Faamatalaga

O Se Tausaga Maoae o le a Oo Mai

Ou te fiafia i foliga fou o le Liahona. Ou te fiafia i le faiga o loo faatulaga ai tusiga i le matutua o le au faitau, aemaise le vaega a le autalavou, lea e matuai fesoasoani tele ia te au. Ou te fiafia i vaega fou, aemaise le vaega o le Faaopoopoga o loo maua i le Initoneti. O loo ou tulimatai atu i se tausaga maoae!

Roland T., 17 tausaga, Pangasinan, Filipaina

Na Ou Lagonaina le Agaga

O ananei na ou lagonaina ai malosi le Agaga ao ou faitau i le Liahona fou. O au o le peresitene o Tamaitai Talavou, ma ina ua ou vaai i le faatulagaga fou, sa ou vaaia le maoae o le popole o le Tama Faalelagi mo le autalavou, e pei ona i ai nei se vaega ua faapitoa lava mo i latou. Ou te iloa o nei suiga o le a manuia ai lo’u aiga, au tamaitai talavou, ma tagata o le Ekalesia i le lalolagi atoa.

Shanin Palma Sanhueza, Chile

O Mea e Sili ona Matagofie i Mea Uma

O tausaga ua mavae na sui uma ai le mauaina mai o au mekasini a le Ekalesia i le Liahona. Na ou maua ai mea e sili ona matagofie i mekasini uma ma se vaaiga lautele atu i le lalolagi atoa. Ae, o lona faataatiaga na nenefu i nisi taimi.

Ae o le Liahona, fou lenei, ua tea uma ai ou atugaluga i le faataatiaga, ma ua sili atu ona lelei le tulimata’iga o anotusi ma tele ia mataupu. O le taimi lenei, ua sili atu nai lo se isi taimi, o le a faaauau ai ona avea le Liahona ma se vaega o au suesuega patino o le talalelei.

Larry D. Kump, West Virginia, ISA