I Tala Fou
Lagolago e Faifeautalai Faamisiona Tala Faasolopito o Aiga
Talu ona faalauiloa mai e le Ekalesia le polokalama fou o le FamilySearch i le tausaga ua mavae, ua toatele tagata o le Ekalesia ua faataitaia le polokalama fou mo le taimi muamua.
Ina ia lagolago atu ia i latou e fou i le polokalama pe o i ai ni fesili e uiga i galuega o talafaasolopito o aiga i lona tulaga aoao, ua saunia ai e le Ekalesia ni punaoa eseese, e aofia ai le Worldwide FamilySearch Support.
O le polokalama o le FamilySearch na amataina i le 2005 i nai volenitia toalaiti na ofoina atu le fesoasoani i le galuega o talafaasolopito o aiga. Ua faatupulaia le polokalama e aofia ai le toeitiiti 1,200 o faifeau faamisiona fesoasoani ua i ai i le lalolagi atoa.
O faifeau faamisiona fesoasoani o loo i ai i atunuu eseese e 34, e ofoina atu le lagolago i fesili eseese e uiga i talafaasolopito o aiga i le tele o gagana ma le tele o taimi eseese a itulagi.
Na auauna atu Sister Cecilia Dimalaluan o se faifeau faamisiona fesoasoani i Filipaina talu mai Aokuso 2008 ma fai mai a ia, e fiafia tele i le avanoa e faasoa atu ai i isi lona malamalama i talafaasolopito o aiga. O ia o se tasi o uluai Filipino na aoaoina faamasani o se faifeau faamisiona fesoasoani i Filipaina, e tautala o ia faaSepuano, Igilisi, ma le Takaloka. E fesoasoani o ia i tagata o le Ekalesia ma tagata e le auai i le Ekalesia mai eria lata ane, e aofia ai Initia, Meleisia, Maikolenisia, Monokolia, ma Sigapoa, ia iloa mataupu faavae autu o talafaasolopito o aiga.
O faifeau faamisiona fesoasoani e masani ona valaauina e auauna atu mo le 30 masina. O faifeau faamisiona uma e galulue mai o latou lava aiga po o nofoaga autu o talafaasolopito o aiga i o latou eria, lea latou te maua ai aoaoga faamasani i le polokalama ma le fesoasoani i lea aso ma lea aso. Latou te tali atu i fesili e ala i le telefoni po o le i-meli, ma talu ai ona o lo latou taape solo i le lalolagi, o lea e avanoa ai se tagata mo le 24 itula o le aso, i aso uma, vagana ai taeao o Aso Sa.
“Ou te fiafia i le mafai ona ou auauna atu i tagata e tautatala faaPeretania mai le lalolagi atoa, e fesoasoani ia i latou i le faiga o o latou talafaasolopito o aiga,” o le tala lea a Sister Connie Cheney o Pleasant Grove, Iuta, ISA, o le o loo auauna atu nei i lana misiona lona lua ma le Lagolago a le Lalolagi Atoa.
O le auala faigofie e faafesootai ai faifeau faamisiona fesoasoani e ala lea i le Initoneti, i le contact.familysearch.org pe ala i le i-meli i le support@familysearch.org.
O le Uepi saite o le FamilySearch e maua ai numera telefoni e vili fua mo le faafesootaiina o faifeau faamisiona fesoasoani i itu eseese o le lalolagi.
I eria e le maua ai le Initoneti, e sili atu le faafesootai o faifeau faamisiona mo talafaasolopito o aiga i le eria, talanoa i se faufautua o le uarota po o le paranesi mo talafaasolopito o aiga, pe asiasi i se nofoaga autu i le lotoifale mo talafaasolopito o aiga.
Tusiga na saunia e Lauren Allen, Mekasini a le Ekalesia
Maua i le Initoneti Tusitusiga Paia FaaSaina ma le FaaKorea
Ua faalauiloa e le Ekalesia ni lomiga fou se lua o tusitusiga paia a le AAG: o le lomiga FaaKorea ia Oketopa 2009 ma le lomiga FaaSaina (mataitusi tuai) ia Tesema. E mafai ona maua le lomiga FaaKorea i le scriptures.lds.org/ko, ae maua le lomiga FaaSaina i le scriptures.lds.org/ch.
O saite o tusitusiga paia FaaKorea ma le FaaSaina o loo i ai anotusi o le tusi fusitolu, (o le Tusi a Mamona, Mataupu Faavae ma Feagaiga, ma le Penina Tau Tele) ma le Taiala i Mau, lea o loo aofia ai se vaega o fesoasoani aoga mo suesuega ma se lisi faaalafapeta o autu o le talalelei. O lomiga o tusitusiga paia i le FaaIapani, Sepuano ma le Takaloka ua faatulagaina e lolomi i le initoneti i le 2010.