O se Afiafi Faaleaiga Vava-Mamao
I le avea ai o se aiga e le misi lava a matou afiafi faaleaiga; peitai, e tele lava ina malaga lo’u tama mo se taimi umi mo lana galuega. O lona uiga, o nisi taimi o le a ia malaga ese atu ma le atunuu pe a oo i le taimi o le afiafi faaleaiga.
I le lua tausaga talu ai, ina ua i ai se masini komepiuta a lo’u tama e mafai ona feaveai, sa mafaufau se tasi o nai o’u tei, “Pe o le a le mea e le faia ai le tatou afiafi faaleaiga ma Tama i luga o le Initoneti?”
Mai i lena taimi, a malaga ese lo’u tama ae ua oo i le taimi e fai ai le matou afiafi faaleaiga, matou te malilie faatasi uma i se taimi, ma fesootai loa. E mafai ona matou vaai ma faalogo ia te ia, ma e mafai foi ona ia vaai ma faalogo mai ia i matou. O le Initoneti ma komepiuta sa mafai ai e lo matou tama ona auai mai i a matou afiafi faaleaiga.
Matou te lei tau o ese mai ia matou taimi faatulagaina: afai o Tama ua i ai le lesona, mo se faataitaiga, e na te faia lava. O se tasi o masani a lo matou aiga o le iloiloina lea o sini a le tagata lava ia i vaiaso taitasi; ma e le o toe taofia lava. Ma le isi mea taua: o lo matou faitauina lea o le Tusi a Mamona o se aiga o se mea o loo faifai pea i le taimi nei, aua ua leai so matou ’alofaga mai le le faitauina.
E faaaogaina foi e lo’u tama le Initoneti e fesootai mai ai ia i matou i isi auala. Pe a malaga ese atu o ia mai lo matou aiga i Peru, e fesootai mai ma iloa a matou mea o loo fai ma le mea o loo matou i ai. Ma pe a oo i le taimi o faatalanoaga po o fonotaga faaleaiga, e faia lava e tusa ai ma le taimi faatulagaina, e tusa lava pe o malaga o ia.
E tele lava auala lelei ma le aoga o tekinolosi lea e tele ina tatou le faaaogaina ai i se auala lelei ona tatou te fefefe i tulaga le lelei e mafai ona aafia ai i tatou. Ae peitai, afai tatou te faaaogaina tekinolosi ma le tatau ma le lotomaualalo, e mafai ona fesoasoani tele.
Matou te lagonaina le faafetai mo le Initoneti aua sa avea o se meafaigaluega maoae e aveesea ai ni faalavelave sa ono taofia ai lo matou aiga mai i le nofo vava mamao.
Sa fesili se tasi o ou tei, “O le a le mea e le faia ai le tatou afiafi faaleaiga ma Tama i luga o le Initoneti?”
Ata na tusia e David Stoker