Ongoongo ʻo e Temipalé
Temipale Koupeniheikeni Tenimaʻaké
Naʻe ʻuluaki fakatapui ko e falelotu Piliovehí (Priorvej) ofi ki he loto kolo ʻo Koupeniheikení ʻi Tenimaʻake ʻi he 1931, ne hoko ʻa e fale piliki kulokula fakaʻofoʻofá ni ko e temipale ia hono 118 ʻo e Siasí ʻi he taimi naʻe fakatapui ai he ʻaho 23 ʻo Mē 2004. Naʻe fakamatalaʻi ʻo pehē ko ha “temipale foʻou ʻi ha fale motuʻa.”1
Ko hono fuofua faʻunga ki tuʻá—ʻa ia ʻoku kau ai hono teuteu ʻi muʻá mo hono ngaahi ʻotu pou he ongo tafaʻaki ʻo e matapā papá—naʻe fakahaofi pē pea toe fokotuʻu kae lahi hono fakafoʻou ʻo loto. ʻOku fakafōtunga ʻe he ngaahi fakatātā he sioʻatá mo e ngaahi tā-valivali ʻo e ngaahi feituʻu fakalotofonuá ʻa e makehe ʻo e ngaahi tākiekina faka-Tenimaʻake mo e faka-Suēteni ʻo e temipalé. ʻOku ʻi ai ha ngaahi matapā sioʻata lōloa ʻe nima naʻe ngaohi mei ha ngaahi sioʻata fakatātā ʻoku tuʻu fakahokohoko ʻi he ongo tafaʻaki ʻo e falé, pea ʻoku ʻi ai hano ʻato makehe mo e tumuʻaki fuopotopoto naʻe fakatou ngaohi mei he kopá.
ʻI he fakatapui ʻo e temipalé naʻe lotu ai ʻa Palesiteni Hingikelī ke ʻaloʻofa ʻa e Tamai Hēvaní ʻo “ueʻi ʻa e loto ʻo kinautolu kotoa pē ʻoku ngāue hení ke mahino ʻa Hoʻo ngaahi taumuʻa fakalangí pea mo Hoʻo ngāue nāunauʻiá ʻi hono “fakahoko ʻa e moʻui taʻe faʻamate mo e moʻui taʻengata ʻa e tangatáʻ” (Mōsese 1:39).2
Ko e falelotu ko ʻeni naʻe langa ʻe he kāingalotú, naʻe fakatapui ia ʻi he 1931 pea ngāue ʻaki ki mui ko ha toitoiʻanga mei he pomú he lolotonga ʻo e Tau Lahi Hono II ʻa Māmaní. Hili hono fakaleleiʻi ʻo e fale, ne hoko ia ko e temipale hono 118 (ʻi laló).