Pōpoaki ʻa e Kau Palesitenisī ʻUluakí
Ngaahi Kaungāmeʻa Tōnungá
Ko e taha ʻo ha fakalāngilangi maʻongoʻonga ʻe lava ke fai ʻe he Fakamoʻuí ko Haʻane ui kitautolu ko ha “ngaahi kaungāmeʻa.” ʻOku tau ʻiloʻi ʻokú Ne ʻofa haohaoa ki he fānau kotoa ʻa ʻEne Tamai Hēvaní. Pea ko kinautolu ne faivelenga ʻi heʻenau ngāue mo Iá, ʻokú Ne ʻai ki ai ʻa e hingoa makehé ni. ʻOku mou manatuʻi ʻa e lea mei he vahe 84 ʻo e Tokāteline mo e Ngaahi Fuakavá: “Pea ko e tahá ʻoku ou pehē kiate kimoutolu, ʻe hoku ngaahi kaumeʻa, he ʻe kamata mei heni te u ui ʻa kimoutolu ko e ngaahi kaumeʻa, ʻoku ʻaonga ke u fai kiate kimoutolu ʻa e fekaú ni koeʻuhí ke mou hoko ʻo tatau mo hoku ngaahi kaumeʻa ʻi he ngaahi ʻaho naʻá ku ʻiate kinautolu aí, ʻo nau fononga atu ke malanga ʻaki ʻa e ongoongoleleí ʻi hoku mālohí” (T&F 84:77).
ʻOku tau hoko ko Hono ngaahi kaungāmeʻa ʻi heʻetau fakafofongaʻi Ia ʻo tokoniʻi ha niʻihi kehe. Ko e sīpinga haohaoa ia ʻo e faʻahinga kaungāmeʻa ʻoku totonu ke tau aʻusiá. ʻOkú Ne fie maʻu ʻa e lelei tahá pē maʻá e fānau ʻa ʻEne Tamai Hēvaní. Ko ʻenau fiefiá ko ʻEne fiefiá ia. ʻOkú Ne ongoʻi ʻenau loto mamahí ʻo hangē pē ko ʻEne mamahi he naʻá Ne totongi huhuʻi maʻa ʻenau ngaahi angahalá, ʻo Ne ʻai kiate Ia ʻenau ngaahi mamahí, fuesia kotoa ʻenau ngaahi faingataʻaʻiá, mo ongoʻi ʻenau ngaahi fakaʻānauá kotoa. Ko ʻEne ngaahi taumuʻá ʻoku maʻa. ʻOkú ʻikai ke Ne kumia ha lāngilangi Maʻana ka ke ʻoatu ʻa e lāngilangi kotoa pē ki Heʻene Tamai Hēvaní. Ko e kaumeʻa haohaoa, ko Sīsū Kalaisí, ʻoku taʻe-siokita ʻi Heʻene foaki kakato ʻa e fiefiá maʻá e niʻihi kehé.
Ko kitautolu kotoa pē kuo tau fakahoko ʻa e fuakava ʻo e papitaisó kuo tau palōmesi ke muimui ʻi Heʻene sīpingá ʻo fefuaʻaki ʻa e ngaahi kavenga mafasia [ʻo hangē ko ia te Ne] fai maí. (vakai, Mōsaia 18:8).
ʻI he ngaahi ʻaho siʻi ka hoko maí te mou maʻu ai ha ngaahi faingamālie lahi ke hoko ko ha kaungāmeʻa ʻo fakafofongaʻi Ia. Mahalo naʻa hoko ia ʻi haʻo fononga ʻi ha hala efua. Mahalo naʻa hoko ia ʻi haʻo tangutu ʻi ha loto lēlue. Mahalo naʻa hoko ia ʻi haʻo kumi hao tangutuʻanga ʻi ha fakatahaʻanga ʻa e Siasí. Kapau te ke sio fakalelei, te ke lava ʻo fakatokangaʻi siʻa taha ʻokú ne haʻamo holo ha kavenga mamafa. Mahalo ko ha kavenga mafasia ʻo e loto mamahí, taʻelatá pe taʻe-fiemaʻuá. ʻE malava pē ke ke fakatokangaʻi ia kapau naʻá ke lotua ʻa e Laumālié ke ne ʻoatu ha mata ke ke malava ʻo mamata ki he lotó mo palōmesi ai ke hiki hake ʻa e ngaahi nima ʻoku tāupe ki laló.
Mahalo ko e tali ki hoʻo lotú ko ha fofonga ʻo hao kaungāmeʻa fuoloa, ko ha taha kuo lauitaʻu e ʻikai ke mo toe femātaaki ka ʻoku haʻu fakafokifā ki hoʻo fakakaukaú mo ho lotó ʻa ʻene ngaahi fie maʻú ʻo hangē ko ha ngaahi fie maʻu pē ia ʻaʻaú. Ne ʻosi hoko kiate au ha meʻa peheni. Kuo faitokonia au ʻe haku ngaahi kaungāmeʻa fuoloa ʻoku nofo mamaʻo ʻi hono fakalotolahiʻi au ʻi ha ngaahi taʻu lahi pea ko e ʻOtuá pē taha naʻá Ne lava ke fakahā kiate kinautolu ʻa ʻeku kavenga mafasiá.
Kuo ʻosi kole mai ʻa e kau palōfita moʻui ʻa e ʻOtuá kiate kitautolu ke tau hoko ko ha ngaahi kaungāmeʻa tōnunga kiate kinautolu ʻoku ului mai ki he Siasí pea mo tau kau atu ʻi hono fakahaofi ʻo kinautolu kuo hē atú. Te tau lava ʻo fai ʻeni, pea te tau fakahoko ia kapau te tau manatuʻi maʻu pē ʻa e Fakamoʻuí. Ko e taimi ʻoku tau ala atu ai ke tokoni mo fakamaʻamaʻa ha kavenga, ʻokú Ne ala fakataha ai mo kitautolu. Te Ne tataki kitautolu kiate kinautolu ʻoku faingataʻaʻiá. Te Ne tāpuakiʻi kitautolu ke tau ongoʻi ʻa ia ʻoku nau ongoʻí. Pea ʻi heʻetau kīkīvoi ʻi he feinga ke tokoniʻi kinautolú, ʻe foaki ʻo lahi pea mo toe lahi ange kiate kitautolu ʻa e meʻafoaki ʻo e ongoʻi ʻo ʻEne ʻofa kiate kinautolú. ʻE hanga ʻe he meʻa ko iá ʻo ʻomi kiate kitautolu ha loto lahi pea mo ha ivi ke tau toutou tokoni ʻi he faivelenga.
Pea ʻi he moʻuí ni mo ʻitāniti, te tau ongoʻi ʻa e fiefia ʻo hono talitali lelei kitautolu ki he feohiʻanga ʻo Hono ngaahi kaungāmeʻa tōnungá. ʻOku ou lotua ʻa e ngaahi tāpuaki ko iá maʻatautolu kotoa pea mo kinautolu te tau tokoniʻí.
Ko e kaungāmeʻa haohaoa ko Sīsū Kalaisí, ʻoku taʻe-siokita ʻi Heʻene foaki kakato ʻa e fiefiá maʻá e niʻihi kehé. ʻOku tau hoko ko Hono ngaahi kaungāmeʻa ʻi heʻetau fakafofongaʻi Ia ʻo tokoniʻi ha niʻihi kehe.
Faitaaʻi ʻe John Luke; Ko Ia Ke Mou ʻAlu ʻo Akoʻi ʻa e Puleʻanga Kotoa Pē, tā ʻe Harry Anderson