Osooso i le Paō o le Fati Faa-Iamaika

Saunia e Megan Withers

I se afiafi mafanafana i Kingston, Jamaica, o le a e maua ai Samuelu (10 tausaga) ma Giordayne (7 tausaga) o loo osooso i fafo ma o la tei e toalua. Ao latou osooso, latou te pepese i le pao:

1, 2, 3, Aunty Lulu,
4,5,6,  Aunty Lulu,
7,8,9,  Aunty Lulu,
10, Aunty Lulu, 
10, Aunty Lulu.

O Samuelu ma Giordayne o ni tamaiti fiafia se toalua e lelei tele i le tele o mea. La te fiafia e taaalo i taaloga, suesue malosi i le aoga, fesoasoani i le fale, ma avea o ni faataitaiga i ai latou o loo siomiaina i laua i o laua mata fiafia ma uiga tausaafia.

Aso o le Aoga

I Jamaica, e i ai le aso faapitoa mo Alii ma Tamaitai i tausaga uma. I le Aso Mo Tamaitai, e le o ai alii i le aoga. Nai lo lena, e mafai ona o tina ma o latou alo tamaitai i le aoga. E i ai le latou faaaliga taleni, o le tauvaga sipelaga upu, ma isi gaoioiga mananaia.

Sa filifilia Giordayne mai lana vasega e tauva i le tauvaga sipelaga upu, ma sa ia manumalo ai. “O le upu ou te fiafia lava e sipela o le environment (siosiomaga),” o le tala lea a Giordayne.

I le Aso Mo Alii, e mafai foi ona auai atu tama mo o latou atalii i le aoga. Sa auai atu Samuelu i le tauvaga tusitusi. Sa ia tusia se tala na faamatala ai le auala na ia faaalia ai le faaaloalo ia te ia lava ma isi. Sa manumalo foi o ia i le tulaga muamua.

O Se Asiasiga i le Malumalu

Ua sagisagi fiafia atu Samuelu i le aso e mafai ai ona ia auai atu i le malumalu. Mo le tele o aiga i Jamaica, o se ositaulaga tele le asiasi atu i le malumalu aua e leai se malumalu iina. E taugata tele le o i le Iunaite Setete e auai ai i le malumalu.

E laki lava, sa mafai ona malaga le aiga o Samuelu ma Giordayne. Fai mai Samuelu, “O le matou tafaoga faatasi o se aiga na sili ona ou fiafia i ai o le taimi lea sa matou o ai i Niu Ioka e asi le uso o lou tina. Sa matou vaai i le Malumalu a Manhattan. Nao le pau lava lena o le malumalu ua ou vaai i ai.”

Sa matua fiafia le aiga atoa ina ua tatalaina le Malumalu i Panama Aai o Panama i le 2008 aua e tau le faigata le o ai iina. Faatasi pe faalua i le tausaga, e malaga tagata o le Ekalesia o Jamaica i le Malumalu i le Aai o Panama. “Ua ou fiafia lava e alu i le malumalu pe a atoa lou 12,” o le tala lea a Samuelu.

O se Tali i le Tatalo

I se tasi taimi sa tau tapunia ai le kamupani a le latou tama. Sa faamalosiau atu Giordayne i lona aiga e fesili atu i le Tama Faalelagi mo se fesoasoani. “E ese le filiga o Giordayne i ana tatalo. E na te faamanatuina e le aunoa i lo matou aiga mea e moomia ona matou tatalo ai,” o le tala lea a lona tina. Sa tali mai le tatalo a le aiga ina ua maua e lo latou tama se galuega fou. “Sa ou iloa afai matou te tatalo, o le a lelei mea uma,” o le tala lea a Giordayne ma lona mautinoa.

O ni Faiaoga Maoae se Toalua

Sa moemiti Samuelu i le avea ma se faiaoga pe a matua o ia. Na te manao e aoao atu ana mataupu e fiafia i ai: o le matematika ma le faasaeinisi. O Giordayne, o le e vaai maualuga lava i lona tuagane matua, e manao foi e avea ma faiaoga.

Ua avea Samuelu ma Giordayne ma faiaoga i le taimi nei e ala i le avea ma ni faataitaiga lelei i a laua uo. E toaitiiti lava tamaiti o le latou aoga o ni tagata o le Ekalesia.

“Afai e se tasi se mea sese, e pei o le fusu, ou te fai i ai ia faia le mea sao,” o le tala lea a Samuelu.

E fiafia lava Samuelu ma Giordayne e faasoa atu le la molimau, ma e iloa e le peresitene o le Peraimeri e mafai ona ia faamoemoe ia i laua e tuuina atu se lauga pe a le auai mai le failauga. I taeao o aso sa e vave lava ona feala i luga e saunia se lauga nei tei ua manaomia i laua e faia.

E taumafai lava Samuelu ma Giordayne e auauna atu ma le faatuatua i le Alii i mea uma la te faia. Fai mai Giordayne, “Ou te iloa afai ou te faatuatua, ou te le fano, ae o le a matou toe nonofo faatasi ma le Tama Faalelagi ma Iesu Keriso.”