ʻI he Ongoongó
Poupouʻi ʻe he Kau Faifekaú ʻa e Hisitōlia Fakafāmilí
Talu hono tuku mai ʻe he Siasí ʻa e polokalama FamilySearch foʻoú ʻi he taʻu kuo ʻosí, kuo lahi ʻa e kāingalotu ʻo e Siasí kuo nau ʻahiʻahiʻi ʻa e polokalama foʻoú.
Ke tokoniʻi ʻa kinautolu ʻoku foʻou ki he polokalamá pe ʻi ai haʻanau ngaahi fehuʻi fekauʻaki mo e ngāue hisitōlia fakafāmilí, kuo ʻomai ʻe he Siasí ha ngaahi maʻuʻanga tokoni kehekehe, ʻo kau ai ʻa e Worldwide FamilySearch Support.
Naʻe kamata ʻa e polokalama FamilySearch Support ʻi he 2005 ʻaki ha kau ngāue tokoni tokosiʻi ne nau fie tokoni ki he ngāue hisitōlia fakafāmilí. Kuo tupu ʻa e polokalamá ʻo kau ai ʻa e meimei kau faifekau ngāue tokoni ʻe 1,200 ʻi he ngaahi tapa kehekehe ʻo māmaní.
ʻOku ʻi ai ha kau faifekau tokoni ʻi he ngaahi fonua kehekehe ʻe 34, ʻa ia ʻoku nau tokoni ki ha ngaahi fehuʻi kehekehe fekauʻaki mo e hisitōlia fakafāmilí ʻi ha ngaahi lea fakafonua ʻe hongofulu tupu mo ha vahevaheʻanga ʻo e ngaahi taimi kehekehe lahi.
Kuo ngāue ʻa Sisitā Sesilia Timalaluani ko ha faifekau tokoni ʻi Filipaini talu mei ʻAokosi 2008 pea ʻokú ne saiʻia ʻaupito ʻi he faingamālie ke vahevahe mo e niʻihi kehé ʻa ʻene ʻilo ki he hisitōlia fakafāmilí. Ko e taha ia ʻo e kau fuofua Filipaini naʻe akoʻi ke hoko ko ha faifekau tokoni ʻi Filipainí, pea ʻokú ne lea faka-Sepuano (Cebuano), Pilitānia mo e faka-Takāloka. ʻOkú ne tokoniʻi ʻa e kāingalotú mo e kakai ʻoku ʻikai kau ki he Siasí ʻo kau ai ʻa ʻInitia, Malēsia, Maikolonīsia, Mongokōlia, mo Singapoa, ke nau ako ki he ngaahi tefitoʻi moʻoni ʻo e hisitōlia fakafāmilí.
ʻOku anga maheni ʻaki hono ui ʻa e kau faifekau tokoní ke nau ngāue ʻi ha māhina ʻe 30. ʻOku ngāue ʻa e kau faifekau tokoni kotoa pē mei honau ngaahi ʻapí pe ngaahi senitā hisitōlia fakafāmili ʻi honau ngaahi feituʻú, ʻa ia ʻoku nau maʻu ai ʻa e polokalama akó mo e tokoni fakaʻahó. ʻOku nau tali ki he ngaahi fehuʻi ʻoku ʻomi ʻi he telefoní pe ʻīmeilí, pea koeʻuhí ʻoku nau mafola ʻi he ngaahi tapa kotoa ʻo māmaní, ʻoku faingamālie maʻu pē ha taha ia ʻi he houa ʻe 24 he ʻaho, ʻi he ʻaho kotoa pē, tuku kehe pē ʻa e pongipongi Sāpaté.
Naʻe pehē ʻe Sisitā Koni Sēini ʻo Pelēseni Kolouví, ʻIutā, ʻAmelika, ʻa ia ʻoku lolotonga fakahoko ʻene ngāue fakafaifekau hono uá ʻi he Worldwide Support, “ ʻOku ou saiʻia ʻi heʻeku lava ʻo tokoniʻi ʻa e kau pataloni ʻoku lea faka-Pilitāniá mei he tapa kotoa pē ʻo māmaní, ʻo tokoniʻi kinautolu ke fakahoko ʻenau hisitōlia fakafāmilí.
Ko e founga faingofua taha ke fetuʻutaki ki he kau faifekau tokoní ko e ʻInitanetí, ʻaki hoʻo vakaiʻi ʻa e contact.familysearch.org pe ʻīmeili ki he support@familysearch.org.
ʻOku ʻomai ʻe he tuʻasila ʻinitaneti ʻa e FamilySearch Web ʻa e ngaahi fika telefoni tā taʻetotongi ke lava ʻo fetuʻutaki ki he kau faifekau tokoní ʻi he ngaahi feituʻu kehekehe ʻi māmaní.
ʻI he ngaahi feituʻu ʻoku ʻikai maʻu ai ʻa e ʻInitanetí, ko e lelei tahá ke te fetuʻutaki ki he kau faifekau hisitōlia fakafāmili ʻi homou feituʻú, talanoa mo ha tokotaha fai faleʻi ki he hisitōlia fakafāmilí ʻi he uōtí pe koló, pe ʻaʻahi ki ha senitā hisitōlia fakafāmili fakalotofonua.
Fakamatala ʻe Lauren Allen, Ngaahi Makasini ʻa e Siasí
Ngaahi Folofola Faka-Siaina mo Faka-Kōlea Lava ʻo Maʻu Atu ʻi he ʻInitanetí
Kuo tuku mai ʻe he Siasí e ongo folofola faka-ʻInitaneti foʻou ʻa e Siasí ʻi he ʻinitanetí: ko e lea faka-Kōleá ʻi ʻOkatopa 2009 mo e lea faka-Siainá (ʻi he ngaahi mataʻitohi faka-Siaina motuʻá) ʻi Tīsema. ʻE lava ʻo maʻu ʻa e lea faka-Kōleá ʻi he scriptures.lds.org/ko, pea maʻu ʻa e lea faka-Siainá ʻi he scriptures.lds.org/ch.
ʻOku ʻi he ongo saiti folofola faka-Kōleá mo faka-Siainá ʻa e folofola ʻe tolu kuo fakatahaʻí (ko e Tohi ʻa Molomoná, Tokāteline mo e Ngaahi Fuakavá, mo e Mataʻitofe Mahuʻingá) pea mo e Fakahinohino ki he Folofolá, ʻa ia ʻoku kau ai ha ngaahi tokoni fakaako mo ha lisi ʻo e ngaahi taumuʻa ʻi he ongoongoleleí kuo fakahokohoko fakamataʻitohi. ʻOku ʻi ai e palani ke pulusi ʻi he ʻinitanetí ʻi he 2010 ʻa e ngaahi folofolá ʻi he lea faka-Siapaní, Sepuanó mo e faka-Takāloká.