Faimamago po o le Le Faimamago
Sa le mafai ona ou manatuaina le tali o se tasi fesili o le suega. E matua faigofie lava ona autilo atu ou mata i tali a se tamaitiiti o la matou vasega.
O a’u o se teine a’oga faatausi mai e 17 tausaga le matua, sa ou iloa le faigata o lo’u tausaga lona lua i le kolisi. (I Filipaina e maea a matou aoaoga mai i le aoga maualuga i le 16 o tausaga.) Sa matua faavaivaia au i le le motu o suega, galuega faatino e sailiili i ai, ma meaaoga e tatau ona faitauina. Sa ou lagona e pei lava e i ai a ni mea lapotopoto uliuli i lalo ifo o o’u mata, ona e tele lava ina le lava sa’u moe. E ui lava i le mamafatu o galuega, ae sa ou taumafai lava ia ou manatua o le “ositaulaga e aumaia ai faaamanuiaga o le lagi.”1
Sa ou iloa afai ou te galue malosi, o le a maua so’u lumanai lelei. I taimi uma lava ou te lagona ai le faavaivai ma ou taoto ai i lo’u moega ae le suesue, ou te vaai faalemafaufau ai i lo’u faanoanoa ma le toilalo lea o le a ou lagonaina i le aso e sosoo ai pe a fai sa le lelei sa’u suega po o se meaaoga. Sa lava ia uunaiga e ala ai ou mata ina ia ou suesue.
O le toatele o tamaiti o la matou vasega e le fiafia pe a latou maua se togi maualalo i se suega. Ae peitai, sa lei mananao i latou e galulue ma suesue malosi. O se taunuuga, sa tele ina “fesoasoani” tamaiti aoga i isi e fefaasoaai tali i le taimi o suega, ma faataga isi e vaai i a latou pepa pe a le o vaai atu le polofesa. Sa tele ina faaosoosoina au e faia lea mea e tasi, ae ou te lei faia. Sa ou faitau i le tele o taimi i mekasini a le Ekalesia, o tagata o le Ekalesia e tatau ona i ai ni tulaga faatonuina mualuluga, o lona uiga e leai se faimamago. O lea sa ou suesue malosi ai ma aloese mai i faaosoosoga, e ui lava i nisi taimi o le a ou mauaina ni togi maualalo ifo i lo isi tamaiti, ona sa fesoasoani le tasi i le isi.
I se tasi o aso faapitoa sa i ai au vasega mai i le 7:00 i le taeao e oo lava i le 7:00 i le afiafi, ma sa i ai au suega na faatulaga e faia i vasega taitasi. Sa ou suesue i laupepa e 10 mo la’u suega muamua na o au. “Pe faapefea ona ou mafaia nei mea uma?” Na ou mafaufau ai. Ae faafetai lava, sa lelei la’u suega muamua. I le taimi o le malologa sa ou suesue mo le isi. Ina ua ou alu i le vasega e amata le suega, sa ou iloa ai ou te iloaina tali uma o fesili taitasi sei vagana ai le fesili e tasi. “Pe faapefea ona tupu lenei mea?” sa ou mafaufau ifo ai. “Sa ou suesue malosi mo lenei suega. E tatau ona ou iloa lenei tali!”
Ao tataina ma le ita tele la’u peni i lo’u nofoa, sa oo mai ia te au [se lagona] e le umi lava se taimi e faliu ai lo’u ulu, ma ma afe i luga o’u lauulu, ma ou autilo atu ai i tali a tamaiti o la’u vasega. “E mafai ona faia na o le faatasi lenei mea,” sa ou tomanatu ai, “ma mafai ai ona ou suipi i le suega. E le afaina lava pe a na o le tasi. I le isi itu, e le o fetaui mo au. Ou te suesue malosi, ae ou te maua lava togi maualalo atu nai lo tamaiti o la’u vasega aua ou te le faimamago!” Ae, sa le lelei lava sa’u faalogoga. Sa ou minominoi solo i lo’u nofoa, ma taumafai e faia se filifiliga: faimamago po o le le faimamago.
Ona fai mai lea o se leo mai totonu o au, ua faapea mai, “Leai, Shery! O le faimamago o se mea sese, ma ua e iloaina!” Na faafuasei lava ona ou iloaina e tusa lava pe sa’o uma la’u suega, ae ou te le fiafia i ai pe afai ou te faimamago. Sa faalagolago mai lo’u Tama Faalelagi ia te au ou te faia le filifiliga sa’o—o le filifiliga lenei o le suega moni lea.
I le taimi lava lea sa oo mai ai i lo’u mafaufau se mau sa ou aoaoina i le Aoga Sa: “Pe faapefea ona ou faia lenei mea leaga tele, ma ou agasala ai i le Atua?” (Kenese 39:9). Na ou iloa sa fesoasoani mai le Tama Faalelagi i ou luitau e le mafaitaulia, e aofia ai le tele o suega ma meaaoga a le aoga. Pe faapefea ona ou faagaloina mea uma ua Ia faia mo au ae filifili ia agasala?
E oo mai i lenei aso ou te le o manatuaina le faaiuga o lena lava suega. Pe sa ou mauaina le tali pe leai, ou te le o toe manatuaina. Ae sa ou manatua pea e le aunoa le lagona lelei sa ou mauaina i le faia o le filifiliga sao.
I le avea ai ma se tausaga tolu i le aoga i le taimi lenei o loo ou feagai pea ma le anoanoai o meaaoga ma faaosoosoga lava e tasi; ae peitai, o le filifiliga ia aua nei faimamago e le faigata aua ua leva ona ou faia lena filifiliga, i le taimi a o sili atu ona faigata le tetee atu i faaosoosoga. Sa ou aoaoina o le fiafia ma le faamalieina i le mauaina o togi maualuluga e sili atu pe a ou galue malosi ma ausiaina. O le amioleaga, e le o le fiafia lea (tagai Alema 41:10). O le fiafia moni e maua mai i le tausia o poloaiga ma mulimuli i fautuaga a lo tatou perofeta ma isi taitai o le Ekalesia. Ou te matuai talitonu i upu “Tausi Poloaiga. O loo i ai i i le saogalemu ma le toafilemu.”2
Ata na tusia e Gregg Thorkelson