtustos sa pamilya.
Ang mga kabilang sa proyekto ng Simbahan para sa malinis na tubig ay hindi lang nagbibigay ng malinis na patubig kundi nagtatayo rin ng mga pasilidad para sa sanitasyon at nagtuturo ng kalinisan. Depende sa kundisyon ng lugar, maaaring manggaling ang tubig sa tubo na ibinaon sa lupa o buhanging may tubig sa ilalim, o hinukay na lupang pinaligiran ng plastik o metal, o mula sa tubig sa bukal na pinadaan sa tubo padaloy sa komunidad.
Natatapos ng mga kontratista sa lugar ang mga proyekto sa tulong ng mga taong mabibiyayaan ng tubig. Ang mga komite sa lugar ang namamahala sa patubig na makapagtutustos sa maraming henerasyon. Ito ang sabi ni Matt Heaps, tagapamahala ng proyekto para sa malinis na tubig, “Ang totoo, ang aming mga proyekto ay mas tungkol sa tao kaysa patubig. Ginagawa ang lahat sa layuning tulungan ang mga tao at komunidad na matustusan ang sarili.”
Mula pa noong 2002, 235 proyekto sa 54 na bansa ang nakapagbigay ng malinis na tubig sa mahigit limang milyong tao.
Ang Handog para Makakilos
Para sa mga di makakilos nang mag-isa, ang makatanggap ng wheelchair, walker, o binting gawa sa prosthetic ay parang tulad ng nabigyan ng mga pakpak. Ang pag-aaral, pagtatrabaho, pagsisimba, pakikihalubilo, at paglilingkod sa iba ay biglang naging posible lahat.
Nakakalungkot na sa maraming lugar sa mundo, maging ang pinakasimpleng gamit sa paglakad ay wala o hindi kayang bilhin. Sa pagbibigay ng gayong mga gamit, tinanggal ng Latter-day Saint Charities ang pisikal na hadlang na pumipigil sa maraming tao na maabot ang kanilang potensyal. Sa pakikipagtulungan sa mga lokal na organisasyon at pagbili mismo sa mga gumagawa nito sa rehiyon hangga’t maaari, sinisiguro ng proyektong nagbibigay ng wheelchair na akmang-akma ito sa pangangailangan ng tatanggap. Tutulong din ito na siguruhing mabibigyan ng follow-up therapy ang mga tatanggap ng wheelchair at na may makukuhang piyesa at mahuhusay na tagakumpuni para rito. Sa nakalipas na siyam na taon, mahigit 300,000 tao ang nakakilos nang mabuti dahil sa programang ito.
Paggamot sa mga Mata
Sa panahong ito ilan sa uri ng pagkabulag ang maaari nang magamot, maiwasto, o mapigilan dahil sa medisina. Ang proyekto ng Simbahan sa paggamot sa mga mata ay nagsisikap na mapahusay ang pangangalaga sa mga mata at hadlangan ang anupamang problema sa mata sa pamamagitan ng pagbibigay ng kinakailangang gamit at kasanayan mula sa mga espesyalista. Ibinibigay ng mga espesyalistang ito sa mga doktor sa lugar ang mga gamit, suplay, at pagsasanay na kailangan sa pag-aalaga ng kanilang mga pasyente sa oras na umalis na sa bansa ang mga espesyalista. Sa Mongolia, halimbawa, ang mga lokal na manggagamot doon na sinanay sa pamamagitan ng proyekto ay nagsasagawa na ngayon ng libreng pagsusuri sa may mga diperensya sa retina dulot ng diabetis.
Pagsagip sa mga Nanganganib na Bagong Silang na Sanggol
Ang unang iyak ng sanggol ay musika sa pandinig ng ina. Ngunit madalas, sa maraming lugar, sa halip na pag-iyak at masayang tinig ng nars o komadrona, walang maririnig bunga ng baradong daanan ng hangin. Kalunus-lunos ito, dahil sa pamamagitan lamang ng murang bulb syringe at subok na paraan ng pagsagip, kadalasang maililigtas na ng mga doktor, nars, at komadrona ang mga sanggol sa bingit ng kamatayan.
