Ngaahi Ongoongo Fakatemipalé

Fanongonongo ʻo ha Temipale Foʻou ʻi ʻIutā

Naʻe fanongonongo ʻe Palesiteni Tōmasi S. Monisoni ʻi Sānuali ʻe langa ha temipale foʻou ʻi Peisoni, ʻIutā, ʻAmelika. ʻE tokoni ʻa e temipalé ke feau ʻa e tupulaki ʻa e memipasipi ʻi he feituʻu ko iá mo fakaʻataʻatā ange ʻa hono ngāue ʻaki ʻo e Temipale Polovo ʻIutaá, ʻa ia ko e taha ia ʻo e ngaahi temipale femoʻuekina taha ʻo e Siasí. ʻE hoko ʻa e Temipale Peisoní ko e temipale hono 15 ia ʻi ʻIutaá. ʻOkú ne ʻohake ʻa e fika fakakātoa ʻo e ngaahi temipale ʻoku lolotonga ngāué pe ʻi he tuʻunga ʻo e palani mo langá ki he 152.

Fakatapui Temipale ʻi ʻAlesona

Naʻe fakahoko ha ʻoupeni hausi ʻa e Ko e Temipale Keila Veli ʻAlesoná mei he ʻaho 23 ʻEpeleli, 2010, ki he ʻaho 15 Mē, 2010. Naʻe fakahoko ha kātoanga faiva fakafonua ʻi he ʻaho 22 Mē, 2010. Naʻe hoko atu ai pē ki hono fakatapui ʻo e temipalé ʻi he ʻaho 23 Mē, 2010, ʻi ha fakatahaʻanga fakatapui ʻe tolu. Naʻe fuofua fanongonongo ʻa hono langa ʻo e temipalé ʻi ʻEpeleli 2008. Ko e temipale ia hono tolu ʻi he vahefonua ʻAlesoná ʻi ʻAmelika.

ʻAmanaki Fakatapui e Temipale Sepuú

ʻE fakaava ʻa e Temipale Sepū Siti Filipainí ke mamataʻi ʻe he kakaí mei he ʻaho 21 Mē, 2010, ki he ʻaho 5 Sune, 2010. ʻE hoko atu ai pē ha kātoanga faiva fakafonua ʻi he ʻaho 12 Suné. ʻE fakahoko ʻa e fakatapuí ʻi he ʻaho 13 Suné, ʻi ha fakatahaʻanga ʻe tolu ʻa ia ʻe fakamafola ʻi Filipaini. ʻE fakaava leva ʻa e temipalé ʻi he ʻaho hono hokó. Ko e temipalé, ʻa ia naʻe fakahā hono langá ʻi he ʻaho 18 ʻEpeleli, 2006, ko hono ua ia ʻi Filipainí pea ko e temipale hono 133 ia ʻoku lolotonga ngāué.