Tokoniʻi Pē ‘e he Kau Hao Moʻuí ʻa e Kau Hao Moʻuí
Neongo ʻa e tāfea ʻa e kolomuʻa ʻo Filipainí, Manila, mo e ngaahi feituʻu takatakai aí ʻi he konga kimui ʻo Sepitema 2009, mei he Matangi Faka-Talopiki ko Ketisaná, naʻe ʻikai pē ʻosi ʻa e maumaú. Naʻe ʻikai pē ʻosi ia hili ʻa e tō ʻa e Afā Lahi ko Pamá ʻi he ngaahi feituʻu faka-tokelau ʻo Filipainí hili ha ʻaho ʻe valu mei ai. Naʻe ʻikai pē ʻosi ʻa e maumaú hili ʻa e toe tafoki mai ʻa Pama ʻi hono halá pea toe tō mai pē ʻi ha ngaahi ʻaho siʻi mei ai ko e matangi faka-talopiki, ʻo toe lahi ange ai ʻa e maumaú.
Ka neongo ia, naʻe ʻikai tatali ʻa e Kāingalotu Filipainí, kau ai mo e niʻihi naʻe kei faingataʻaʻia mei he ngaahi matangi kimuʻa atú, ki he ʻahia hono tuʻo tolu mo tuʻo fā ʻa Pamá, ka naʻa nau kamata leva ke tokoniʻi ʻa e kau faingataʻaʻiá.
Foaki ʻa ia Naʻe Fakahaofí
Naʻe tō ʻa e Matangi Faka-Talopiki ko Ketisaná ʻi he Kolo ko Palanakeí, ofi ki Manila, ʻi he konga kimui ʻo Sepitemá. Lolotonga e angi mālohi ʻo e matangí, naʻe tētē atu ʻa e pīsope ʻo e taha ʻo e ngaahi uooti ʻe fā ʻi he feituʻu ko iá ʻi ha tāpuni ʻo ha kula ʻi he vai naʻe aʻu ki hono kiá ke fetukutuku ha ngaahi fāmili ʻe tolu. Naʻe kaniseli ʻa e fakataha sākalamēnití ʻo e ʻaho hono hokó; kae kehe, naʻe tokolahi ʻa e kāingalotu ʻo e uōtí naʻe uesiá, neongo ʻenau faingataʻaʻiá, naʻa nau fakataha ki he falelotú ʻoku nau kei vala mohe, mo tui sāketi, ʻo fetuku mai ʻa e meʻatokoni mo e vala ke ʻave ki he kau faingataʻaʻiá. ʻI ha houa nai ʻe ua, naʻe ʻahia, vakaiʻi mo tokoniʻi ʻa e ngaahi fāmili kotoa pē ʻi he uōtí.
Hili ha pō ʻe ua mei hono veteki mo vahevahe ʻa e ngaahi maumau ʻi honau tukuikoló, naʻe fakataha atu ʻa e kāingalotu mei he feituʻu Palanakeí ki he fale fakatahaʻangá ʻo fokotuʻutuʻu ha ngaahi kato ʻe 26 kuo fonu ʻi he valá, ʻa ia naʻa nau foaki atu, kuo vahevahe mo kofukofuʻi hono kotoa.
Naʻe pehē ʻe Pīsope Falanikō ʻAtivenikula, “Ko ha efiafi fakafāmili fakangalongataʻa ʻeni ki he tokolahi ʻo e ngaahi fāmili ʻi homau uōtí.”
Naʻe ʻi ai ha fefine mei ha fāmili naʻe faingataʻaʻia naʻe tā ki he pīsopé ke ʻeke pe ko e fē ʻa e taimi ʻe lava ke nau ʻomai ai ʻenau ʻū meʻa ke foakí. Naʻe pehē ʻe Pīsope ʻAtivenikula, “Naʻá ku fuʻu ʻohovale, pea naʻe ʻikai maʻu ha lea feʻunga. Kae kehe, naʻá ku ongoʻi ʻoku ʻikai totonu ke u fakasītuʻaʻi ʻa e faingamālie ke tokoni ai e fefiné ni.”
Toutou Tokoni
ʻI he taimi naʻe tō ai ʻa Ketisana ʻi he Loto Kolo ʻo Manilá, naʻe pehē ʻe he palesiteni ʻo e Vahefonua ʻAlamino Filipainí, Puafelo Palute ko e Siʻí, naʻá ne ongoʻi ke kole ki he kāingalotu ʻi hono vahefonuá ke tokoniʻi honau kaungāʻapi ki he faka-tongá. Kae kehe, naʻe tokolahi ʻa e kāingalotu ʻi he vahefonua ʻAlaminó naʻa nau kei fakaakeake mei he Afā Lahi ko ʻEmongí, ʻa ia naʻe tō ʻi ha māhina ʻe fā kimuʻa, ʻi Mē 2009. Ko e afā lahi fakamole taha ia ke tō ʻi he kolo fakahihifo ko ia ʻo Filipainí. Ko e maʻuʻanga moʻui ʻa e kāingalotu tokolahi ko e taumātaʻu pe ko e ngoue, pea kuo maumauʻi ʻenau maʻuʻanga moʻuí ʻe he ngaahi tāfea ne hokó.