Ang proyektong neonatal resuscitation training (NRT) ng Simbahan ay gumagamit ng mga espesyalistang magsasanay sa mga doktor, nars, at komadrona sa lugar tungkol sa NRT. Hinihingi ng programa sa bawat nakikibahagi na magbigay ng pagsasanay sa ibang komadrona sa kanilang lugar.
Sa pamamaraang ito napapabilis ang pagpapalaganap ng kaalaman sa pagsagip ng buhay at pagbibigay ng mga suplay sa iba’t ibang bansa. Napapahusay ang mga panggagamot, nasasagip na ng mga tumutulong sa pagpapaanak ang mga sanggol na nahihirapang huminga, at napagpapala ang mga pamilya. Si Liz Howell, isang international health coordinator sa LDS Charities, ay nagsabi, “Tunay ngang isa itong programang nagpapabago at nagliligtas ng buhay.”
Kalusugan at Lakas
Ang mga sakit na hindi na banta sa buhay ng mga bata sa mauunlad na bansa ay laganap pa rin sa maraming bansa. Sakit na tigdas ang isa sa mga pangunahing sanhi ng kamatayan ng mga bata, ayon sa World Health Organization.1
Ang pagkagutom at kakulangan sa nutrisyon ay laganap din, na nagpapaudlot sa paglusog ng katawan at isip ng mga bata at nagpapatindi ng posibilidad na magkaroon sila ng sakit na gaya ng tigdas. Ayon sa United Nations Food and Agriculture Organization, “ang kakulangan sa nutrisyon at kailangang bitamina at mineral ay nagiging sanhi ng kamatayan ng mahigit limang milyong bata kada taon.”2
Noong 2003 nakiisa ang Simbahan sa international Measles Initiative and Partnership. Bukod sa ambag na salapi, malaki ang ginampanan ng Simbahan sa pag-organisa, pagsulong, at pagsasagawa ng mga kampanya sa bakuna sa mga lokalidad gamit ang mga boluntaryo ng Simbahan. Mula 2003, tinatayang 56,000 miyembro ng Simbahan ang nakapagbigay na ng 600,000 oras ng serbisyo sa 32 bansa. Mula 2001, ang Measles Initiative and Partnership ay nakapagbakuna na ng 600 milyong bata at kabataan. Ang bilang ng mga namamatay sa tigdas sa buong daigdig ay bumaba mula sa 750,000 noong 2000 at naging 197,000 noong 2007.3
Laging kabilang sa mga humanitarian effort ng Simbahan ang pagpapakain sa mga nagugutom. Ngunit ngayon ang talamak na pagkagutom at kakulangan sa nutrisyon ay nilulutas na rin ng isang proyektong ukol sa pagkain na nagtuturo sa mga komunidad sa lalawigan at lungsod ng pagtatanim ng gulay at pag-aalaga ng maliliit na hayop para sa protina. Marami sa mga pamamaraan na itinuturo ay batay sa maraming taon ng pagsasaliksik ng Benson Institute, na naging bahagi ng Latter-day Saint Charities noong 2007.
Sinabi ng tagapamahala ng proyekto na si Wade Sperry na kapag naging malusog ang katawan ng tao, sisigla rin ang kanilang damdamin at espirituwalidad.
Pagsunod kay Jesucristo
Kapag may nakikita silang naghihirap at nangangailangan sa mundo, kusang tumutulong ang mga tagasunod ni Cristo. Ang mga humanitarian effort na ito ay naglalaan ng organisado at epektibong paraan na maisasagawa ng mga miyembro ng Simbahan ang hangarin nilang sundin ang utos ng Tagapagligtas: “Katotohanan, katotohanan, sinasabi ko sa inyo, ito ang aking ebanghelyo; at alam ninyo ang mga bagay na kinakailangan ninyong gawin sa aking simbahan; sapagkat ang mga gawang nakita ninyong ginawa ko ay siya rin ninyong gagawin; sapagkat yaong nakita ninyong ginawa ko ay gayon din ang nararapat ninyong gawin” (3 Nephi 27:21).
Kabilang sa pagsisikap ng Simbahan na sundin ang Tagapagligtas ay ang tulong-pantao na malawak ang sakop at nagtatagal.
Paglalawaran ni Howard M. Collett