Neongo naʻá ne manavasiʻi ke kole ha meʻa lahi meiate kinautolu naʻe kei faingataʻaʻiá, naʻe kei kole pē ʻa Palesiteni Palute.
ʻI he hoʻatā ko iá, naʻe aʻu ange ʻa e kāingalotú ki he falelotú mo ha tangai vala ʻe 21, kato meʻakai ʻe taha mo ha paʻanga Filipaini ʻe $1,500.
ʻI he taimi naʻe tō ai ʻa Pama ʻi ha uike ʻe taha mei ai, ki he feituʻu fakatokelaú, naʻe toe tokoni ʻa e kāingalotu mei he vahefonua ʻAlaminó ʻo tānaki ʻa e vala, meʻatokoni, mo ha paʻanga naʻe toe lahi ange. Naʻe ʻi ai ha niʻihi ʻo kinautolu naʻa nau foaki honau taimí ke tufaki ʻa e ngaahi meʻa naʻe foakí.
Naʻe pehē ʻe Palesiteni Palute, “Naʻa mau fie tokoni pē. Naʻe ʻikai te mau ʻiloʻi te mau tānaki ha meʻa lahi pehē. Naʻe fakalahi ʻemau tuí, fakalahi ʻemau ʻofa fakatokouá, fakamālohia ʻemau ngaahi fakamoʻoní, pea toe loloto ange ʻemau ʻiloʻi ʻa e ʻofa ʻa e Fakamoʻuí mo ʻEne Fakaleleí.”
Foaki Taʻesiokitá mo e Loto Hangamālié
Naʻe uiuiʻi ʻa ʻEletā Kenitolo ʻAila, ʻa ia ʻokú ne ngāue mo hono uaifí ʻi he polokalama Paʻanga Tokoni Fakaako Tuʻumaʻú, ke tokangaʻi mo fokotuʻutuʻu ʻa hono tufaki ʻo e ngaahi nāunaú. Naʻá ne fakamatala ki he fāitaha ʻa e Kāingalotu Filipainí ʻi he ngaahi feinga tokoní.
Naʻe pehē ʻe Eletā ʻAila, “Ko ha meʻa fakaofo ke mamata kiate kinautolu ne lahi taha ʻenau molé ʻoku nau maʻu ha nonga ʻi heʻenau ʻalu atu ʻo ʻoatu ʻa e tokoní ki he niʻihi kehe kuo faingataʻaʻia tatau pē mo kinautolú. ʻOku mahino kiate au ʻa e anga ʻo e ‘mole ʻete moʻuí ke maʻu ia’ ʻi ha founga ne ʻikai ke u aʻusia kimuʻa. Kiate aú ʻoku ʻikai kei hoko ia ko ha fakakaukau fakalotu—ka ko e moʻoniʻi meʻa. ʻOku lahi ange ʻa e ngaahi kole ke kau ki ha polokalama tokoní ʻi he ngaahi fie maʻu ʻoku maʻú. ʻOku makehe ʻa e ngaahi foaki ʻo e nāunaú mo e tokoní; kuo hoko ia ko ha fakahā.”
Naʻe pehē ʻe ʻEletā Penisoni Misaluka, ko ha Fitungofulu Faka-ʻĒlia ʻi he ʻĒlia Filipainí, “Ko hono fakakātoá, ko e kakai Filipainí ʻoku nau fakaakeake ngofua.” ʻOku ʻikai ke mau toe vakai ki he ipu sioʻatá pe ʻoku vaeua pea fonu pe maha vaeua, ka “kuo mau vakai ki he ipu sioʻatá mo pehē, ‘Ko ha ipu sioʻata fakaʻofoʻofa ʻeni, neongo ʻoku ʻikai ha vai ai.’ ”
ʻOku mafuli ʻa e ngaahi meʻalelé pe tanu vaeua ʻi he feituʻu naʻe tāfeá tuʻunga ʻi ha afā mālohi ʻi Pangasinani, Filipaini. Naʻe tokoniʻi ʻe he kāingalotu ʻo e Siasí ʻa e faingataʻaʻiá, neongo naʻa nau faingataʻaʻia mo kinautolu.
Faitā ʻa Nate Leishman